ធ្លាប់តែឃើញស្រុកគេមែនទេ? ពេលនេះអាងត្រីក្រោមទឹកដំបូងគេបង្អស់នៅស្រុកខ្មែរ នឹងបង្កើតឡើងនៅក្នុងខេត្តសៀមរាបហើយ
សៀមរាប៖ ពពួកអាងត្រីក្រោមទឹក ដែលផ្តល់ទស្សនីយភាពអស្ចារ្យប្លែក ប្រៀបបីដូចជាអ្នកទស្សនាស្ថិតនៅក្នុងមហាសមុទ្រពិតៗ មានភាពល្បីល្បាញមែនទែននៅប្រទេសជិតខាងយើង ដូចជាប្រទេសថៃ វៀតណាម និងសិង្ហបុរីជាដើម។ពេលនេះអស្ចារ្យណាស់ ប្រទេសកម្ពុជាយើងក៏កំពុងតែអភិវឌ្ឍន៍ និងដើរទាន់សម័យដូចជាប្រទេសជាតិខាងដែរហើយ មិនថាសំណង់អគារ ឬកន្លែងកម្សាន្តនោះទេ សូម្បីតែអាងចិញ្ចឹមត្រីក្រោមទឹក ក៏នឹងមានឆាប់ៗនៅក្នុងស្រុកខ្មែរយើងដែរ។
ថ្មីៗនេះ ខេត្តសៀមរាបកំពុងតែគ្រោងសាងសង់អាងទឹកចិញ្ចឹមត្រីដ៏ធំ និងប្រណីតជាងគេមួយ ដែលមានគម្រោងវិនិយោគតម្លៃដល់ទៅ ៧០លានដុល្លាឯណោះ ស្ថិតលើដីទំហំ ១០០ហិចតា ហើយគ្រោងនឹងបើកការដ្ឋាននៅក្នុងខែមិនា ឆ្នាំ ២០១៩ ខាងមុខនេះទៀតផង។
គួរឱ្យដឹងផងដែរថា ការសាងសង់អាងទឹកមួយនេះមានការសហការវិនិយោគពីកម្ពុជា និងប្រទេសជប៉ុន ដោយសាងសង់ជាទឹកសាបផង និងទឹកប្រៃផង ថែមទាំងប្រមូលមច្ឆជាតិកម្រៗមកចិញ្ចឹម និងតាំងបង្ហាញផងដែរ។ ការសាងសង់អាងចិញ្ចឹមត្រីមួយនេះ ត្រូវបានគេដឹងថាអាចនឹងស្រូបយកចំនួនភ្ញៀវទេសចរទាំងក្នុង និងក្រៅប្រទេសឱ្យមកកម្សាន្តកាន់តែច្រើនទៅៗ ព្រោះតែក្រៅពីសំណង់ប្រាសាទដ៏ពិចិត្រ ខេត្តសៀមរាបមិនខ្វះកន្លែងកម្សាន្តបង្អួតអ្នកទេសចរនោះឡើយ៕
អត្ថបទ៖ ក្នុងស្រុក
សម្គាល់៖ នេះគ្រាន់តែជារូបតំណាងអាងទឹកនៅបរទេសតែប៉ុណ្ណោះ!
ព័ត៌មានថ្មីៗ
