រឿងគួរឱ្យចាប់អារម្មណ៍ ៣ ដែលអ្នកប្រហែលជាមិនបានដឹងអំពី Bruno Fernandes
រឿង ៣ យ៉ាងដែលអ្នកប្រហែលជាមិនបានដឹងអំពី Bruno Fernandes ។ ខ្សែបម្រើសញ្ជាតិព័រទុយហ្កាល់រូបនេះបានកែប្រែទម្រង់លេងក្រុមបិសាចក្រហម Manchester Unitedស្ទើតែ១៨០ដឺក្រេ ចាប់តាំងពីរូបគេបានមកដល់កាលពីខែមករាឆ្នាំ២០២០។
អស់រយៈពេលជាច្រើនឆ្នាំមកហើយដែលក្រុម Manchester United ខ្វះកីឡាករដែលចេះច្នៃប្រឌិតនៅក្នុងតំបន់បម្រើរបស់ពួកគេ។ បញ្ហានៅពេលនេះហាក់ដូចជាត្រូវបានដោះស្រាយ ដោយការមកដល់របស់ Bruno Fernandes ពី Sporting Lisbon។ កីឡាករសញ្ជាតិព័រទុយហ្កាល់រូបនេះបានផ្តល់កំលាំងចិត្តដល់ក្រុមរបស់ខ្លួនចាប់តាំងពីលោក Sir Alex Ferguson បានលាឈប់ពីការងារគ្រូបង្វឹកនៅ Old Trafford ។ គាត់បានក្លាយជាសំណព្វចិត្តរបស់អ្នកគាំទ្រយ៉ាងឆាប់រហ័សហើយនេះពិតហេតុផលល្អដែលបិសាចក្រហមមានកីឡាកររូបនេះក្នុងក្រុម។
កម្រមានក្លិបមួយបានផ្លាស់ប្តូរយ៉ាងលឿននិងខ្លាំងដោយការមកដល់របស់មនុស្សម្នាក់ ប៉ុន្តែពិតណាស់! វាបានជះឥទ្ធិពលល្អដល់ក្រុម ហើយអ្នកគាំទ្រ United ឆ្ងល់ថាហេតុអ្វីបានជា United មិនទិញឲ្យបាននៅពេលចាប់ឆ្នើមរដូវកាល២០១៩/២០២០?។ Fernandes បានឈ្នះពានលក្ខណៈបុគ្គលជាច្រើនមកហើយចាប់តាំងពីមកដល់ Man Utd ។ ប៉ុន្តែទន្ទឹមនឹងវត្តមានរបស់គាត់នៅក្នុងក្របខ័ណ្ឌ Premier League តើអ្នកបានដឹងអំពីកីឡាករជម្រើសជាតិព័រទុយហ្គាល់រូបនេះច្បាស់ប៉ុណ្ណាដែរ? មែនហើយ! រឿងចំនួន ៣របស់ Bruno Fernandes ដែលអ្នកប្រហែលជាមិនបានដឹង។
៣-បុរសម្នាក់ដែលស្មោះរឿងស្នេហាបំផុត
Bruno Fernandes បានធ្វើឱ្យអ្នកគាំទ្ររំភើបជាមួយនឹងការសម្តែង ឬការបង្ហាញទម្រង់ដ៏អស្ចារ្យរបស់គាត់នៅលើទីលាន។ អ្នកគាំទ្រនៅ Old Trafford ជឿថាគ្មានអ្វីដែលបុរសនេះមិនអាចធ្វើបានទេ។ សម្រាប់ក្រៅទីលានគាត់មានមនោសញ្ចេតនាដ៏ល្អមួយ។ Bruno Fernandes បានជួប Ana Pinho នៅពេលពួកគេទាំងពីរមានអាយុ ១៦ ឆ្នាំនៅសាលារៀន។ Ana Pinho បន្តក្លាយជាមិត្តស្រីដំបូង និងតែមួយគត់របស់Bruno ហើយពេលនេះគាត់មានកូន២ជាចំណងដៃហើយ។
២) បានបញ្ចប់កិច្ចសន្យាមុនកំណត់របស់ខ្លួនជាមួយក្លិប Sporting Lisbon
Bruno Fernandes បានទាក់ទាញចំណាប់អារម្មណ៍របស់បិសាចក្រហមតាមរយៈការបង្ហាញទម្រង់លេងល្អរបស់គាត់នៅ Sporting Lisbon ។ គាត់រកបាន ១៦ គ្រាប់និងបញ្ជូនបាល់១២ លើកក្នុងរដូវកាលដំបូងនៅទីនោះ ហើយរកបាន ៣២ គ្រាប់និង Assist ១៨ គ្រាប់នៅរដូវកាលទី ២ ហើយបានឈ្នះពានកីឡាករឆ្នើមប្រចាំក្របខ័ណ្ឌ Primera Liga របស់ព័រទុយហ្គាល់ទាំងពីរ២ រដូវកាលរបស់គាត់ជាមួយក្លឹប Sporting។
ទោះយ៉ាងណា! បន្ទាប់ពីចំណាយពេល២រដូវកាលនៅក្លិបមួយនេះ កីឡាករជម្រើសជាតិ ព័រទុយហ្កាល់ បានលុបចោលកិច្ចសន្យារបស់គាត់ជាមួយក្លឹប បន្ទាប់ពីគាត់ និងមិត្តរួមក្រុមត្រូវទាស់ទែងគ្នាជាមួយអ្នកគាំទ្ររបស់ពួកគេ។ អ្នកគាំទ្រប្រហែល ៥០ នាក់បានវាយប្រហារទៅលើកីឡាករ និងបុគ្គលិក គ្រូបង្វឹក បន្ទាប់ពីក្លិបនេះមិនបានទទួលបានសិទ្ធិទៅចូលរួមក្នុងក្របខ័ណ្ឌ Champions League ។
ជាធម្មតាទេ! រឿងនេះបានធ្វើឱ្យគាត់ និងកីឡាករជាច្រើនទៀតរង្គោះរង្គើចិត្តជាមួយក្លិបរួមទាំងអ្នកគាំទ្រ។ កីឡាករល្អៗមួយគួរឱ្យកត់សម្គាល់មួយចំនួនដូចជា Rui Patricio (Wolves), William Carvalho (Real Betis) និង Gelson Martins (Atletico Madrid) បានចាកចេញពីក្លឹបហើយ Fernandes ជាកីឡាករចុងក្រោយគេ ក៏ព្យាយាមធ្វើតាមផងដែរ។ ទោះយ៉ាងណា! ការសម្រេចចិត្តរបស់ប្រធានក្លឹបលោក Bruno de Carvalho ក្នុងការដើរចេញពីជម្លោះ ជាលទ្ធផលបានបញ្ចុះបញ្ចូលខ្សែបម្រើរូបនេះ ផ្ទេរមកបិសាចក្រហមបានសម្រេចមុនផុតកុងត្រា។
១) ការគិតគូររបស់ Bruno Fernandes ជាមួយនឹងអាវលេខ ៨
Bruno Fernandes ពាក់អាវលេខ ៨ អំឡុងពេលគាត់នៅ Sporting និងថែមទាំងសាក់លេខ៨ នៅលើដៃស្តាំរបស់គាត់រួមជាមួយអក្សរក្រម F។ ឈ្មោះ 'F' តំណាងឱ្យត្រកូលរបស់គាត់ ខណៈពេលដែលលេខ ៨ គឺជាលេខតំណាងឲ្យដល់ឪពុករបស់គាត់ដែលធ្លាប់បាន ពាក់លេខ៨នេះ អំឡុងពេលគាត់លេងបាល់ មុនពេលចូលនិវត្តន៍ មករកស៊ីផ្គត់ផ្គង់គ្រួសារ។ Bruno Fernandes កើតនៅថ្ងៃទី ៨ ខែកញ្ញាឆ្នាំ ១៩៩៤ហើយលេខ៨នេះក៏តំណាងឲ្យឆ្នាំកំណើតនេះផងដែរ។
Fernandes ចូលចិត្តពាក់អាវលេខ៨។ ទោះយ៉ាងណាក៏ដោយ អាវលេខ៨បច្ចុប្បន្ននៅ Manchester United កាន់កាប់ដោយ Juan Mata។ ផ្ទុយទៅវិញ! កីឡាករព័រទុយហ្កាល់ពាក់លេខ ១៨ ដែលនៅទំនេរ បន្ទាប់ពីការចាកចេញរបស់ Asley Young ទៅ Inter Milan កាលពីខែមករាឆ្នាំ២០២០មក៕
ព័ត៌មានថ្មីៗ
