ខ្លាច Barce/Real កាត់មុខយកបាន Liverpool ចង់ប្រើក្បាច់នេះថ្ពក់ចិត្ត Salah ឲ្យបន្តនៅ
តាមចចាមអារ៉ាមចុងក្រោយអ្នកគាំទ្រប្រហែលជាបានដឹងហើយថា កីឡាករ Mohamed Salah ហាក់ទទួលបានការចាប់អារម្មណ៍ខ្លាំងពីសំណាក់ក្លឹបយក្សនៅអេស្ប៉ាញ មាន Real Madrid និង Barcelona។ កន្លងមកធ្លាប់លឺដំណឹងថា មានគេហ៊ានឲ្យតម្លៃខ្លួនខ្សែប្រយុទ្ធអេហ្សីបដល់លើស ១០០ លានអឺរ៉ូទៀតផង តែយ៉ាងណាសាមីខ្លួនផ្ទាល់មិនទាន់គិតដល់រឿងចែកផ្លូវទេ។
បច្ចុប្បន្នសុពលភាពកុងត្រារបស់ Salah ត្រូវផុតនៅចុងខែមិថុនា ឆ្នាំ ២០២៣ ហើយគិតមកទល់ពេលនេះគេចាយពេលនៅក្លឹបម្ចាស់ដី Anfield រយៈពេលជាង ៤ ឆ្នាំ។ បង្ហាញខ្លួនសរុប ២០៤ ប្រកួត រកបាន ១២៦ គ្រាប់និង Assist ៤៩ លើក។
បើតាមរបាយការណ៍ពី The Athletic របស់អេស្ប៉ាញចុះផ្សាយថា ខ្សែប្រយុទ្ធរបស់ក្លឹប Liverpool នឹងទទួលបានការចរចាកុងត្រាថ្មីពីសំណាក់ក្លឹប ដែលវាជាយុទ្ធសាស្រ្តតែមួយគត់ដើម្បីថ្ពក់ចិត្ត Salah ឲ្យបន្តឈរជើងតទៅទៀត។ ក្នុងកុងត្រាថ្មីនោះ ក្លឹបនឹងផ្តល់ឲ្យប្រាក់ពលកម្ម Salah ប្រមាណ ៣០០ ០០០ ផោន/សប្តាហ៍ ដែលខ្ពស់ជាងកុងត្រាបច្ចុប្បន្នទទួលបានត្រឹម ២០០ ០០០ ផោនប៉ុណ្ណោះ។
យើងមិនទាន់ច្បាស់ថាសាមីខ្លួនយល់ព្រមឬបែបណាទេ ហើយបើយល់ព្រមលើសំណើកុងត្រាថ្មី នោះគេទំនងជានឹងជាប់សុពលភាពដល់ឆ្នាំ ២០២៥ យ៉ាងតូច ឬអាចដល់ឆ្នាំ ២០២៧ ក៏ថាបាន។ គួរឲ្យដឹងដែរថា ក្រុមដឹកនាំដោយលោក Jurgen Klopp បានចាប់ផ្តើមរដូវកាលថ្មី PL បានល្អគួរសម ដោយយកឈ្នះលើ Norwich ៣-០ ហើយត្រៀមប៉ះ Burnley នៅល្ងាចថ្ងៃសៅរ៍ខាងមុខ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
