Koeman ផ្តាំទៅកីឡាករម្នាក់ ថាឲ្យខំលេងសិនទៅ កុំទាន់ចង់ឡើងប្រាក់ឈ្នួលអី
ដូចយើងបានដឹងហើយពីស្ថានភាពក្លឹប Barcelona ដែលមួយរយៈក្រោយសឹងតែគ្មានលុយបើកឲ្យថ្លៃពលកម្មកីឡាករ និងត្រូវបង្ខំចិត្តលក់ចេញតារាឆ្នើមកំពូលៗមានតាំងពី Lionel Messi ជាដើម។ ជាលទ្ធផលយើងក៏ឃើញកីឡាករខ្លះ ព្រមកាត់បន្ថយថ្លៃពលកម្មទៅតាមការស្នើរបស់ក្លឹប ហើយខ្លះក៏នៅស្ថិតក្នុងការចរចា និងខ្លះទៀតបែរជាចង់ដំឡើងទៅវិញ។
ជាក់ស្តែងដូចជាយុវជន Ilaix Moriba កន្លងមកមានរបាយការណ៍មកថា គេចង់សុំក្លឹបឡើងតម្លៃពលកម្មមក ១០០ ០០០ អឺរ៉ូ/សប្តាហ៍ សម្រាប់កុងត្រាថ្មី បន្ទាប់ពីកុងត្រាចាស់ត្រូវផុតនៅរដូវក្តៅឆ្នាំក្រោយ។
ពាក់ព័ន្ធនឹងបញ្ហារបស់កីឡាករវ័យ ១៨ ឆ្នាំ អ្នកចាត់ការលោក Ronald Koeman ក៏បានចេញមកនិយាយចំៗ ថាគេមិនគួរទាន់គិតរឿងលុយជាធំនោះទេ ពោលគួរផ្តោតលើឱកាសនៃការលេងសិន។
អ្នកចាត់ការសញ្ជាតិហូឡង់ ពន្យល់កាលពីថ្ងៃសុក្របែបនេះ៖ "រឿង Ilaxi? ខ្ញុំបាននិយាយជាមួយគេ ២ ឬ ៣ សប្តាហ៍មុនហើយ ដោយនិយាយក្នុងនាមជាបុគ្គលទូទៅម្នាក់លើសពីអ្នកចាត់ការ"។
លោកបន្ថែមថា៖ "ស្ថានភាពរបស់គេពេលនេះ គឺត្រង់ថាគេទើបតែអាយុ ១៨ ឆ្នាំ គេជាចំណែកនៃអនាគតមួយរបស់ក្លឹប ហើយខ្ញុំដឹងថាក្លឹបស្រលាញ់ចង់បានគេណាស់ គ្រាន់ថាយោបល់ខ្ញុំទៅកាន់គេ កុំទាន់គិតរឿងលុយសំខាន់បំផុតពេលនេះ ជាការពិតទៅខ្ញុំពិតជាខកចិត្តទៅលើគេនិងភ្នាក់ងារខ្លាំងណាស់"៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
