ភ្នាក់ងារ៖ “Mbappe នឹងត្រូវក្លឹប PSG ធ្វើទុក្ខបុកម្នេញរឿងនេះ ដូចករណី Rabiot ដែរ”
អតីតភ្នាក់ងាររត់ការរបស់ Marco Verratti លោក Donato di Campli បានពន្យល់ថា ករណីរបស់ Kylian Mbappe កំពុងចូលដានចាស់ដូចករណីរបស់ Adrien Rabiot ហើយ ពាក់ព័ន្ធនឹងការមិនព្រមបន្តកុងត្រាថ្មី។
ជាការពិតស្ថានភាពរបស់កីឡាករបារាំង ដែលត្រូវផុតកុងត្រានៅឆ្នាំក្រោយ ២០២២ គេមានផ្លូវ ២ ដែលត្រូវជ្រើសរើស ទី ១) គឺបន្តកុងត្រាថ្មីបន្តឈរជើងនៅ PSG ទី ២) គឺរង់ចាំដល់អស់សុពលភាពកុងត្រា ហើយផ្ទេរទៅក្លឹប R.Madrid ក្នុងលក្ខខណ្ឌឥតតម្លៃខ្លួន។
យ៉ាងណាអតីតភ្នាក់ងារលោក Donato បានពន្យល់ថា PSG នឹងមិនឲ្យ Mbappe ឈរជើងស្រួលនោះទេ ប្រសិនគេមិនបន្តកុងត្រាថ្មី ពោលនឹងធ្វើទុក្ខបុកម្នេញឲ្យគេនៅលែងសុខ ជាក់ស្តែងដូចមិនឲ្យគេបានចូលលេងពេញជើង ហើយអង្គុយបម្រុងច្រើនជាងមុនជាដើម។
ប្រាប់សារព័ត៌មាន AS លោក Donato និយាយ៖ "ករណី Mbappe នឹងក្លាយដូចករណី Rabiot ដែរ ពីព្រោះវាជារឿងបុគ្គលជាមួយក្លឹប PSG ដោយមិនពាក់ព័ន្ធនឹងលុយ គឺខ្ញុំគិតថា ប្រសិន Mbappe មិនបន្តកុងត្រាថ្មី នោះក្លឹបនឹងមិនឲ្យគេបានចូលលេងជាប់លាប់ទេ នេះបើតាមបទពិសោធន៍ខ្ញុំធ្លាប់ឃើញផ្ទាល់"។
រំឭកឲ្យដឹងដែរថា ករណី Rabiot គឺកាលគេនៅ PSG គេបានបដិសេធមិនបន្តកុងត្រាថ្មី ហើយនៅរយៈពេលសេសសល់ជាង ៦ ខែ គេបានបាត់ឈ្មោះពីបញ្ជីកីឡាករ PSG និងលែងស្ថិតក្នុងផែនការណ៍របស់ក្លឹបតទៅទៀត ពោលល្មមនឹងឲ្យគុណភាពលេងរបស់គេរាងធ្លាក់ចុះបន្តិចដែរ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
