លោក Lee Tae-Hoon ចុះកុងត្រាដឹកនាំ TIFFY ARMY FC រយៈពេល២ឆ្នាំ
ក្លិបបាល់ទាត់កងយោធិពលខេមរភូមិន្ទ ឬហៅថា TIFFY ARMYN FC បានប្រកាសតែងតាំងលោក Lee Tae-Hoon ជាអ្នកចាត់ការថ្មីរបស់ខ្លួននៅថ្ងៃទី០១ខែមិថុនាឆ្នាំ២០២១នេះ ខណៈដែលគ្រូបង្វឹកសញ្ជាតិកូរ៉េខាងត្បូងចុះកុងត្រាដឹកនាំរយៈពេល២ឆ្នាំហើយផុតកំណត់នៅថ្ងៃទី០១ខែមិថុនាឆ្នាំ២០២៣។
លោក ខូវ ឆាយអគ្គលេខាធិការសមាគមកីឡាបាល់ទាត់កងយោធិពលខេមរភូមិន្ទបានបង្ហាញមូលហេតុនៃការនាំយកអតីតគ្រូបង្វឹកជម្រើសជាតិកម្ពុជារូបនេះមកដឹកនាំនៅក្លិបរបស់លោកថា៖
"លោកគ្រូ លី មានស្នាដៃយ៉ាងច្រើនក្នុងបាល់ទាត់កម្ពុជាទាំងឈុតធំ ឈុតយុវជននាពេលកន្លងមក។ ពិសេសលោកបានស្គាល់អំពីបាល់ទាត់កម្ពុជាច្បាស់ លោកធ្វើការជាមួយសហព័ន្ធកីឡាបាល់ទាត់កម្ពុជា៧ឆ្នាំជាងហើយទាំងឈុត U15 ។ លោកក៏មានបទពិសោធន៍ដឹកនាក្លិប Hoang Anh Gia Lai FC ដែលជាក្លិបមួយក្នុងលីគកំពូលវៀតណាម"។
"លោកបានសសម្រាកពីការងារនៅទីនោះ ហើយមកកម្ពុជាស្រាប់។យើងបានឃើញអំពីទស្សនវិស័យដឹកនាំរបស់គាត់ ដូចអ្វីដែលក្លិប TIFFAY ARMY FC ចង់បាន ។ គាត់ជាបុគ្គលដែលនឹងដឹកនាំក្លិបលក្ខណៈជាប្រព័ន្ធ ឲ្យប្រកួតប្រជែងដោយថាមពល ពោរពេញទៅដោយភាពជឿជាក់។ អ៊ីចឹង! នេះជាគោលដៅរបស់យើង ឲ្យកីឡាករល្អនាពេលអនាគត ពិសេសទស្សនវិស័យស្របគ្នា"។
អគ្គលេខធិការរូបនេះបន្តថា៖«តាមពិតទៅ!យើងមិនមានជំនឿចិត្តច្រើនទេ ដែលលោកនឹងយល់ព្រមមកដឹកនាំក្លិបរបស់យើង។ ព្រោះយើងដឹងហើយថាលក្ខខ័ណ្ឌរបស់គាត់ខ្ពស់ណាស់ គាត់ដឹកនាំសុទ្ធតែជម្រើសជាតិនារីនៅកូរ៉េខាងត្បូង ជម្រើសជាតិនិងនិងកម្រិតក្នុងលីគកំពូលវៀតណាម។ ប៉ុន្តែដោយសារការយល់គ្នា ទិសដៅស្របគ្នា ហើយគាត់យល់ព្រមក្នុងការចូលរួមជាមួយយើងក្នុងការអភិវឌ្ឍន៍បាល់ទាត់កម្ពុជាហើយគាត់ស្រឡាញ់បាល់ទាត់កម្ពុជា មានអនុស្សារីយ៍ច្រើនជាមួយកម្ពុជាហើយមិនចង់ទៅណាឆ្ងាយផងនោះគាត់ក៏យល់ព្រមនៅជាមួយយើង"។
លោក ខូវ ឆាយបន្តទៀតថាតួនាទីរបស់លោក លី តែហ៊ុនគឺជាអ្នកចាត់ការក្រុម ទទួលបន្ទុកលើការងារបច្ចេកទេសទាំងស្រុង ដូចលោក Keisuke Honda ក្នុងជម្រើសជាតិ ដោយដឹកនាំការហ្វឹកហាត់ ការជ្រើសរើសកីឡាករ ដឹកនាំការប្រកួត...និយាយជារួមគឺផ្នែកបច្ចេកទេសទាំងស្រុង គ្រប់គ្រងលើគ្រូទាំងអស់ក្នុងក្រុម។ ចំណែកកិច្ចសន្យាគឺរយៈពេល២ឆ្នាំ"។
លោក Lee ក្លាយជាគ្រូបង្វឹកមកដឹកនាំក្លិបអាជីពលើកដំបូងក្នុងប្រទេសប្រទេសកម្ពុជា បន្ទាប់ពីពេលមុនៗ លោកដឹកនាំក្រុមជម្រើសជាតិ។ ម្យ៉ាងវិញទៀត! លោក Lee Tae-Hoon នឹងក្លាយជាគ្រូបង្វឹកសញ្ជាតិកូរ៉េខាងត្បូងដំបូងគេបំផុតដែលមកដឹកនាំក្លិបបាល់ទាត់អាជីពក្នុងលីគកំពូលកម្ពុជា"។
រក្សាសិទ្ធិដោយ៖ ក្នុងស្រុក
អំពីអ្នកសរសេររបស់យើង៖ PECH PHEARUN
Tel:
ព័ត៌មានថ្មីៗ
