សហព័ន្ធកីឡាបាល់ទាត់កម្ពុជាតែងតាំងលោក ភា សុភ័ត្រា និង អ៊ុក សុធីជាគ្រូជំនួយជម្រើសជាតិឈុតធំ
កាលពីប៉ុន្មានម៉ោងមុននេះសហព័ន្ធកីឡាបាល់ទាត់កម្ពុជាបានប្រកាសតែងតាំងលោក ភា សុភ័ក្ត្រា និងលោក អ៊ុក សុធី ជាគ្រូជំនួយនៃក្រុមជម្រើសជាតិកម្ពុជា។
កាលពីប៉ុន្មានថ្ងៃមុន ប្រភពជិតសិ្នទ្ធបានបង្ហើបឲ្យដឹងថា គ្រូបង្វឹក ដែលមានរហស្សនាម ១២០ភាគរយ គឺលោក ភា សុភ័ត្រា នឹងវិលត្រឡប់មកចូលរួមក្នុងក្រុមជម្រើសជាតិកម្ពុជាសារជាថ្មីម្តងទៀត។ ការប្រកាសពីតួនាទីរបស់អតីតគ្រូបង្វឹកក្លឹបក្រសួងការពារជាតិរូបនេះ ទំនងជាអាចធ្វើឡើងក្នុងពេលឆាប់ៗខាងមុខ ជាមួយនឹងបញ្ជីឈ្មោះកីឡាកររបស់ក្រុមជម្រើសជាតិកម្ពុជា ដើម្បីត្រៀមខ្លួនធ្វើការហ្វឹកហាត់ចូលរួមការប្រកួតវគ្គជម្រុះ FIFA World Cup 2022 តំបន់អាស៊ី នៅដើមខែមិថុនា។
តែយ៉ាងណានៅថ្ងៃនេះ! ការពិតត្រូវបានបង្ហាញជាផ្លូវការហើយ។លោក ភា សុភ័ត្រា ធ្លាប់សម្រេចចិត្តចែកផ្លូវជាមួយក្រុមជម្រើសជាតិកម្ពុជាម្តងហើយ កាលពីដើមឆ្នាំ២០២០ ដោយហេតុផលផ្ទាល់ខ្លួន ហើយក្នុងនាមជាគ្រូជំនួយ ក៏ធ្លាប់រួមចំណែកជួយឲ្យក្រុមជម្រើសជាតិកម្ពុជា U22 ឡើងទៅកាន់វគ្គ៤ក្រុមចុងក្រោយ ជាប្រវត្តិសាស្ត្រ នៃព្រឹត្តិការណ៍កីឡា SEAGAME 2019 ប្រទេសហ្វីលីពីនផងដែរ។
ចំណែកលោកអ៊ុក សុធីបានចូលនិវត្តន៍ពីកីឡាករអាជីពរបស់ភ្នំពេញក្រោនកាលពីឆ្នាំ២០១៩ ដោយកាន់តំណែងជាអ្នកសម្របសម្រួលបច្ចេកទេសលើក្រុមយុវជនថ្នាលទាំងបីឈុតរបស់ក្លឹប៖ ក្រុមយុវជនអាយុក្រោម១៤ឆ្នាំ ក្រុមយុវជនអាយុក្រោម១៦ឆ្នាំ និងក្រុមយុវជនអាយុក្រោម១៨ឆ្នាំ ។ លោក អ៊ុក សុធី មានតួនាទីត្រួតពិនិត្យលើការងារបច្ចេកទេសរបស់ក្រុមយុវជនទាំងពេលហ្វឹកហាត់ និងពេលប្រកួត ហើយបន្ថែមពីនេះទៅទៀតនោះគឺការផ្សារភ្ជាប់គ្នារវាងក្រុមយុវជនថ្នាលនៃក្រុមនីមួយៗ ក៏ដូចជាស្វែងរកដំណោះស្រាយនៅពេលដែលក្រុមជួបបញ្ហា ដើម្បីឆ្ពោះទៅរកការអភិវឌ្ឍន៍ក្រុមថ្នាលប្រកបដោយប្រសិទ្ធិភាព ។
អ្នកទាំងពីរនឹងធ្វើជាមួយគ្រូបង្វឹកជម្រើសជាតិលោក លោក Ryu Hirose ដើម្បីដឹកនាំក្រុមជម្រើសជាតិប្រកួតជម្រុះ World Cup 2022 ដែលនៅសល់បីប្រកួតចុងក្រោយ។ និយាយអំពីជម្រើសជាតិកម្ពុជាវិញ ស្ថិតនៅពូលC ក្រុមជម្រើសជាតិកម្ពុជា នឹងត្រូវធ្វើដំណើរទៅទឹកដីប្រទេសប៉ារ៉ែន នៅចុងខែឧសភានេះ។ សម្រាប់បេសកកម្មថ្មីរបស់ក្រុមកម្ពុជាក្នុងឆ្នាំ២០២១នេះ នឹងត្រៀមចូលរួមប្រកួតបន្តបង្រ្គប់កិច្ច ចំនួន៣ប្រកួតចុងក្រោយនៃវគ្គចែកពូលជុំទី២ នៃព្រឹត្តិការណ៍បាល់ទាត់ពិភពលោក (FIFA World Cup Qatar 2022) ដែលត្រូវប្រកួតជាមួយម្ចាស់ផ្ទះបារ៉ែន នាថ្ងៃទី០៣ ខែមិថុនា ជួបជាមួយម្ចាស់ផ្ទះ អ៊ីរ៉ាក់ នាថ្ងៃទី០៧ ខែមិថុនា និងទទួលធ្វើម្ចាស់ផ្ទះ១ប្រកួតចុងក្រោយជាមួយក្រុមភ្ញៀវ អ៊ីរ៉ង់ នាថ្ងៃទី១១ ខែមិថុនា ឆ្នាំ២០២១។
នៅក្នុងពូលC ដែលមាន៥ក្រុម មានកម្ពុជា, បារ៉ែន, ហុងកុង, អ៊ីរ៉ាក់ និងអ៊ីរ៉ង់ ឆ្លងកាត់៥ប្រកួតកន្លងមកមិនធ្លាប់ឈ្នះ ស្មើ១ជាមួយក្រុមហុងកុង ១-១ និងចាញ់៤ប្រកួត។ ប្រវត្តិ១ប្រកួតដែលកម្ពុជារបូតគ្រាប់បាល់ច្រើនជាងគេ គឺចាញ់ម្ចាស់ផ្ទះ អ៊ីរ៉ង់ រហូតដល់ ១៤ទល់០ កាលពីថ្ងៃទី១០ ខែតុលា ឆ្នាំ២០១៩។ ក្រៅពីនេះ ក្រុមបាល់ទាត់ជម្រើសជាតិអាយុក្រោម២២ឆ្នាំ កម្ពុជានឹងចូលរួមប្រកួតកីឡាស៊ីហ្គេម លើកទី៣១ នៅប្រទេសវៀតណាម ដែលគ្រោងនឹងដំណើរការពីថ្ងៃទី២១ ខែវិច្ឆិកា ដល់ថ្ងៃទី០២ ខែធ្នូ ឆ្នាំ២០២១ផងដែរ៕
រក្សាសិទ្ធិដោយ៖ ក្នុងស្រុក
អំពីអ្នកសរសេររបស់យើង៖ PECH PHEARUN
Tel:
ព័ត៌មានថ្មីៗ
