មហាជនអ្នកគាំទ្របាល់ទាត់ជាតិកំពុងរង់ចាំលទ្ធផលស៊ើបអង្កេតករណីរើសអើងពូជសាសន៍ក្នុងបាល់ទាត់កម្ពុជា
កាលពីល្ងាចថ្ងៃទី២៣ខែឧសភាឆ្នាំ២០២១ ផ្ទុះករណីរើសអើងពូជសាសន៍មួយបានកើតឡើងលើវិស័យបាល់ទាត់កម្ពុជា ខណៈដែលករណីនេះបានកើតមកលើខ្សែប្រយុទ្ធក្លិបព្រះខ័នរាជស្វាយរៀង Jean Marie Privat Befolo Mbarga បន្ទាប់ពីកីឡាករសញ្ជាតិកាម៉េរូនរូបនេះផុសក្នុងទំព័រហ្វេសបុករបស់ខ្លួន។
Privat Mbarga ខ្សែប្រយុទ្ធរបស់ព្រះខ័នរាជស្វាយរៀង បានបង្ហោះសំណេរលេីគណនីហ្វេសប៊ុករបស់ខ្លួននៅថ្ងៃនេះបកស្រាយអំពីសកម្មភាពរបស់គេនៅលេីទីលានម្សិលមិញអំឡុងការប្រកួតទល់នឹងក្លិបវិសាខាថា៖
«ការប្រកួតប្រជែងគឺជាផ្នែកមួយនៃបាល់ទាត់ ប៉ុន្តែនៅពេលគូប្រជែងនិយាយរេីសអេីងពូជសាសន៍ចំពោះខ្ញុំ នោះវាក្លាយជារឿងហួសហេតុពេក។ នៅក្នុងការប្រកួតថ្ងៃសៅរ៍ កីឡាករវិសាខា បាននិយាយដាក់ខ្ញុំថា "you’re a fucking black guy” ច្រើនជាងមួយដង។ ពេលខ្លះ ការឡកឡាយដាក់កីឡាករដទៃ គឺជាផ្នែកមួយនៃការប្រកួត ប៉ុន្តែនៅពេលដែលអ្នកក្លាយជាអ្នករេីសអេីងពូជសាសន៍នគឺអ្វីដែលមិនអាចទទួលយកបាន។ ខ្ញុំជឿថាគួរតែមានការដាក់ទណ្ឌកម្មចំពោះអ្នកធ្វេីទង្វេីនេះ ព្រោះមិនមានកន្លែងសម្រាប់ការរើសអើងជាតិសាសន៍នៅក្នុងបាល់ទាត់ឬក្នុងជីវិតទេ។ យើងទាំងអស់គ្នាជាមនុស្សដូចគ្នា មិនថាស្បែករបស់យើងពណ៌អ្វីនោះទេ។ នេះហេីយជាមូលហេតុដែលនៅក្នុងវីដេអូនេះអ្នកឃើញប្រតិកម្មរបស់ខ្ញុំខឹងខ្លាំងហើយខ្ញុំមិនអាចគ្រប់គ្រងអារម្មណ៍របស់ខ្ញុំបាន ពីព្រោះការរេីសអេីងពូជសាសន៍នេះមិនគួរអត់ឱនឱ្យឡេីយ»។
ករណីនេះបានធ្វើឲ្យមានការចាប់អារម្មណ៍ពីសំណាក់អ្នកគាំទ្របាល់ទាត់ក្នុងស្រុក ហើយមានអ្នកមួយចំនួនបានបញ្ចេញមតិយោបល់ខុសគ្នាអំពីករណីនេះ។ ក្លិបទាំងពីរក៏បានធ្វើសេចក្ដីប្រកាសរៀងៗខ្លួនអំពីបញ្ហានេះដោយវិសាខាសរសេរថា៖
«ដោយឃេីញមានការចេញផ្សាយនូវព័ត៌មានមួយចំនួនដែលមិនមានភាពច្បាស់លាស់ចោទប្រកាន់មកលេីកីឡាករក្លិបរបស់យេីងទាក់ទងទៅនឹងការរេីសអេីងពូជសាសន៍។ ក្លិបរបស់យេីងសូមធ្វេីការបដិសេធ និងសំណូមពរអោយមានការស្រាវជ្រាវអោយបានច្បាស់លាស់ទាក់ទងអំពីបញ្ហានេះ ចៀសវាងការកាត់សេចក្តីទៅលេីកីឡាកររបស់យេីងដោយស្តាប់តែភាគីម្ខាងដោយគ្មានភស្តុតាងមកបញ្ជាក់ ជាហេតុធ្វេីអោយប៉ះពាល់ដល់កេរ្តិ៍ឈ្មោះ កិត្តិយសរបស់កីឡាករ និងក្លិបយ៉ាងខ្លាំង ពីព្រោះថាក្លិបរបស់យេីង គឺមានបុគ្គលិក និងកីឡាករចំរុះជាតិសាសន៍ដែលកំពុងសហការគ្នាយ៉ាងស្អិតរមួតក្រោមដំបូលគ្រួសារតែមួយ។ សូមអរគុណ!"។
ចំណែកក្លិបរបស់ Jean Marie Privat Befolo Mbarga ព្រះខ័នរាជស្វាយរៀងបានសរសេរសេចក្ដីថ្លែងការណ៍លក្ខណៈជាក្លិបបាល់ទាត់អាជីពមួយដែលមានអត្ថន័យថា៖
«សេចក្តីថ្លែងការណ៍របស់ក្លឹប
ក្លឹបបាល់ទាត់ព្រះខ័នរាជស្វាយរៀងសូមបញ្ជាក់ថាយើងបានដឹងអំពីស្ថានភាពដែលបានកើតឡើងអំឡុងពេលប្រកួតពានរង្វាន់មិត្តហ្វូនខេមបូឌាលីគ (MCL) កាលពីថ្ងៃសៅរ៍ ទី២២ ខែឧសភា ដែលមានការសង្ស័យនូវការរើសអើងជាតិសាសន៍ បានកើតឡើងចំពោះកីឡាករ Jean Marie Privat Befolo Mbarga។
ក្លឹបបាល់ទាត់របស់យើង សូមគាំទ្រដល់ការស៊ើបអង្កេតរបស់អាជ្ញាធរបាល់ទាត់ក្នុងរឿងនេះ ហើយយើងខ្ញុំកំពុងធ្វើការសន្ទនាជាមួយពួកគាត់ក្នុងបញ្ហានេះផងដែរ។ ក្លឹបនឹងសហការយ៉ាងពេញទំហឹងជាមួយអាជ្ញាធរបាល់ទាត់ក្នុងអំឡុងពេលនៃការស៊ើបអង្កេត ដើម្បីធានាបាននូវភាពយុត្តិធម៌ និងលទ្ធផលដ៏ត្រឹមត្រូវចំពោះបញ្ហានេះ។ យើងខ្ញុំសូមនឹងមិនធ្វើការអត្ថាធិប្បាយបន្ថែមទៀត រហូតទាល់តែការស៊ើបអង្កេតបានបញ្ចប់។»
អ្វីៗគ្រប់យ៉ាងត្រូវរង់ចាំលទ្ធផលនៃការស៊ើបអង្កេតរបស់សហព័ន្ធកីឡាបាល់ទាត់កម្ពុជា ខណៈដែលអគ្គលេខាធិកាសហព័ន្ធកីឡាបាល់ទាត់កម្ពុជាបានថ្លែងប្រាប់សារព័ត៌មានថ្មីៗថា ៖
«កិច្ចការងារ(ដោះស្រាយករណីចោទប្រកាន់រើសអើង)ហ្នឹង ឥឡូវកំពុងស្ថិតនៅក្រោមការរៀបចំរបស់សហព័ន្ធ ព្រោះគណៈកម្មការប្រកួតបាល់ទាត់ជាតិកម្ពុជាយើង គ្រាន់តែរៀបចំការប្រកួតទេ ។ដូច្នេះយើងរង់ចាំមើលសហព័ន្ធ គាត់ពិនិត្យករណីហ្នឹង ហើយការវិនិច្ឆ័យ និងការសម្រេចចិត្ត គឺស្ថិតនៅលើសហព័ន្ធទាំងអស់»។
ពាក់ព័ន្ធករណីចោទប្រកាន់រើសអើងគ្នានេះ លោក កែវ សារ៉េត អគ្គលេខាធិកាសហព័ន្ធកីឡាបាល់ទាត់កម្ពុជា (FFC ) បានបញ្ជាក់ថា FFC នឹងកោះហៅកីឡាករ Privat Mbarga ខ្សែប្រយុទ្ធក្លិបព្រះខ័នរាជស្វាយរៀង និងភាគីក្លិបវិសាខា ទៅដោះស្រាយបញ្ហានេះ នៅថ្ងៃទី២៥ ឧសភា។ បើតាមលោក កែវ សារ៉េត ការកោះហៅប្រជុំនេះ ក៏ទំនងជាមិនទាន់មានការដាក់ពិន័យអ្វីធ្ងន់ធ្ងរដែរ ដោយគ្រាន់តែណែនាំលើកីឡាករដែលប្រព្រឹត្តខុស ឱ្យទទួលកំហុសខ្លួន ដើម្បីឱ្យស្ថានការណ៍ស្ងប់ស្ងាត់វិញ ។
«ពួកយើងកំពុងតែចាត់ការស្រាវជ្រាវលើរឿង(ចោទប្រកាន់រើសអើង)ហ្នឹងហើយ ប្រហែលជាថ្ងៃស្អែក បានយើងនឹងជួបប្រជុំគ្នា ជាមួយសាមីខ្លួនទាំងសងខាង…។ យើងព្យាយាមសម្របសម្រួលឱ្យត្រូវរ៉ូវគ្នាវិញ ព្រោះពេលខ្លះក្មេង(កីឡាករ) វាមិនចាប់អារម្មណ៍ភាសាវាថា វានិយាយខុសអីអ៊ីចឹងទៅណា។ អ៊ីចឹងទី១ យើងមិនមែនប៉ះដៃយកដៃ ប៉ះជើងយកជើងភ្លាមនោះទេ យើងត្រូវហៅវាមកអប់រំ»។ នេះជាការបញ្ជាក់របស់អគ្គលេខាធិកាសហព័ន្ធកីឡាបាល់ទាត់កម្ពុជា។»
រក្សាសិទ្ធិដោយ៖ ក្នុងស្រុក
អំពីអ្នកសរសេររបស់យើង៖ PECH PHEARUN
Tel:
ព័ត៌មានថ្មីៗ
