ឧកញ៉ា គួច ម៉េងលី៖ ប្រាក់កាសមិនមែនអ្វីគ្រប់យ៉ាងសម្រាប់កូនៗនោះទេ!
ស្របពេលដែលបច្ចេកវិទ្យាកាន់តែរីកចម្រើនជឿនលឿន ឪពុកម្តាយមានទំនោរមួយដោយភ្លេចគិតថា ប្រាក់កាសមិនមែនអ្វីគ្រប់យ៉ាងសម្រាប់ណែនាំនិងផ្គត់ផ្គង់កូនពួកគាត់នោះទេ។ នេះបើយោងតាមលោកឧកញ៉ា វេជ្ជបណ្ឌិត គួច ម៉េងលី លើកឡើងក្នុងបទសម្ភាសជាមួយនឹងអ្នកសារព័ត៌មាន កាលពីពេលថ្មីៗនេះ។
មានកេរ្តិ៍ឈ្មោះល្បីល្បាញក្នុងវិស័យអប់រំ វេជ្ជសាស្ត្រ អាជីវកម្ម និងកិច្ចការជួយដល់សហគមន៍ លោកឧកញ៉ា វេជ្ជបណ្ឌិត គួច ម៉េងលី បានកត់សម្គាល់ឃើញថា ឪពុកម្ដាយខ្មែរភាគច្រើនភ្លេចពីសារៈសំខាន់ តួនាទី គុណតម្លៃនៃឧត្ដមភាពគ្រួសារ និងភាពជាឪពុកម្ដាយក្នុងដំណើរស្វែងរកប្រាក់កាស។
«ខ្ញុំលើកទឹកចិត្តឪពុកម្តាយ សូមមេត្តាចូលរួមជាផ្នែកមួយនៃការសិក្សារៀនសូត្រ ដើម្បីការរីកចម្រើនរបស់កូន។ វាពិតជាមានសារៈសំខាន់ខ្លាំងណាស់សម្រាប់ដំណើរអភិវឌ្ឍរបស់ក្មេង។ សម្រាប់ក្មេងមិនត្រូវការប្រាក់កាសទេ។ អ្វីដែលពួកគេត្រូវការ គឺវត្តមាន ការផ្គត់ផ្គង់ សេចក្តីស្រឡាញ់ និងការមើលថែទាំពីឪពុកម្ដាយ។» លោកឧកញ៉ា វេជ្ជបណ្ឌិត គួច ម៉េងលី មានប្រសាសន៍បន្តយ៉ាងដូច្នេះ។
យោងតាមប្រសាសន៍លោកឧកញ៉ា ឪពុកម្តាយភាគច្រើននៅកម្ពុជាមានគំនិតថា ដរាបណាឪពុកម្តាយផ្តល់និងមើលថែកូនដោយផ្គត់ផ្គង់ប្រាក់កាស មានន័យថា ពួកគាត់បានធ្វើអ្វីគ្រប់យ៉ាងសម្រាប់កូនពួកគាត់ហើយ ចំណែកឯសាលារៀនវិញត្រូវបានដោះស្រាយតម្រូវការចាំបាច់ផ្សេងទៀតទាំងអស់ បូករួមទាំងការអប់រំផងដែរ។
ដោយសង្កត់ធ្ងន់លើសិស្សានុសិស្សដែលកំពុងរៀននៅថ្នាក់ទី៦ និងថ្នាក់ទី៧ លោកឧកញ៉ា វេជ្ជបណ្ឌិត គួច ម៉េងលី អះអាងថា វាជាអន្តរការដ៏សំខាន់មួយ ដែលពួកគេត្រូវការផ្លាស់ប្ដូរទៅវ័យជំទង់ និងវ័យគ្រប់ការ ជាការវិវឌ្ឍធម្មតាមួយដែលយុវជនទាំងអស់សុទ្ធតែបានឆ្លងកាត់។
«នោះជាពេលដែលកូនអ្នកចាប់ផ្ដើមមិនចូលចិត្តអ្នកទៀតទេ គឺពួកគេនឹងចងចាំថា អ្នកជាប់រវល់ខ្លាំងនឹងការរកប្រាក់កាស ហើយមានពេលវេលាតិចតួចសម្រាប់ពួកគេ។ ពួកគេចាប់ផ្ដើមឃ្លាតឆ្ងាយពីគេឯង ដោយការឃុំខ្លួនឯងនៅតែក្នុងបន្ទាប់។» លោកឧកញ៉ា វេជ្ជបណ្ឌិត គួច ម៉េងលី បន្ថែមទៀតថា នេះគឺជាពេលដែលពួកគេត្រូវការដំបូន្មាន ការណែនាំ និងការគាំទ្រផ្លូវចិត្តពីឪពុកម្តាយខ្លាំងបំផុត។
ការសិក្សាមួយចំនួនបានរកឃើញថា គ្រួសារដែលចេះចំណាយពេលវេលា និងមានសកម្មភាពផ្សេងៗជាមួយគ្នារាល់ថ្ងៃ បានពង្រឹងចំណងគ្រួសារ ក៏ដូចជាការសម្របខ្លួនចូលទៅក្នុងស្ថានភាពគ្រួសារបានកាន់តែប្រសើរ។ លោកឧកញ៉ា វេជ្ជបណ្ឌិត គួច ម៉េងលី មានប្រសាសន៍ថា «ដូចជាទៅបោះតង់ ស្ទូចត្រី រត់ម៉ារ៉ាតុង ឡើងភ្នំ និងសំខាន់បំផុត គឺការបរិភោគអាហារជុំគ្នាជាលក្ខណៈគ្រួសារជាដើម។»
លោកឧកញ៉ា វេជ្ជបណ្ឌិត គួច ម៉េងលី មានប្រសាសន៍ថា មានករណីជាច្រើន ដែលឪពុកម្តាយឱ្យលុយទៅកូន ហើយមិនយកចិត្តទុកដាក់ថា ពួកគេញ៉ាំអ្វី ព្រោះថាកុមារតែងតែញ៉ាំអាហារចម្អិនស្រាប់ (junk food) ហើយអាចបង្កគ្រោះថ្នាក់ដល់សុខភាពពួកគេ។
«ឪពុកម្តាយដើរតួនាទីយ៉ាងសំខាន់សម្រាប់សុខភាពកូន។ ឪពុកម្ដាយគួរតែផ្តល់ឱ្យកូននូវម្ហូបអាហារដែលមានតុល្យភាពល្អសម្រាប់ការលូតលាស់ផ្លូវចិត្តនិងសារពាង្គកាយរបស់ពួកគេ។ ការបរិភោគអាហារចម្អិនលឿន ដែលមានខ្លាញ់ខូចឬគ្មានគុណភាព ជាតិខ្លោចពីម្ហូបដុតអាំង និងខ្លាញ់ដែលស្រូបនៅលើបាយមិនមែនជាអាហារូបត្ថម្ភទេ ហើយក៏ជាកត្តានាំឱ្យមានជំងឺផ្សេងៗ ដែលអាចធ្វើឱ្យពួកគេឆាប់ស្លាប់» លោកឧកញ៉ាមានប្រសាសន៍បញ្ជាក់ដូច្នេះ។
នៅសាលារៀន អន្តរទ្វីប អាមេរិកាំង (AIS) សិស្សានុសិស្សទទួលបានការត្រួតពិនិត្យនិងណែនាំជានិច្ច ដើម្បីធានាថាពួកគេបរិភោគម្ហូបអាហារល្អត្រឹមត្រូវ ពោលគឺការផ្តល់អាហារូបត្ថម្ភត្រឹមត្រូវដល់ពួកគេ ដែលជាកត្តាដ៏សំខាន់ក្នុងការសិក្សារបស់សិស្សានុសិស្ស។
លោកឧកញ៉ា វេជ្ជបណ្ឌិត គួច ម៉េងលី មានប្រសាសន៍ថា «កុមារប្រៀបបាននឹងក្រដាសស។ ដូច្នេះត្រូវប្រាកដថា ពួកគេបានទទួលម្ហូបអាហារូបត្ថម្ភដ៏ត្រឹមត្រូវ ហើយកាត់បន្ថយអាហារផ្អែមនិងភេសជ្ជៈមានជាតិស្ករច្រើន»។
យ៉ាងណាក៏ដោយ សម្រាប់គ្រួសារក្រីក្រជាច្រើន លោកឧកញ៉ា វេជ្ជបណ្ឌិត គួច ម៉េងលី ទទួលស្គាល់ថា វាពិតជាលំបាកខ្លាំងណាស់សម្រាប់ពួកគេ ដើម្បីបានទទួលអាហារដ៏ត្រឹមត្រូវនោះ គឺដោយសារបញ្ហាហិរញ្ញវត្ថុ។ កត្តាងាយស្រួលបំផុតសម្រាប់គ្រួសារទាំងនេះ គឺទទួលទានបាយច្រើន តែបន្លែត្រីសាច់ក្នុងកម្រិតតិចតួចបំផុត។
ជាមួយនឹងគ្នានេះ លោកឧកញ៉ា វេជ្ជបណ្ឌិត គួច ម៉េងលី ក៏បានសម្តែងការព្រួយបារម្ភអំពីការកើនឡើងនៃការផ្សព្វផ្សាយពាណិជ្ជកម្មទាក់ទងទៅនឹងគ្រឿងស្រវឹង បារី បារ ខារ៉ាអូខេ និងកន្លែងរាំរែកជាដើម។ ទាំងអស់នេះ ទោះតិចឬច្រើន វាបានជះឥទ្ធិពលដ៏អាក្រក់ទៅលើក្មេងដែលគ្មានការណែនាំត្រឹមត្រូវពីឪពុកម្តាយរបស់ពួកគេ។
«ការផ្សព្វផ្សាយពាណិជ្ជកម្មតាមកញ្ចក់ទូរទស្សន៍ទាក់ទងអំពីស្រាបៀនិងបារី ខារ៉ាអូខេនៅទីនេះ ទីនោះ កន្លែងរាំរែក និងបារនៅគ្រប់ទីកន្លែង ជាពិសេសថែមទាំងនៅជិតសាលារៀនទៀតផង ទាំងនេះមិនគួរមានវត្តមានក្នុងសហគមន៍ទេ»។ លោកឧកញ៉ា វេជ្ជបណ្ឌិត មានប្រសាសន៍បន្ថែម។
លោកឧកញ៉ា វេជ្ជបណ្ឌិត គួច ម៉េងលី មានប្រសាសន៍ទៀតថា កុមារដែលគ្មានការអប់រំពីឪពុកម្តាយទំនងជាត្រូវគេល្បួងទៅកន្លែងផឹកស៊ីជំនួសការទៅសាលារៀន។ មានន័យថា ការបញ្ចប់គោលដៅសិក្សារបស់ពួកគេ គឺស្ថិតក្នុងភាពស្រពេចស្រពិល៕
ប្រភព៖ interconrooster.com
ព័ត៌មានថ្មីៗ
