កាន់តែស្និទ្ធិ រឹតតែត្រូវយកចិត្តទុកដាក់ ចំពោះរឿងទាំង ៣ យ៉ាងនេះ
នៅក្នុងទំនាក់ទំនង អ្នកខ្លះគិតថា ស្និទ្ធហើយ ស្គាល់ចិត្តថ្លើមគ្នាច្បាស់ មិនបាច់ត្រូវខ្វល់គិតច្រើនទេ ពេលទៅលេងផ្ទះមនុស្សស្គាល់ស្និទ្ធស្នាលម្ដងៗ ច្រើនតែមើលរំលងលើរឿងតូចតាច។ តែយ៉ាងណាមិញ មនុស្សកាន់តែស្និទ្ធរឹតតែត្រូវគិត និងខ្វាយខ្វល់ យកចិត្តទុកដាក់ ជាពិសេសរឿងទាំង ៣ យ៉ាងនេះ កុំប្រហែសឱ្យសោះ។
១. ទៅលេងដោយមិនបានប្រាប់ម្ចាស់ផ្ទះជាមុន
នេះគឺមានសារៈសំខាន់ខ្លាំងណាស់។ នៅពេលអ្នកទៅលេងផ្ទះនរណាម្នាក់ដោយមិនប្រាប់ម្ចាស់ផ្ទះគេជាមុន វាមិនធ្វើឱ្យពួកគេសប្បាយចិត្តទេ ផ្ទុយទៅវិញ អាចនឹងធ្វើឱ្យពួកគេកើតអារម្មណ៍តានតឹង និងមិនពេញចិត្ត។ ជាក់ស្ដែងណាស់ថា ពេលអ្នកទៅដល់ អាចនឹងរំខានដល់គម្រោង ឬផែនការរបស់គេដែលគេត្រូវចេញក្រៅ ឬមានធុរៈ ដូច្នេះនៅពេលដែលអ្នកទៅដល់ ពួកគេពិតជាមិនទាន់ត្រៀមខ្លួនទទួលភ្ញៀវ ឬអាហារសម្រាប់ទទួលអ្នក។
ដូច្នេះហើយ វាអាចនឹងធ្វើឱ្យប៉ះពាល់ដល់អារម្មណ៍របស់ម្ចាស់ផ្ទះ ឬធ្វើឱ្យពួកគេមានការមិនពេញចិត្តជាខ្លាំងចំពោះវត្តមានរបស់អ្នកដែលលេចមុខឡើង ដោយមិនបានប្រាប់គេដែលជាម្ចាស់ផ្ទះឱ្យបានដឹងជាមុន។
២. កុំភ្លេចយកអំណោយ កុំទៅដោយដៃទទេ
អ្នកខ្លះគិតថាទំនាក់ទំនងគ្រួសាររវាងភាគីទាំងសងខាងល្អខ្លាំងណាស់ ដូច្នេះរាល់ពេលមកលេងផ្ទះម្តងៗ មិនដែលយកអំណោយអ្វីមកជូនឡើយ។ ប៉ុន្តែនោះមិនមែនជារឿងដែលល្អនោះទេ។
ពេលទៅលេងផ្ទះអ្នកដទៃ ពេលទៅដោយដៃទទេ ហើយនិយាយថាអរគុណសម្រាប់បាយបែបនេះ ធ្វើឱ្យអ្នកមិនគោរពម្ចាស់ផ្ទះទៀតផង។ មិនថាការដើរទិញឥវ៉ាន់ដើម្បីចម្អិនម្ហូប ការសម្អាតរបស់ដែលនៅសេសសល់ក្រោយពិធីជប់លៀង ឬសម្អាតផ្ទះបាយនោះទេ ម្ចាស់ផ្ទះត្រូវធ្វើការងារច្រើនណាស់ បន្ទាប់ពីអ្នកបានចាកចេញ។
អំណោយមួយមិនថាតូច ឬធំនោះទេ គឺជាបង្ហាញពីការយកចិត្តទុកដាក់របស់អ្នកចំពោះម្ចាស់ផ្ទះ ធ្វើឱ្យពួកគេមានអារម្មណ៍គោរពអ្នក។ ចូរចាំថា មិនថាទំនាក់ទំនងល្អយ៉ាងណានោះទេ នៅពេលដែលអ្នកទៅលេងផ្ទះនរណាម្នាក់ អ្នកត្រូវតែមានអំណោយជាប់នឹងដៃទៅជាមួយ កុំទៅដោយដៃទទេរឱ្យសោះ។
៣. យកចិត្តទុកដាក់លើអារម្មណ៍នៃតុល្យភាព កុំចូលទៅក្នុងជីវិតឯកជនរបស់ម្ចាស់ផ្ទះ
មានព័ត៌មានលម្អិតជាច្រើនដែលមនុស្សជាច្រើនមើលរំលង នោះគឺការមិនយកចិត្តទុកដាក់លើអារម្មណ៍ និងតុល្យភាព។ កុំល្ងង់ទៅសួរអំពីភាពឯកជនរបស់អ្នកដទៃតាមតែអំពើចិត្ត។ មនុស្សជាច្រើនគិតថាវាជារឿងធម្មតាទេក្នុងការសួរសំណួរមួយចំនួន ក្នុងអំឡុងពេលទទួលទានអាហារជុំគ្នា។ ប៉ុន្តែ លុះត្រាតែម្ចាស់ផ្ទះចែករំលែកយ៉ាងសកម្ម ទើបអ្នកអាចជជែក និងនិយាយជាមួយគេបាន។
នៅពេលអ្នកទៅផ្ទះនរណាម្នាក់ ប្រធានបទជុំវិញពួកគេត្រូវតែចែករំលែកជាមុនសិន។ តែយ៉ាងណាក៏ដោយ បើទោះជាម្ចាស់គេបង្ហើប បង្ហាញក៏ពិតមែន ក៏យើងមិនគួរជីកឫសជីកគល់ ចាក់ជ្រៅទៅក្នុងរឿងជីវិតឯកជនគេនោះដែរ៕
ប្រភព ៖ បរទេស / Knongsrok
ព័ត៌មានថ្មីៗ
