អ្នកមានហើយឆ្លាត ដាច់ខាត មិនខ្ជះខ្ជាយលើរឿងទាំង ៣ នេះឡើយ
យើងប្រៀបដូចជាអ្នកធ្វើដំណើរប្រញាប់ទៅណាមកណា។ លើលោកនេះគ្មានអ្វីដែលយើងត្រូវតោងជាប់នោះឡើយ។ យ៉ាងណាក៏ដោយ មនុស្សឆ្លាតវៃ គេនឹងមិនខ្ជះខ្ជាយក្នុងរឿងទាំង ៣ នេះឡើយ។
១. មិនខ្ជះខ្ជាយពេលវេលារស់នៅក្នុងអតីតកាល
មានពាក្យចាស់ពោលថា បើអ្នកយំព្រោះព្រះអាទិត្យបានចាកចោលជីវិតអ្នក នោះទឹកភ្នែកអ្នកនឹងរារាំងអ្នកមិនឱ្យឃើញផ្កាយ។ ការដែលយើងតែងតែឈឺក្បាលរឿងអតីតកាល មិនសប្បាយចិត្តរឿងដែលកន្លងហួស វាជាការខ្ជះជះខ្ជាយខ្លាំងបំផុត។ វានឹងរារាំងអ្នកមិនឱ្យដឹងពីរបៀបរីករាយក្នុងជីវិតនាពេលបច្ចុប្បន្ននេះ។
ពេលនឿយហត់ត្រូវរៀនដោះលែង។ កុំនៅជាប់ជំពាក់នឹងអតីតកាល។ អ្វីៗនៅអតីតកាលគឺដូចជាថ្ងៃម្សិលមិញ ដូច្នេះសូមឱ្យវាស្ថិតនៅក្នុងអតីតកាល។ រឿងរ៉ាវនៃអនាគតត្រូវបានដាំដុះដោយការខិតខំប្រឹងប្រែងនាពេលបច្ចុប្បន្ននេះ។ កុំទុកក្នុងចិត្តរឿងអតីតកាល រឿងដែលបានចប់ហើយ ឱ្យវាចប់ទៅចុះ។ បើអ្នករក្សាទុកក្នុងចិត្ត នោះអ្នកនឹងធ្វើឱ្យខ្លួនឯងកាន់តែមានបន្ទុក។
២. មិនខ្ជះខ្ជាយនូវជីវិតបច្ចុប្បន្នឡើយ
ជីវិតនេះគឺដូចជាដំណើរកម្សាន្ត។ យើងប្រៀបដូចជាអ្នកធ្វើដំណើរដែលប្រញាប់ទៅមក។ លើលោកនេះគ្មានអ្វីដែលយើងត្រូវរឹងរូសចំពោះវានោះទេ។ ក្នុងជីវិតនេះរៀនមើលរឿងល្អៗឱ្យបានច្រើន។ អ្នកនឹងមិនភ្លេចអារម្មណ៍រំភើបពេលឈរនៅមុខទេសភាពដ៏ស្រស់ស្អាតនោះ។
អតីតកាល គឺនៅពីក្រោយជារៀងរហូត ហើយអនាគតនៅតែជាអាថ៌កំបាំងនៅខាងមុខ។ មានតែបច្ចុប្បន្នទេដែលសក្តិសមសម្រាប់ការកោតសរសើររបស់យើង។
ដើមឡើយ គ្មានជោគជ័យណាដែលធ្លាក់ពីលើមេឃនោះទេ។ នៅពីក្រោយសំណាងដែលអ្នកមាន គឺដំណើរនៃការបន្តប្រមូលទាំងតូចទាំងធំ។ ពេលខ្លះ ការប្រឹងប្រែងដែលអ្នកដាក់មិនមានប្រសិទ្ធភាពជាបណ្ដោះអាសន្ន។ ប៉ុន្តែប្រាកដណាស់ថ្ងៃណាមួយអ្នកនឹងទទួលបានអ្វីដែលអ្នកសមនឹងទទួល។ ដូច្នេះសូមព្យាយាមឱ្យអស់ពីសមត្ថភាព ទុកឱ្យនៅសល់ឱ្យជោគវាសនា ។
៣. មិនខ្ជះខ្ជាយពេលវេលាទៅនឹងអនាគត
អតីតកាលអាចជាវាសនា។ ការសោកស្ដាយ ឬការវង្វេង គឺគ្មានប្រយោជន៍ទេ។ អនាគតក៏មិនដឹងដែរ។ ក្តីសង្ឃឹមកាន់តែខ្ពស់ ការខកចិត្តកាន់តែធំ។ ប្រសិនបើអ្វីៗមិនដំណើរការដូចការគ្រោងទុក ចូរជឿជាក់ថា អ្វីៗត្រូវបានរៀបចំដូចដែលវាគួរតែកើតមាន។
អ្វីនឹងមកដល់ អនាគតមិនដឹង។ គ្មាននរណាម្នាក់ដឹងថាអនាគតនឹងទៅជាយ៉ាងណានោះទេ។ ការខ្វល់ខ្វាយច្រើនអំពីអនាគតនាំឱ្យអ្នកកាន់តែមានបញ្ហាសម្រាប់ខ្លួនឯង។ អ្វីដែលត្រូវកើតឡើង វាត្រូវតែកើតឡើង វាមិនអាចឃាត់ ឬបញ្ឈប់បានឡើយ។ ប្រសិនបើវាកើតឡើង ចូរយើងទទួលយកវា ហើយធ្វើវាឱ្យអស់ពីសមត្ថភាព។ ចិត្តដែលមិនហ៊ុំព័ទ្ធដោយសៅហ្មង ជារបស់ដ៏អស្ចារ្យក្នុងលោក៕
ប្រភព ៖ បរទេស / Knongsrok
ព័ត៌មានថ្មីៗ
