លឺថា Ronaldo រដូវកាលថ្មី អាចអង្គុយបម្រុងច្រើន ដោយសារហេតុផលសំខាន់នេះ
ក្លឹបសេះបង្កង់ Juventus នឹងបើករដូវកាលថ្មី ២០២១/២២ របស់ខ្លួននៅយប់ថ្ងៃអាទិត្យ ទី ២២ សីហា ត្រូវតតាំងក្រុម Udinese ហើយគ្រប់គ្នាក៏រំពឹងទុកផងដែរ ថានឹងមានវត្តមាន Cristiano Ronaldo សម្រាប់ប្រកួតបើកឆាក។
យ៉ាងណាតាមការចុះផ្សាយរបស់សារព័ត៌មាន La Gazzetta dello Sport បានឲ្យដឹងថា រដូវកាល ២០២១/២២ ក្រោមការដឹកនាំជាលើកទី ២ របស់លោក Massimilano Allegri គឺ Ronaldo នឹងមិនអាចលេងពេញជើង ១០០ ភាគរយដូចមុននោះទេ ពោលអាចនឹងអង្គុយបម្រុងច្រើនជាងរដូវកាលចាស់ ក្រោមហេតុផលដែលជាយុទ្ធសាស្ត្រដឹកនាំរបស់គ្រូ។
ជាការពិតបើយើងស៊ីជម្រៅទៅអតីតកាល អ្នកគាំទ្រប្រហែលជាដឹងហើយថារវាង Ronaldo និង Allegri មិនសូវជាត្រូវរ៉ូវគ្នាប៉ុន្មានឡើយ ដោយកាលមកដល់ Juventus ដំបូងឆ្នាំ ២០១៨ សារនោះក៏ លឺថាមានរឿងរកាំរកូសជាមួយគ្រូបន្តិចផងដែរ។
យ៉ាងណាយើងមិនច្បាស់នោះទេ ថាការដឹកនាំរបស់ Allegri សារនេះ Ronaldo នឹងជោគជ័យកម្រិតណា ព្រោះបើមើលស្ថិតិចាស់ ចំពោះការរកគ្រាប់បាល់ផ្ទាល់គឺក្រោមការដឹកនាំរបស់គ្រូទី ១ Allegri រាងស្ថិតនៅកម្រិតទាបជាងគ្រូ ២ ផ្សេងទៀតរួមមានលោក Maurizio Sarri និង Andrea Pirlo។ ខាងក្រោមយើងបង្ហាញស្ថិតិប្រកួតរបស់ CR7 ជាមួយគ្រូទាំង ៣៖
ជាមួយ Andrea Pirlo ៤៤ ប្រកួត រកបាន ៣៦ គ្រាប់និង Assist ៦ លើក
ជាមួយ Maurizio Sarri ៤៦ ប្រកួត រកបាន ៣៧ គ្រាប់និង Assist ៩ លើក
ជាមួយ Massimiliano Allegri ៤៣ ប្រកួត រកបាន ២៨ គ្រាប់និង Assist ១១ លើក៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
