ធ្វើជាមនុស្សប្រុសត្រូវចេះប្រកាន់ខ្ជាប់អត្តចរិត៣យ៉ាងនេះ ទើបគ្រួសារអាចមានសុភមង្គល
ធ្វើជាមនុស្សប្រុសគឺត្រូវតែមានទំនួលខុសត្រូវ ជាពិសេសពេលរៀបការមានគ្រួសារផ្ទាល់ខ្លួនអ្នកត្រូវប្រាកដថាអ្នកអាចកសាងគ្រួសារមួយដែលមានសុភមង្គលបានដោយដៃរបស់អ្នកផ្ទាល់។ ជាពិសេសបើអ្នកអាចប្រកាន់ខ្ជាប់នូវអត្តចរិតល្អទាំង៣នេះបាន ច្បាស់ណាស់ថាអ្នកនឹងមានតែសេចក្តីសុខតកូនតចៅ អាចជួយអោយគ្រួសារមានភាពកក់ក្តៅពេញលេញ៖
១.កុំស្តីបន្ទោសប្រពន្ធរបស់អ្នក៖ បុរសគឺជាឋានសួគ៌ ស្ត្រីជាផែនដី។ ប្រសិនបើស្ថានសួគ៌ និងផែនដីមានភាពចុះសម្រុងគ្នា នោះអ្វីៗនឹងដំណើរការដោយរលូន។ នៅពេលដែលបុរសម្នាក់ចេះគ្រប់គ្រងអារម្មណ៍របស់គាត់ គាត់នឹងមានបុគ្គលិកលក្ខណៈទៀងត្រង់ និងសប្បុរសដោយមិនមានការប្រៀបធៀបប្រពន្ធជាមួយអ្នកផ្សេងឡើយ។ ផ្ទុយទៅវិញ បុរសប្រភេទដែលចូលចិត្តឈ្លោះជាមួយប្រពន្ធរឿងតូចតាច ហើយមានចិត្តចង្អៀតនឹងពិបាកសប្បាយចិត្ត ធ្វើអោយគ្រួសារមានតែរឿងក្តីក្តាំង។
២.កុំស្តីបន្ទោសកូនរបស់អ្នកដោយគ្មានហេតុផល៖ វិធីអប់រំបែបអាស៊ីគឺឪពុកតឹងរ៉ឹង ហើយម្តាយស្លូតបូត។ ប៉ុន្តែពេលខ្លះឪពុកតឹងរ៉ឹងពេក នឹងធ្វើឲ្យកូនខ្លាច។ មធ្យោបាយល្អបំផុតក្នុងការអប់រំកុមារគឺមិនត្រូវស្តីបន្ទោស និងចំអកឱ្យពួកគេទេ ប៉ុន្តែត្រូវប្រើខ្លួនយើងជាគំរូ ដើម្បីបង្រៀនពួកគេឱ្យមានការទទួលខុសត្រូវ។ ឪពុកដ៏អស្ចារ្យអាចប្រាស្រ័យទាក់ទងជាមួយកូនរបស់គាត់ និងណែនាំពួកគេឱ្យបានត្រឹមត្រូវ ដូច្នេះពួកគេអាចក្លាយជាកូនកតញ្ញូនាពេលអនាគត។ នៅពេលដែលឪពុកម្តាយខ្លួនឯងធ្វើជាគំរូល្អដល់កូន កូននឹងរៀន និងបន្តទម្លាប់ល្អនេះ។
៣.រីករាយនិងទន់ភ្លន់ជាមួយឪពុកម្តាយ៖ ប្រសិនបើគ្រួសារមួយចង់រីកចម្រើន អាកប្បកិរិយារបស់កុមារចំពោះឪពុកម្តាយរបស់ពួកគេមានសារៈសំខាន់ខ្លាំងណាស់។ ក្នុងនាមជាបុរស អាកប្បកិរិយាចំពោះមនុស្សដែលចិញ្ចឹមអ្នកគឺជាការចាំបាច់បំផុត។ កុំស្អប់ឪពុកម្ដាយ ហើយកុំស្រែកជេរគេតាមអំពើចិត្ត។ ឪពុកម្តាយគឺជាសសរស្តម្ភខាងវិញ្ញាណរបស់យើង។ នៅពេលដែលឪពុកម្តាយរបស់យើងរស់នៅដោយសប្បាយរីករាយ ពួកគាត់ច្បាស់ជាមានសុខភាពល្អ និងអាយុវែង ហើយយើងជាកូនក៏នឹងសប្បាយចិត្តដែរ៕
ព័ត៌មានថ្មីៗ
