អាជីពជាកីឡាករបាល់ទាត់តែបេះដូងសប្បុរសធម៌របស់កីឡាករ ៨ រូបនេះ ពិតមិនអាចកាត់ថ្លៃបាន
វាមិនមែនជារឿងថ្មីនោះទេ ដែលកីឡាករបាល់ទាត់បានបង្ហាញចិត្តសប្បុរសធម៌របស់ខ្លួន ក្នុងការជួយអ្នកដទៃ ជាតួរយ៉ាងដូចជា Marcus Rashford, Mesut Ozil....ជាដើម។
ពិតណាស់! កីឡាករបាល់ទាត់ក្នុងពិភពលោកមានច្រើននាក់ណាស់ដែលមានចិត្តសប្បុរសធម៌ ចំណាយលុយប្រាក់ឈ្នួលរបស់ខ្លួនមកបង្វែរធ្វើជាមូលនីធិ ជួយជនក្រីក្រ កុមារ មន្ទីរពេទ្យ ជំរំភៀសខ្លួនដោយសារសង្គ្រាម និងគ្រោះមហន្តរ៉ាយធម្មជាតិជាដើម។ ខាងក្រោម KNONGSROK នឹងលើកយកកីឡាករ៨នាក់មកបរិយាយត្រួសៗអំពីកម្មវិធីសប្បុរសធម៌របស់ពួកគេ៖
1- Marcus Rashford
ជាអ្នកបង្កើតនិងផ្ដើមគំនិត រៃអង្គាសន៍លុយបាន២០លានផោនដើម្បីយកទៅទិញម្ហូបនិងប្រដាប់ប្រើប្រាស់ដល់កុមារអត់ឃ្លានជាង៣លាននាក់ដែលគ្មានផ្ទះសម្បែងរស់នៅ។ ចិត្តដ៏សប្បុរសធម៌នេះបានធ្វើឲ្យគាត់មានឈ្មោះល្បីបន្ថែមពីអាជីពកីឡាបាល់ទាត់ហើយកាលពីប៉ុន្មានថ្ងៃមុន គាត់ទទួលបានមេដាយកិត្តិយសពីមហាក្សត្រអង់គ្លេសលើសកម្មភាពសប្បុរធម៌របស់គាត់។
2- Mohamed Salah
ខ្សែប្រយុទ្ធ Liverpool រូបនេះបានសាងសង់មន្ទីរពេទ្យមួយក្នុងនៅក្នុងភូមិមួយក្នុងតំបន់ Nagrig ប្រទេសអេហ្ស៊ីប សាលារៀន មជ្ឈមណ្ឌលយុវជន អង្គភាពរថយន្តសង្គ្រោះបន្ទាន់ រោងចក្រប្រព្រឹត្តកម្មទឹក(រោងចក្របំឡេងទឹកស្អាត)មានតម្លៃ ៤៥០.០០០ ដុល្លារ និងបានផ្តល់ថវិកាចំនួន ២,៥ លានអឺរ៉ូដល់មជ្ឈមណ្ឌលកម្ចាត់មហារីកអេហ្ស៊ីបទៀតផង។
3-Didier Drogba
អតីតខ្សែប្រយុទ្ធក្លិប Chelsea រូបនេះគឺជាបុគ្គលម្នាក់ដែលបានចូលរួមបញ្ឈប់សង្គ្រាមស៊ីវិលក្នុងប្រទេសដែលអូសបន្លាយអស់ពេល៥ឆ្នាំនៅកូដឌីវ័រ សាងសង់មន្ទីរពេទ្យ៥កន្លែង ក្នុងប្រទេស និងចំណាយលុយរាប់លានដុល្លារជួយកុមារក្នុងទ្វីបអាហ្រ្វិក។
4-Mesut Ozil
អតីតកីឡាករជម្រើសជាតិអាល្លឺម៉ង់រូបនេះបានយកប្រាក់រង្វាន់របស់គាត់ដែលបានមកពីការឈ្នះពាន World Cup 2014 ទៅបរិច្ចាគដល់កុមារប្រេស៊ីល២៣នាក់ដែលត្រូវការវះកាតជាបន្ទាន់។ សហការជាមួយប្រពន្ធរបស់គាត់អ្នកស្រី Amine បានយកលុយចំណងដៃក្នុងថ្ងៃរៀបការទៅទិញម្ហូបចែកដល់មនុស្ស១ម៉ឺននាក់ដែលគ្មានផ្ទះនៅជំរំជនភៀសខ្លួន១៦កន្លែង។ លើសពីនេះគាត់ចំណាយលុយជួយកុមារ១ពាន់នាក់ដែលត្រូវការវះកាត់ឲ្យរស់រៀនមានជីវិតឡើងវិញ។
5-Sadio Mane
សាងសង់សាលារៀនមួយកន្លែងមានតម្លៃ២៧ម៉ឺនអឺរ៉ូ មន្ទីរពេទ្យមួយនិងកីឡដ្ឋានបាល់ទាត់មួយក្នុងភូមិរបស់គាត់នៅ Bambali ព្រមទាំងផ្ដល់ប្រាក់ប្រចាំខែ៧០ដុល្លារដល់ក្រុមគ្រួសារនានក្នុងភូមិរបស់គាត់និងចែកចាយសម្លៀកបំពាក់ដល់កុមារទាំងអស់។
6-Lionel Messi
មូលនិធិរបស់គាត់ផ្តល់ជំនួយ ព្រមទាំងអ្នកឧបត្ថម្ភដទៃទៀតដែលមានចំនួនសរុប ១០០ លានអឺរ៉ូក្នុងមួយឆ្នាំ ជួយប្រយុទ្ធប្រឆាំងនឹងជំងឺមហារីកកុមារក្នុងប្រទេសអាហ្សង់ទីន។
7-Kylian Mbappe
បរិច្ចាគប្រាក់រង្វាន់ឈ្នះពាន World Cup របស់គាតចំនួន៥៥ម៉ឺនដុល្លារជួយក្នុងចលនាសប្បុរសធម៌ទៅកាន់មន្ទីរពេទ្យផ្នែកកីឡាមួយ។
8-Cristiano Ronaldo
បរិច្ចាគប្រាក់៥៥០០០ផោនសម្រាប់ការវះកាត់ខួរក្បាល និងបរិច្ចាគលុយរង្វាន់ដែលបានមកពីការឈ្នះពានបុគ្គល UEFA Team of the Year បាន៨៩០០០ផោន លក់ស្បែកជើងមាសនៃពានរង្វាន់ European Golden Boot ដោយដាក់ដេញថ្លៃសម្រាប់សប្បុរសធម៌ រៃអង្គាសន៍បានលុយ១.២លានផោនសាងសង់សាលាក្នុងតំបន់ Gaza នៃជម្លោះប៉ាឡេស្ទីននិងអ៊ីស្រាអែល បរិច្ចាកលុយ៥លានផោនសម្រាប់ជួយជនរងគ្រោះក្នុងគ្រោះរញ្ជួយដីនៅនេប៉ាល់ បន្ទាប់ពីគ្រោះធម្មជាតិនេះបានសម្លាប់មនុស្ស៩០០០នាក់៕
រក្សាសិទ្ធិដោយ៖ ក្នុងស្រុក
ព័ត៌មានថ្មីៗ
