កាត់សាញយក Haaland មិនបាន Chelsea ងាកទៅចាប់អារម្មណ៍កូនក្រុម Dortmund មួយរូបទៀត
ក្លឹបតោខៀវ Chelsea មកទល់ពេលនេះយើងសម្រេចបាន ១០០ ភាគរយថាការចរចារឿងចង់បាន Erling Haaland គឺមិនអាចទៅរួចនោះទេ ព្រោះអីក្លឹបបានចំណាយលុយយក Romelu Lukaku មកបំពេញតំណែងប្រយុទ្ធរួចទៅហើយ។
យ៉ាងណាមិញក្លឹបហាក់មិនទាន់បញ្ចប់ការចរចាជាមួយភាគីក្លឹប Borussia Dortmund នោះទេ ដោយកំពុងចាប់អារម្មណ៍លើគោលដៅមួយរូបផ្សេងទៀតមានវ័យ ១៨ ឆ្នាំ ហើយជាកីឡាករលេងតំណែងបម្រើវិញម្តង។ នោះគឺ Jude Bellingham ដែលក្រុមជញ្ជាំងលឿងអាល្លឺម៉ង់ យកបានពី Birmingham City កាលពីរដូវក្តៅឆ្នាំ ២០១៩ ហើយមកទល់ពេលចុងក្រោយហាក់ឡើងជើងខ្លាំង ជាពិសេសក្រោយចប់ Euro 2020។
សរុបស្ថិតិជារួមលេងឲ្យ Dortmund គេបង្ហាញខ្លួនបាន ៤៦ ប្រកួតដែរ ដោយរកបាន ៤ គ្រាប់និង Assist ៥ លើក។ តាមសារព័ត៌មាន Eurosport ចុះផ្សាយថា ប្រធានក្លឹប Chelsea លោក Roman Abramovich ហាក់ចាប់អារម្មណ៍ចង់បានខ្សែបម្រើថ្មី ហើយគោលដៅអាទិភាពដើមឡើយគឺ Declan Rice តែក្រោយចរចាមិនសម្រេច ក៏ប្តូរមកចង់បាន Bellingham វិញ។
កីឡាករសញ្ជាតិអង់គ្លេសសេសសល់សុពលភាពកុងត្រាដល់ចុងខែមិថុនា ឆ្នាំ ២០២៥ ឯណោះ ហើយបើក្លឹប Dortmund ព្រមលក់នៅរដូវក្តៅនេះ គឺអាចទទួលបានតម្លៃក្បែរ ៦០ លានអឺរ៉ូ។ Bellingham នៅតែរាប់បានជាចំណែកសំខាន់មួយរបស់ក្រុមមានអ្នកចាត់ការលោក Marco Rose ហើយការប៉ះ Bayern Munich នៅពាន DFL Supercup ក៏ទំនងជាមានគេចូលរួមលេងផងដែរ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
