ចូលចិត្តភាពស្ងៀមស្ងាត់មែនទេ? ទាំងនេះជាគុណសម្បត្តិទាំង ៦ ចំណុច របស់មនុស្សស្ងប់ស្ងាត់
មនុស្សរាល់គ្នាតែងមានគំនិតថា មនុស្សស្ងប់ស្ងាត់ពិបាកចុះសម្រុងជាមួយមនុស្សដទៃ មិនសូវរីកចម្រើន ពិបាកចូលចុះសង្គម និងសម្របខ្លួនទៅនឹងស្ថានភាព។ គេតែងតែគិតថា មនុស្សស្ងប់ស្ងាត់ជាមនុស្សមិនរួសរាយរាក់ទាក់ អៀនខ្មាសច្រើន និងចូលចិត្តនៅតែឯង។
ផ្ទុយទៅវិញ អ្នកមិនបានដឹងពីគុណសម្បតិ្ត និងគុណប្រយោជន៍ដែលប្រភេទមនុស្សស្ងប់ស្ងាត់ទទួលបាននោះទេ។
១. មនុស្សប្រភេទនេះ តែងតែមានការអង្កេតខ្ពស់ និងតែងតែប្រុងប្រយ័ត្ន ដែលជាអំណោយផលពីធម្មជាតិ។ ពួកគេអាចសម្គាល់ឃើញអ្វីដែលអ្នកផ្សេងមិនបានឃើញ ព្រោះអ្នកដទៃកំពុងរវល់នឹងការជជែកលេងសប្បាយ និងមមាញឹកនឹងអ្វីផ្សេងៗ។
២. ពួកគេមានទំនោរក្នុងការគិតពីផលប៉ះពាល់នៃអាកប្បកិរិយារបស់ពួកគេចំពោះអ្នកដទៃ។ ពួកគេតែងតែមានការគួរសម មិនសូវច្របូកច្របល់ និងគិតមុនពួកគេនិយាយ ឬធ្វើអីមួយ។ នេះហើយ ទើបក្រុមមនុស្សនេះមិនសូវត្រូវបានគេចោទប្រកាន់ដែលបង្កភាពរំខាន និងមានកំហុសច្រើន។
៣. ពួកគេក៏ត្រូវបានចាត់ចូលជាមនុស្សឯករាជ្យ និងមិនសូវចូលចិត្តនរណាត្រួតត្រា ដោយសារតែពួកគេមានគំនិតច្នៃប្រតិដ្ឋ និងមិនសូវចូលចិត្តធ្វើត្រាប់តាមក្រុមមនុស្សដទៃ ឬអ្វីដែលក្រុមមនុស្សភាគច្រើនកំពុងពេញនិយម។ ពួកគេតែងតែមានសេចក្តីស្ងប់សុខនូវចំណង់ចំណូលចិត្តរបស់គេ និងភាពច្នៃប្រតិដ្ឋរបស់គេផ្ទាល់។ ដូចនេះពួកគេមិនសូវរងការរំខានដល់ផ្លូវអារម្មណ៍ដែលជះឥទ្ធិពលពីសម្ភារដែលគេពេញនិយមដូចគ្នា ឬធ្វើដូចគេនៅក្នុងបណ្តាញសង្គម។
៤. ពួកគេអាចជាអ្នកស្តាប់ដ៏ល្អ ហើយក៏ជាអ្នកពូកែរក្សាអាថ៍កំបាំងដែរ ដោយសារតែចរិតរបស់ពួកគេមានភាពស្ងៀមស្ងាត់ និងមិនសូវចូលចិត្តបើកចំហពីរឿងបុគ្គលពីធម្មជាតិ។ ដូចនេះហើយគេតែងតែយកចិត្តទុកដាក់ស្តាប់ កត់សម្គាល់ពីអ្នកដទៃ ហើយយកមកពិចារណា។ បន្ថែមលើសពីនេះ អ្វីទាំងអស់នេះហើយជាហេតុដែលធ្វើឱ្យគេធ្វើការសម្រេចចិត្ត និងជាអ្នកដោះស្រាយបញ្ហដ៏ល្អមួយរូបដែរ ។
៥. ពួកគេតែងតែបំពេញការងារ និងសម្រេចគោលដៅបានល្អ នៅលើជំនាញ ឬអ្វីដែលគេបានជ្រើសរើស ដោយសារក្រុមមនុស្សនេះមានសមត្ថភាពក្នុងការផ្តោតអារម្មណ៍បានយ៉ាងល្អ យកចិត្តទុកដាក់ខ្លាំងលើការងារ ហើយពួកគេមានសមត្ថភាពធ្វើឱ្យខ្លួនគេឃ្លាតឆ្ងាយពីការជួបជុំ និងពិភពលោកខាងក្រៅ។
៦. ក្រុមមនុស្សនេះតែងតែស្រលាញ់ និងមានមនោសញ្ចេតនាជ្រាលជ្រៅជាមួយមិត្តដែលគេបានរាប់អាន ក៏ព្រោះតែពួកគេមិនងាយរាប់អានអ្នកដទៃ ហើយតែងតែជ្រើសរើសមនុស្សដែលគេទុកចិត្ត និងស្មោះត្រង់ចំពោះគេទុកជាមិត្ត៕
អត្ថបទ ៖ Mythical Team / ក្នុងស្រុករក្សាសិទ្ធិ
ព័ត៌មានថ្មីៗ
