ក្តៅ! កីឡាករគោលដៅដែល United/Arsenal ចង់បាន ពេលនេះតកុងត្រាថ្មីឲ្យ Atletico ហើយ
ក្លឹបអេស្ប៉ាញ Atletico Madrid ទីបំផុតបានសម្រេចបន្តកុងត្រាថ្មី សម្រាប់កីឡាករ Marcos Llorente ហើយ ក្រោយកន្លងមកមានចចាមអារ៉ាមថាក្លឹបជាច្រើនចង់បាន មានតាំងពី Man Utd, Arsenal និង Paris Saint-Germain ជាដើម។
ខ្សែបម្រើ Llorente បានបន្ថែមកុងត្រាថ្មីដល់ឆ្នាំ ២០២៧ ដែលមានន័យថា គេត្រូវឈរជើងនៅក្លឹបក្រហមសរយៈពេល ៦ រដូវកាលបន្ថែមទៀត។ គេក៏រាប់បានជាចំណែកសកម្មមួយ របស់លោក Diego Simeone ផងដែរ ជាពិសេសកាលពីរដូវកាលមុនក្រោយក្លឹបលើកពាន La Liga ដែលគេរកបាន ១២ គ្រាប់និង Assist ១១ លើក។
និយាយជាមួយការតកុងត្រាថ្មី Llorente ថា៖ "ខ្ញុំបានមកដល់ទីនេះរយៈពេល ២ ឆ្នាំហើយ និងបានលូតលាស់អភិវឌ្ឍជាកីឡាករបាល់ទាត់និងជាបុគ្គលមួយរូប ដោយខ្ញុំក៏ធ្លាប់ដួល ហើយងើបមកវិញ តែទីបំផុតបានរកឃើញគ្រួសារទី ២ របស់ខ្ញុំ ជាមួយរឿងរ៉ាវដែលមិនអាចបំភ្លេចបាននៅ Atletico Madrid ខ្ញុំពិតជារីករាយនឹងការបន្តឈរជើងដល់ឆ្នាំ ២០២៧"។
បញ្ជាក់ដែរថា នៅប្រកួតបើកឆាកកាលពីថ្ងៃទី ១៥ សីហាកន្លងទៅ ក្រុមដឹកនាំដោយលោក Simeone បានយកឈ្នះ ២-១ ទៅលើ Celta Vigo។ ប្រកួតបន្ទាប់ពួកគេត្រូវប៉ះ Elche ក្នុងទឹកដីខ្លួនឯងនៅម៉ោងរំលងអាធ្រាត្រចូលថ្ងៃទី ២៣ សីហា៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
