នេះដឹងច្បាស់ហើយ! Nuno ពន្យល់មូលហេតុមិនដាក់ Spurs នៅជ័យជម្នះលើ Man City យប់មិញ
ក្រុមមាន់ខ្នាយមាស Tottenham Hotspur បានបើកការប្រកួតជុំទី ១ យ៉ាងល្អ តាមរយៈជ័យជម្នះទៅលើក្រុមការពារជើងឯក Manchester City ដោយលទ្ធផល ១-០។ គ្រាប់បាល់យកបានបីពិន្ទុកើតចេញពីថ្វីជើងកីឡាករកូរ៉េខាងត្បូង Son Heung-min ដ្បិតបើក្នុងការប្រកួតពុំមានការជំនួយពីខ្សែប្រយុទ្ធសំខាន់មួយរូបទៀតគឺ Harry Kane។
អ្នកគាំទ្រប្រាកដជាឆ្ងល់ ហើយកាន់តែបារម្ភថាហេតុអ្វីកីឡាករអង់គ្លេសបែរជាមិនអាចបង្ហាញខ្លួននៅប្រកួតដ៏សំខាន់នេះ? យ៉ាងណាតាមការពន្យល់ពីអ្នកចាត់ការថ្មីលោក Nuno Santo បានលើកហេតុផលចម្បងថា ដោយសារខ្សែប្រយុទ្ធវ័យ ២៨ ឆ្នាំ គេពុំទាន់ត្រៀមលក្ខណៈរួចរាល់ ពោលទើបតែមកហ្វឹកហាត់រយៈពេលខ្លីចុងក្រោយនេះប៉ុណ្ណោះ ទើបសម្រេចមិនដាក់គេឲ្យចូលលេង។
ប្រាប់សារព័ត៌មាន Sky Sports លោក Santo និយាយ៖ "Kane គេនៅបន្តការរៀបចំខ្លួន ដូច្នេះហើយទើបមានការអូសបន្លាយពេល ពោលគេត្រូវហ្វឹកហាត់បន្ថែមទៀត ដល់គេត្រៀមខ្លួនរួចរាល់ទើបយើងដាក់ឲ្យគេលេងបាន"។
លោកបន្ត៖ "កីឡាករទាំងអស់ដែលមិនបានចូលរួមហ្វឹកហាត់គ្រប់គ្រាន់ជាមួយក្រុម គឺមិនទាន់បានលេងនោះទេ តែសម្រាប់ករណីរបស់ Bryan (Gil) ក៏ដូចជា Romero គឺខុសគ្នា ព្រោះគេដូចបានកម្តៅសាច់ដុំតាំងពីនៅព្រឹត្តិការណ៍អូឡាំពិករួចមកហើយ ដូច្នេះវាពិតជាសំខាន់ខ្លាំងណាស់សម្រាប់កីឡាករក្នុងការមកបង្ហាញខ្លួន មកមើលសណ្ឋាគារ មកមើលការប្រជុំ និងដំណើរការទាំងអស់របស់ក្រុមទាំងមូល"។
រំឭកឲ្យដឹងដែរថា អវត្តមានរបស់ Kane កាន់តែធ្វើឲ្យគ្រប់គ្នាងឿងឆ្ងល់ ថាគេពិតជានឹងផ្ទេរទៅ Man City មែនឬអត់ ខណៈដែលរយៈពេលទីផ្សារដោះដូរនៅសល់ ១៥ ថ្ងៃទៀតឯណោះ។ ចចាមអារ៉ាមចុងក្រោយ City ដាក់តម្លៃស្នើ ១២០ លានផោន កំពុងឲ្យក្លឹបអាណាព្យាបាល Spurs ធ្វើការសម្រេចចិត្តមុនបិទទីផ្សារដោះដូរ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
