វេជ្ជបណ្ឌិត គួច ម៉េងលី ប្រាប់មូលហេតុដល់អ្នកធាត់សម្រកទម្ងន់មិនព្រមស្រក!!!
ជាទូទៅមនុស្សតែងចង់បានរាងស្រស់ស្អាតខុសពីធម្មជាតិរបស់ខ្លួន។ អ្នកខ្លះស្គមចង់បានធាត់ ហើយអ្នកខ្លះធាត់ចង់បានស្គម។ ដើម្បីសម្រេចការណ៍នេះ ពួកគេតែងតែរិះរកវិធីសាស្ត្រដំឡើងទម្ងន់ ឬសម្រកទៅតាមការចង់បានរបស់ខ្លួន។ លើសពីនេះ អ្នកខ្លះធាត់ដែលមានក្បាលពោះជ្រុលមិនពេញចិត្តក៏ខំប្រឹងសម្រករាង ដោយអ្នកខ្លះក៏បានទទួលជោគជ័យ តែអ្នកខ្លះក៏មិនបានសមក្ដីប្រាថ្នារបស់ខ្លួន។
តើបណ្ដាលមកពីមូលហេតុអ្វីបានជាសម្រកមិនស្រក ហើយបែរជាកាន់តែធាត់ទៅវិញ?
ជុំវិញនឹងករណីនេះ លោកឧកញ៉ា វេជ្ជបណ្ឌិត គួច ម៉េងលី ដែលជាវេជ្ជបណ្ឌិតជំនាញវេជ្ជសាស្រ្តទូទៅ និងជាអ្នកឯកទេសផ្នែកសុខភាពសាធារណៈផងនោះ បានប្រាប់ថា ការសម្រកទម្ងន់មិនស្រក ឬសម្រកស្រកមួយរយៈបែរជាឡើងទម្ងន់ កាន់តែធាត់ និងកាន់តែដុះក្បាលពោះជាងមុន គឺមានកត្តាជាច្រើនរួមផ្សំគ្នា ដែលភាគច្រើនគេមិនសូវបានដឹង។ លោកឧកញ៉ា វេជ្ជបណ្ឌិត គួច ម៉េងលី បានមានប្រសាសន៍ពន្យល់ពីហេតុផលជាចំណុចៗដូចខាងក្រោម៖
១. ទម្លាប់ញ៉ាំទឹកមិនគ្រប់គ្រាន់
ទឹក ជាថាមពលជំនួយដល់ប្រព័ន្ធកោសិការបស់មនុស្សឱ្យដំណើរការបានល្អ ហើយថែមទាំងជួយបំផ្លាញកាឡូរីដែលសល់ពីអាហារ ប៉ុន្តែកាលណាកាឡូរីសល់ច្រើននឹងបង្កទៅជាខ្លាញ់ដែលបណ្ដាលឱ្យឡើងធាត់លើសទម្ងន់។ លោកវេជ្ជបណ្ឌិត គួច ម៉េងលី លើកឡើងថា ទឹកពិតជាមានសារៈសំខាន់ខ្លាំងណាស់ចំពោះសុខភាព ព្រោះរាល់ការទទួលទានទឹកបានគ្រប់គ្រាន់ ជាទូទៅចន្លោះពីពីរលីត្រទៅបីលីត្រ ឬដប់ទៅដប់ពីរកែវក្នុងមួយថ្ងៃ។
ការទទួលទានទឹកបែបនេះធ្វើឱ្យសុខភាពល្អនិងស្រកទម្ងន់។ ដូច្នេះយើងគប្បីគួរពិសាទឹកមួយកែវមុនបរិភោគអាហារ និងមួយកែវទៀតក្រោយបរិភាគអាហារជិតឆ្អែត ដើម្បីកុំឱ្យក្រពះពេញឆ្អែតហល់ពេក។
២. ទម្លាប់ញ៉ាំអាហារមិនទៀងពេល
ដោយអ្នកខ្លះមមាញឹកនឹងការងារពេកមិនអាចទទួលទានអាហារបានទៀងទាត់ឡើយ។ ក្នុងនោះមានអ្នកខ្លះត្រូវពន្យារពេលរហូតហួសពេលញ៉ាំក៏មាន។ អ្នកជំនាញអះអាងថា ដោយសារតែការរវល់នឹងការងារខ្លាំងពេក អ្នកខ្លះជួនក៏ពន្យារពេលទទួលទានអាហារពេលព្រឹករហូតដល់ម៉ោង១០ សម្រាប់អាហារថ្ងៃត្រង់អ្នកខ្លះពន្យាររហូតដល់ម៉ោង២ និងអ្នកខ្លះទៀតពន្យារដល់ម៉ោង៣រសៀលក៏មាន។
ការណ៍នេះធ្វើឱ្យមនុស្សឃ្លានខ្លាំង ហើយញ៉ាំច្រើនតាមឃ្លានតែម្ដង គឺញ៉ាំរហូតដល់ឆ្អែតជ្រុល។ លោកឧកញ៉ា វេជ្ជបណ្ឌិត គួច ម៉េងលី សង្កត់ធ្ងន់ថា នៅពេលទទួលទានអាហារមិនទៀងពេលបែបនេះ គឺធ្វើឱ្យក្រពះមិនស៊ាំនឹងការកិនអាហារ (ប្រព័ន្ធរំលាយអាហារមិនស៊ាំ) ហើយបើមិនចង់មានបញ្ហាដូចខាងលើនេះ ត្រូវទទួលទានអាហារឱ្យបានទៀងទាត់ និងត្រឹមត្រូវតាមពេលវេលានៃការញ៉ាំ។
៣. ការញ៉ាំអាហារនៅខាងក្រៅ
ការទទួលទានអាហារនៅក្រៅផ្ទះដោយមិនព្រមធ្វើឬចម្អិនអាហារញ៉ាំដោយខ្លួនឯង ដែលជាទូទៅម្ហូបអាហារទាំងនោះគេធ្វើលឿន ជាពិសេសអាហារដាក់លក់នៅតាមចិញ្ចើមផ្លូវ ហើយភាគច្រើនជាប្រភេទអាហារសម្បូរជាតិខ្លាញ់ ប្រៃ និងផ្អែមជ្រុលដែលធ្វើឱ្យមានបញ្ហាដល់សុខភាព។
ត្រង់ចំណុចនេះ លោកវេជ្ជបណ្ឌិត គួច ម៉េងលី បញ្ជាក់ថា រាល់ការញ៉ាំអាហារសម្បូរជាតិខ្លាញ់ ប្រៃ និងផ្អែមជ្រុល គឺធ្វើឱ្យរាងកាយឡើងគីឡូលឿនបំផុត ប៉ុន្តែបើអាហារដែលមានអនាម័យល្អដែលធ្វើដោយខ្លួនឯង ភាគច្រើនមិនសូវមានខ្លាញ់ច្រើន មិនប្រៃពេក និងមិនផ្អែមពេក។ អាហារបែបនេះធ្វើឱ្យសុខភាពរបស់យើងល្អ មិនងាយចាស់ មិនឆាប់ជ្រួញ មិនរាគរូស មិនឈឺពោះបន្ទាប់ញ៉ាំហើយ ជាពិសេសមិនងាយធាត់លើសទម្ងន់ និងមិនងាយឡើងសម្ពាធឈាម។
៤. ការញ៉ាំម្ហូបអាហារប្រភេទចម្រាញ់
ការទទួលទានអាហារចម្រាញ់ ដែលជាអាហារបំប្លែងពីរបស់ដើម ឬលែងជារបស់ដើម បូករួមនឹងការទទួលទានអាហារដែលមានគ្រឿងផ្សំច្រើនមុខចម្រុះគ្នាពេក គឺជាមូលហេតុមួយទៀតធ្វើឱ្យមនុស្សកើតជំងឺឡើងធាត់លើសទម្ងន់។ ដើម្បីចៀសវាងការណ៍នេះ លោកឧកញ៉ា វេជ្ជបណ្ឌិត គួច ម៉េងលី លើកទឹកចិត្តឱ្យញ៉ាំអាហារប្រភេទនេះក្នុងកម្រិតតិចបំផុតដែលអាចធ្វើទៅបាន។
៥. ការអង្គុយត្រាំត្រែងធ្វើការនឹងមួយកន្លែង
អ្នកជំនាញផ្នែកវេជ្ជសាស្ត្រទូទៅសង្កត់ធ្ងន់ថា អ្នកដែលធ្វើការងារដោយការអង្គុយច្រើននិងយូរពេក ដូចជាបុគ្គលិកធ្វើការនៅក្នុងការិយាល័យនិងការងារក្នុងរោងចក្រដែលគ្មានចលនាជាដើម។ ការអសកម្មចលនាច្រើនម៉ោងពេកបានបង្កឱ្យពួកគាត់ឆាប់ឡើងទម្ងន់។ លោកវេជ្ជបណ្ឌិត គួច ម៉េងលី បន្តថា ការអង្គុយធ្វើការបែបនេះ ទោះចង់ឬមិនចង់ ក៏គង់តែដុះក្បាលពោះ និងឡើងទម្ងន់ដែរ។
៦. ការប៉ះប៉ូវខ្លួនឯង
អ្នកខ្លះបង្អត់អាហារខ្លួនឯងពីរទៅបីថ្ងៃ និងអ្នកខ្លះខិតខំហាត់ប្រាណដើម្បីសម្រកទម្ងន់ ប៉ុន្តែពេលពួកគេភ្លេចខ្លួនបែរជាញ៉ាំច្រើនអស់ទាំងចានៗ ព្រោះរាល់ការញ៉ាំប៉ះប៉ូវដោយភ្លេចខ្លួនបែបនេះ គឺផ្ដល់ផលអាក្រក់ និងហានិភ័យនៃការឡើងធាត់កាន់តែលើសដើម។
៧. ការញ៉ាំសារធាតុអាលកុលច្រើនជ្រុល
ការញ៉ាំជាតិអាកុលច្រើន មិនថាឡេហ្គឺ (Lager) ប៊ីយែរ ស្រាស ឬស្រាក្រហមនោះទេ ពោលឱ្យតែអាកុល គឺមានជាតិខ្លាញ់ច្រើន ហើយថែមទាំងប៊ឺតយកជាតិទឹកទៀតផង។ អ៊ីចឹងហើយបានជាអ្នកញ៉ាំស្រាភាគច្រើន គឺឧស្សាហ៍បត់ជើងតូចញឹកញាប់។ លោកវេជ្ជបណ្ឌិត គួច ម៉េងលី អះអាងថា រាល់ការបត់ជើងតូចញឹកញាប់ គឺធ្វើឱ្យក្នុងខ្លួនខ្វះជាតិទឹកក្នុងប្រតិបត្តិការរំលាយអាហារ ព្រោះថាស្រា គឺសម្បូរទៅដោយកាបូអ៊ីដ្រាត (Carbohydrates) ដែលជាជាតិផ្ទុកទៅដោយខ្លាញ់។
៨. ការញ៉ាំអាហារនៅយប់ជ្រៅពេក
ការហូបអាហារយប់ពេក ជាពេលវេលាមួយដែលធ្វើឱ្យឆាប់ឡើងធាត់លើសទម្ងន់ ព្រោះជាទូទៅរាល់ពេលហូបរួចហើយ គឺងងុយគេងក៏ចូលគេងបាត់ ដោយមិនបានបញ្ចេញចលនា។ នេះជាមូលហេតុធ្វើឱ្យឡើងធាត់លើសទម្ងន់ ដូច្នេះគួរចៀសវាងការញ៉ាំអាហារនៅពេលយប់ជ្រៅពេក។
៩. ការមិនធ្វើលំហាត់ប្រាណ
ការមិនធ្វើលំហាត់ប្រាណ គឺជាមូលហេតុចម្បងមួយធ្វើឱ្យធាត់ជ្រុលផងដែរ។ អ្នកដែលមិនធ្វើលំហាត់ប្រាណ ហើយញ៉ាំអាហារឥតប្រយោជន៍ច្រើន ដូចជាដំឡូចៀន ហាំប៊័រហ្គឺ ទឹកស្ករក្រឡុកជាដើមនោះ ប្រាកដជាឡើងធាត់ជ្រុលមិនខាន។ លោកវេជ្ជបណ្ឌិត គួច ម៉េងលី បញ្ជាក់ថា នៅពេលហាត់ប្រាណជាប្រចាំ គឺជួយទ្រទ្រង់សុខភាពយើងបានច្រើន ដូចជាជំនួយដល់ចង្វាក់បេះដូង សរសៃឈាម និងការពារឡើងធាត់លើសទម្ងន់ជាដើម។
១០. ការមិនញ៉ាំអាហារពេលព្រឹក
ការមិនញ៉ាំអាហារពេលព្រឹក ជាបញ្ហាមួយធ្វើឱ្យមនុស្សធាត់និងឡើងទម្ងន់ជ្រុលមួយដែរ ព្រោះរាល់ពេលមិនញ៉ាំអាហារពេលព្រឹក គឺធ្វើឱ្យមនុស្សគ្មានកម្លាំងកំហែងធ្វើការ ឬរៀនសូត្រមិនចូល ហើយក៏ធ្វើឱ្យមនុស្សងងុយគេងផងដែរ។ ការពន្យារឬមិនញ៉ាំអាហារពេលព្រឹករង់ចាំដល់ម៉ោងបាយថ្ងៃត្រង់ គឺធ្វើឱ្យមនុស្សឃ្លានខ្លាំង ហើយពេលញ៉ាំ គឺសម្រុកញ៉ាំច្រើនក្នុងល្បឿនលឿនទៅតាមការស្រេកឃ្លានរបស់ខ្លួនថែមទៀត។
ដូច្នេះបញ្ហាទាំងនេះ លោកវេជ្ជបណ្ឌិត គួច ម៉េងលី ណែនាំថា ដល់ពេលញ៉ាំត្រូវតែញ៉ាំ គឺញ៉ាំឱ្យទៀងពេលវេលា និងឆ្អែតល្មមៗកុំឱ្យឆ្អែតខ្លាំងពេក ជាពិសេសពេលញ៉ាំបាយគួរផឹកទឹកមួយកែវជាមុនសិន ហើយនៅពេលញ៉ាំជិតឆ្អែតគួរផឹកទឹកមួយកែវទៀត ដើម្បីបំពេញក្រពះយើងឱ្យឆ្អែតល្មម។
ក្រៅពីចំណុចខាងលើនេះ លោកឧកញ៉ា វេជ្ជបណ្ឌិត គួច ម៉េងលី បានបញ្ជាក់បន្ថែមថា នៅមានកត្តាមួយទៀត ក៏ជាកត្តាបណ្ដាលឱ្យធាត់ផងដែរ។ អ្នកខ្លះអាចបណ្ដាលមកពីការកើតជំងឺឃ្លាន ដែលភាសាបច្ចេកទេសគេហៅថា Bulimia ។ Bulimia ជាជំងឺម្យ៉ាងដែលធ្វើឱ្យមនុស្សឃ្លានញ៉ាំៗខ្លាំង ហើយការញ៉ាំទាល់តែហួសបរិមាណរហូតភើច្រាល់ចេញមកវិញក៏មាន។ អ្នកជំនាញបន្តថា ជំងឺនេះ គឺធ្វើឱ្យអាស៊ីតកើតមានឡើង រលាកបំពង់ក និងមានបញ្ហាផ្លូវចិត្ត ជាពិសេសអរម៉ូនស្ត្រីមិនដំណើរការល្អ។
បន្ទាប់ពីជំងឺ Bulimia អ្នកជំនាញផ្នែកវេជ្ជសាស្ត្រទូទៅដដែលពន្យល់ដោយលើកពីជំងឺ Binge-eating disorder ដែលជាជំងឺម្យ៉ាងដែលញ៉ាំអាហារដើម្បីបំពេញតាមចំណង់ ឬបំពេញទៅតាមអារម្មណ៍របស់ខ្លួន និងដើម្បីកុំឱ្យអផ្សុក។ លោកវេជ្ជបណ្ឌិត គួច ម៉េងលី បន្តថា អ្នកខ្លះឡើងធាត់លើសទម្ងន់ខ្លាំងដោយសារមានជំងឺគេងមិនស្ងប់ (Sleep apnea) ដែលបណ្ដាលមកពីការស្ទះបំពង់ក។ មូលហេតុដែលនាំឱ្យស្ទះបំពង់ក គឺបណ្ដាលមកពីខ្លាញ់អណ្ដាតធ្លាក់ចូលក្នុងបំពង់កកំលុងពេលគេងលក់។ ដូច្នេះពេលអ្នកមានជំងឺនេះគេងកំពុងលក់ ហើយស្ទះដង្ហើមម្ដងៗ គឺតែងតែក្រោក ឬភ្ញាក់ឡើង ដែលជាមូលហេតុបណ្ដាលឱ្យគាត់គេងមិនស្ងប់។
ក្រៅពីជំងឺគេងមិនស្ងប់ លោកវេជ្ជបណ្ឌិត គួច ម៉េងលី បន្ថែមថា អ្នកខ្លះឡើងធាត់ជ្រុល គឺបណ្ដាលមកពីគាត់មានរោគទាក់ទងនឹងជំងឺ Autoimmune ដែល Thyroid របស់គាត់មិនដំណើរការ ហើយអរម៉ូនមានការថមថយចុះ ដែលធ្វើឱ្យប្រព័ន្ធប្រតិបត្តិការសរីរាង្គមិនដំណើរការ។
ដូច្នេះហើយបានជាគាត់ឡើងធាត់លើសទម្ងន់ ហើយមិនសូវមានកម្លាំង ងងុយគេង ស្ទក់ៗទុយមុយ បែបគេហៅថា Hyporthyroidism ហើយ Hyporthyroidism នេះគឺជាជំងឺអរម៉ូនមិនត្រឹមត្រូវ។ មួយទៀត គឺការឡើងធាត់ចំពោះស្ត្រីដែលមានជំងឺ PCOS។ ជំងឺនេះធ្វើឱ្យឈាមរដូវរបស់ស្ត្រីធ្លាក់មិនទៀងទាត់ ដោយសារតែគីសអរម៉ូនកឡើងរហូតធ្វើឱ្យឈាមរដូវអាក់មកមិនទៀងពេល។
ដូច្នេះហើយបានជាស្ត្រីភាគច្រើនឡើងធាត់ និងកើតមុនលើមុខច្រើន។ ផ្ទុយទៅវិញ ស្ត្រីជិតអស់រដូវក៏ឡើងធាត់ផងដែរ។ ការឡើងធាត់នេះ ដោយសារតែបម្រែបម្រួលអរម៉ូនរបស់គាត់។ រីឯការកើតស្ដ្រេសស្មុគស្មាញខ្លាំងពេក ក៏ជាមូលហេតុមួយបណ្ដាលឱ្យកើតជំងឺឡើងធាត់ផងដែរ។ ការឡើងធាត់នេះ ដោយសារតែគាត់នៅផ្ទះមិនចង់ជួបអ្នកណា កាលនៅក្នុងផ្ទះអង្គុយមើលទូរទស្សន៍ញ៉ាំច្រើនបានជាធ្វើឱ្យគាត់ឡើងធាត់។
នៅមានទៀតទាក់ទងនឹងជំងឺដែលបណ្ដាលឱ្យឡើងធាត់ លោកវេជ្ជបណ្ឌិត គួច ម៉េងលី មានប្រសាសន៍ថា សូម្បីតែអ្នកញ៉ាំថ្នាំបញ្ហាផ្លូវចិត្ត ថ្នាំជំងឺទឹកនោមផ្អែម និងថ្នាំឡើងឈាមសុទ្ធតែធ្វើឱ្យអ្នកជំងឺឡើងធាត់។ ចំណែកស្ត្រីពេលមានផ្ទៃពោះ ក៏ធ្វើឱ្យឡើងធាត់ផងដែរ ប៉ុន្តែជាការឡើងធាត់ធម្មតានៃធម្មជាតិអ្នកមានផ្ទៃពោះ។ ជាមធ្យមភាគ គាត់ឡើងគីឡូចន្លោះពី១១ ទៅ១៥គីឡូតែប៉ុណ្ណោះ៕ ប្រភព៖ www.interconrooster.com
ព័ត៌មានថ្មីៗ
