បាល់ទាត់អាស៊ាន៖ គ្រូបង្វឹកសញ្ជាតិជប៉ុនម្នាក់ទៀតឡើងកាន់តំណែងជាគ្រូបង្វឹកក្លិប PT Prachuap ក្នុងលីគកំពូលថៃ
លោក Masami Taki ត្រូវបានតែងតាំងជាគ្រូបង្វឹកនៃក្រុមបាល់ទាត់ PT Prachuap ដែលជាក្រុមមួយរបស់លីគកំពូលថៃ Thai League 1 នេះបើតាមការប្រកាសរបស់ក្លិបកាលពីម្សិលមិញ។
ប្រភពដដែលបញ្ជាក់ថា គ្រូបង្វឹកសញ្ជាតិជប៉ុនរូបនេះចុះកុងត្រារយពេលមួយឆ្នាំខណៈដែលកុងត្រាចាស់របស់គាត់ជាមួយក្លិបធ្លាក់ទៅលីគទី២ Rayong FC ក្រោយបញ្ចប់រដូវកាល២០២០/២០២១ នឹងផុតកំណត់នៅថ្ងៃអាទិត្យចុងសប្ដាហ៍នេះហើយនោះ។ Taki មានវ័យ៤៨ឆ្នាំឡើងមកជំនួសអតីតកីឡាករជម្រើសជាតិថៃលោក Thawatchai Dumrong-ongtrakulដែលបានចាកចេញក្រោយដឹកនាំ Prachuap មិនជោគជ័យតាមការចង់បានរបស់ក្លិប។
និយាយឲ្យខ្លីកាលពីរដូវកាលមុនក្លិបមានមូលដ្ឋានក្នុងខេត្ត Prachuap Khiri Khan មួយនេះបញ្ចប់ចំណាត់ថ្នាក់លេខ១០ក្នុងចំណោម១៦ក្លិបដែលប្រកួតប្រជែងក្នុងលីគកំពូលថៃ។ អ្នកចាត់ការទូទៅរបស់ក្លិបមួយនេះនិយាយក្នុងវេបសាយផ្លូវការថា៖
"យើងជឿជាក់លើបទពិសោធន៍ និងជំនាញរបស់ Masami Taki ។ គាត់បានធ្វើការជាមួយក្លឹបជាច្រើននៅក្នុងប្រទេសថៃ។ ការងារសំខាន់របស់គាត់គឺជួយធ្វើឱ្យយើងកាន់តែរឹងមាំ”។
គាត់មានបទពិសោធន៍ដឹកនាំក្លិបមួយចំនួនក្នុងប្រទេសថៃដូចជា Thai Honda, Pattaya United និង Chiang Rai United។ គាត់បានមកដឹកនាំក្លិប Rayong កាលពីឆ្នាំមុនពោលគឺជើងទី២ទៅហើយតែគាសត់មិនអាចជួយឲ្យក្លិបមួយនេះបន្តដង្ហើមក្នុងលីគកំពូលបានទេ។ ចំណែក Prachuapវិញ នេះគឺជាលើកដំបូងហើយដែលតែងតាំងគ្រូបង្វឹកសញ្ជាតិបរទេសបើគិតតាំងពីឆ្នាំ២០០៧៕
រក្សាសិទ្ធិដោយ៖ ក្នុងស្រុក
អំពីអ្នកសរសេររបស់យើង៖ PECH PHEARUN
Tel:
ព័ត៌មានថ្មីៗ
