អត់ចប់ងាយៗទេ! អ៊ុយក្រែនកោសរូសឲ្យអ៊ីរ៉ង់ចេញមុខសុំទោសផ្លូវការ ហើយសងការខូចខាត
ប្រធានាធិបតីលោក Volodymyr Zelenskiy របស់ប្រទេសអ៊ុយក្រែនបាននិយាយនៅក្នុងសេចក្តីថ្លែងការណ៍នាថ្ងៃសោរ៍ ទី ១១ មករា ឆ្នាំ ២០២០ ឲ្យមានបើកការសើបអង្កេតទ្រង់ទ្រាយធំមួយនិងទទួលយកកំហុសជាមួយការសងសំណង ជុំវិញហេតុការណ៍នៃការបាញ់ម៊ីសីលទម្លាក់យន្តហោះ Boeing ផ្ទុកមនុស្ស ១៧៦ នាក់កាលពីពេលកន្លងទៅ។
ជាការពិតនៅព្រឹកថ្ងៃទី ១១ មករានេះ អ៊ីរ៉ង់បានចេញមុខសារភាពថាខ្លួនបានបង្កកំហុសដោយអចេតនា នៅការបាញ់ទម្លាក់យន្តហោះរបស់ប្រទេសអ៊ុយក្រែនមួយនោះ ប៉ុន្តែថាវាគ្រាន់ជាកំហុសអចេតនានិងគ្មានការប៉ុនប៉ងទុកជាមុនឡើយ។
យ៉ាងណាមិញប្រធានាធិបតីលោក Zelenskiy បានមានប្រសាសន៍ថា៖ "អ៊ីរ៉ង់បានសារភាពកំហុសចំពោះរឿងរ៉ាវធ្លាក់យន្តហោះអ៊ុយក្រែនហើយ ប៉ុន្តែយើងទទូចសុំឲ្យពួកគេទទួលយកទាំងស្រុងនូវទោសកំហុសដែលបានប្រព្រឹត្តិ"។
លោកបន្ថែមថា៖ "យើងរំពឹងថាអ៊ីរ៉ង់នឹងមានការបើកសើបអង្កេតពេញលេញនិងបើកចំហមួយ ហើយសងការខូចខាតគ្រប់បែបយ៉ាងសម្រាប់គ្រួសារនៃសព និងសំណងការខូចខាតផ្សេងទៀត ជាមួយការចេញមុខសុំទោសជាផ្លូវការតាមរយៈបណ្តាញការទូត"៕
ប្រភព៖ Reuters
ព័ត៌មានថ្មីៗ
