គ្រូបង្វឹកបារ៉ែន៖ បើយើងលេងមិនឈ្នះកម្ពុជាសម្រាប់ការប្រកួតនៅសល់ កុំសង្ឃឹមថាបានឡើងទៅវគ្គបន្តនោះ
លោក Helio Sousa ដែលដឹកនាំជម្រើសជាតិបារ៉ែនកសាងភាពជោគជ័យរបស់ខ្លួនចាប់ពីឆ្នាំ ២០១៩ ពេលនេះត្រៀមបន្តការប្រកួតជម្រុះពានរង្វាន់ FIFA World Cup Qatar 2022 and AFC Asian Cup China 2023។
ក្រុមបារ៉ែនបានក្លាយជាម្ចាស់ជើងឯកក្នុងព្រឹត្តិការណ៍ WAFF Championship ឆ្នាំ 2019 និងពានរង្វាន់ Gulf Cup និងបានយកឈ្នះជម្រើសជាតិសាធារណរដ្ឋអ៊ីស្លាមអ៊ីរ៉ង់ក្នុងពូល C នៃវគ្គជម្រុះ World Cup តំបន់អាស៊ីដើម្បីឈរនៅចំណាត់ថ្នាក់លេខ ២ មុនពេលបាល់ទាត់ត្រូវបានបញ្ឈប់ដោយជំងឺរាតត្បាត COVID-19 ។
ស្របពេលការប្រកួតជម្រុះពានទ្វីបអាស៊ីដែលគ្រោងនឹងបន្តនៅខែមិថុនា លោក Sousa ជឿជាក់ថាគូប្រជែងរបស់លោកមើលទៅមានភាពខុសប្លែកពីមុនតែយ៉ាងណាលោកនឹងព្យាយាមអភិវឌ្ឍន៍ក្រុមឲ្យបានល្អលើសពួកគេ។ Sousa បាននិយាយទៅកាន់ប្រព័ន្ធផ្សព្វផ្សាយក្នុងស្រុកថា៖
“ ខ្ញុំគិតថាគូប្រជែងរបស់យើងឃើញយើង ហើយមានការគោរពច្រើនជាងអ្វីដែលពួកគេធ្លាប់បានធ្វើនាពេលកន្លងមក។ ឥឡូវខ្ញុំគិតថាពួកគេឃើញយើងដោយគំនិតផ្សេងគ្នា និងគោរពគ្នាខុសពីមុន"។
"ពួកគេចូលចិត្តលេងតទល់ជាមួយពួកយើង ប៉ុន្តែពួកគេបានដឹងថាពួកគេនឹងមានការលំបាកជាច្រើនក្នុងការផ្តួលយើង"។
ជម្រើសជាតិបារ៉ែននៅសល់ ៣ ប្រកួតទៀតក្នុងយុទ្ធនាការពូល C របស់ពួកគេដោយត្រូវជួបជម្រើសជាតិកម្ពុជា មុនពេលជួបអ៊ីរ៉ង់ និងហុងកុង។ ខណៈដែលការឈានទៅវគ្គបន្តនៅតែស្ថិតក្នុងកណ្តាប់ដៃរបស់ពួកគេដដែល លោកHelio Sousa សង្ឃឹមថាក្រុមរបស់គាត់នឹងបង្ហាញនូវភាពរឹងមាំរបស់ខ្លួន ដើម្បីឈានទៅប្រកួតជុំទី ៣ នៃវគ្គជម្រុះ World Cup និងទទួលបានកៅអីក្នុងព្រឹត្តិការណ៍ AFC Asian Cup China 2023 ជុំផ្តាច់ព្រ័ត្រដោយស្វ័យប្រវត្តិផងដែរ។
Sousa បានបញ្ជាក់ថា៖ “ ប្រសិនបើយើងមិនយកឈ្នះអ្វីដែលយើងចង់បានពីការប្រកួតលើកដំបូងទល់នឹងជម្រើសជាតិកម្ពុជាទេនោះ អ្វីដែលនៅសល់នឹងពិបាកសម្រេចបាន” ។
“ យើងត្រូវតែផ្តោតលើការលេងតាមទស្សនវិជ្ជាដឹកនាំរបស់យើង ដែលជាវិធីដែលយើងចង់ និងលេងលើទីលានម្តងទៀត ហើយព្យាយាមដើម្បីទទួលបានជ័យជម្នះ"។
"យើងនឹងត្រៀមខ្លួនបន្ថែមទៀត នៅពេលការប្រកួតជម្រុះចាប់ផ្តើម។ ការប្រកួតទី ១ នឹងសំខាន់បំផុត។ បន្ទាប់ពីនោះយើងនឹងចាប់ផ្តើមគិតអំពីការប្រកួតទី ២ »។
“ ប្រសិនបើមានអ្វីកើតឡើងដែលផ្ទុយនឹងគំនិតគោលបំណងរបស់យើង យើងត្រូវតែបន្តប្រយុទ្ធជាមួយគ្នាហើយយើងត្រូវតែធ្វើវានៅក្នុងការប្រកួត។ យើងនឹងត្រៀមខ្លួនសម្រាប់ទាំងអស់គ្នា ប៉ុន្តែវាជាបាល់ទាត់ហើយយើងនឹងត្រូវប្រកួតជាមួយក្រុមដ៏សំខាន់បំផុតពីពិភពលោកនេះ។ យើងកំពុងប្រយុទ្ធជាមួយពួកគេ ប៉ុន្តែយើងចង់ដណ្ដើមយកកន្លែងរបស់ពួកគេ។
“ វាមិនទាន់ចប់ទេ យើងនឹងតស៊ូនិងធ្វើអ្វីគ្រប់យ៉ាងដើម្បីទទួលបាន ៩ ពិន្ទុក្នុង ៣ ប្រកួតដែលយើងនឹងលេង ប៉ុន្តែបើប្រាកដថាអ្នកធ្វើខុសក្នុងការប្រកួតនីមួយៗវានឹងនាំមកនូវបញ្ហាជាច្រើនសំរាប់យើងក្នុងការសំរេចគោលដៅរបស់យើង "៕
ប្រភព៖ AFC
ព័ត៌មានថ្មីៗ
