បាល់ទាត់អាស៊ាន៖ ខ្សែបម្រើជម្រើសជាតិហ្វីលីពីន Manny Ott ចាកចេញពី United City ទៅលេងនៅ Melaka United
ក្រុម Melaka United របស់ប្រទេសម៉ាឡេស៊ីបានប្រកាសពីការចុះហត្ថលេខាលើកីឡាករអន្តរជាតិហ្វីលីពីន Manny Ott ពីក្លឹប United City Football Club។
ខ្សែបម្រើវ័យ ២៨ ឆ្នាំដែលបានចាប់ផ្តើមអាជីពជាមួយក្រុម FC Ingolstadt ០៤ II របស់អាល្លឺម៉ង់ក្នុងឆ្នាំ ២០១០ បានជួយពង្រឹងក្រុមបាល់ទាត់ Melaka United ត្រៀមការប្រកួតលីគកំពូលម៉ាឡេស៊ី Malaysia Super League (MSL)រដូវកាល២០២១ ។
Manny Ott គឺជាផ្នែកមួយជួយក្រុម United City ដែលត្រូវបានគេស្គាល់ថាជាក្លិបមានឈ្មោះ Ceres Negros ឈ្នះជើងឯកនៅលីគកំពូលហ្វីលីពីនឆ្នាំ ២០១៧ និង ២០១៨ ។ ចំណែកពានរង្វាន់លំដាប់ទ្វីប រូបគេធ្លាប់ស៊ុតបញ្ចូលទីគ្រាប់បាល់ជ័យជម្នះលើក្រុម Home United របស់សិង្ហបុរីកាលពីឆ្នាំ២០១៧ ក្នុងពានរង្វាន់ AFC Cup វគ្គ ASEAN Zonal Final។
ការផ្ទេរនេះគឺជាការផ្លាស់ប្តូរក្លិបលើកទី ២ របស់ Ott ចេញពីប្រទេសហ្វីលីពីនដោយពីមុនរូបគេ លេងជាមួយក្រុម Ratchaburi Mitr Phol FC របស់ប្រទេសថៃក្នុងឆ្នាំ ២០១៩ មុនពេលផ្លាស់ទៅលេងនៅ United City ជាថ្មី។
ក្រុម Melaka United ឡើងមកលេងនៅលីគកំពូលម៉ាឡេស៊ី MSL ក្នុងរដូវកាល២០២១នេះ បន្ទាប់ពីបានឈ្នះជើងឯកពានរង្វាន់លីគទី ២ ម៉ាឡេស៊ី ក្នុងឆ្នាំ ២០១៦ ខណៈកាលពីរដូវកាលមុនបួកគេបានត្រឹមចំណាត់ថ្នាក់ទី៩ប៉ុណ្ណោះក្នុងតារាងលីគកំពូល៕
រូបថតៈMelaka United
ព័ត៌មានថ្មីៗ
