Pogba នឹងឈរជើងដល់អស់កុងត្រានៅ Man Utd ហើយក្លឹបបន្ទាប់មិនមែនជា PSG ទេ
Paul Pogba សេសសល់សុពលភាពកុងត្រាដល់ចុងខែមិថុនា ឆ្នាំ ២០២២ ពោលមានរយៈពេលមួយរដូវកាលពេញ។ គេមានសិទ្ធក្នុងការចរចាលក្ខណៈ Pre-Contract ឬកិច្ចព្រមព្រៀងជាមុន ជាមួយនឹងបណ្តាក្លឹបដែលគេចង់ទៅចូលរួម ប្រសិនច្បាស់លាស់ថាមិនបន្តកុងត្រាថ្មីជាមួយក្លឹបអាណាព្យាបាលបច្ចុប្បន្ន Man Utd។
ខ្សែបម្រើបារាំង ត្រូវបានសារព័ត៌មាន Daily Star ចុះផ្សាយថា គេក៏សម្រេចចិត្តរួចរាល់ហើយ អំពីទ្រនំថ្មីដែលគេត្រូវទៅចូលរួម តែពុំមែនជាក្លឹបបារាំង Paris Saint-Germain នោះទេ ដ្បិតបើនៅទីនោះជាប្រទេសកំណើត និងមានកីឡាករកំពូលឈរជើងស្រាប់ក៏ដោយ។ ផ្ទុយទៅវិញក្រោយផុតកុងត្រា ឈរជើងនៅ United នោះ Pogba នឹងផ្ទេរទៅក្លឹប Real Madrid។
នេះដូចជាការរៀបចំទុកមុន ព្រោះអីបើឲ្យ Real Madrid ចាយលុយនៅរដូវក្តៅ ក៏ក្លឹបគ្មានលទ្ធភាពដែរ ហើយ United ក៏ទារតម្លៃខ្លួន Pogba មិនក្រោម ៥០ លានផោននោះដែរ។ ដូច្នេះប្រហែលជាភាគីកីឡាករនិងក្លឹបអធិរាជស ចរចាគ្នាត្រូវរ៉ូវលក្ខណៈបុគ្គលហើយ ថានឹងផ្ទេរឥតតម្លៃខ្លួន ក្រោយចប់រដូវកាល ២០២១/២២។
រំឭកឲ្យដឹងដែរថា កីឡាករវ័យ ២៨ បានចាយពេលនៅ Old Trafford រយៈពេល ៥ ឆ្នាំ បន្ទាប់ចាកចេញពី Juventus។ កំឡុងពេលនេះ គេបង្ហាញខ្លួនសរុប ២០៧ ប្រកួតរកបាន ៣៨ គ្រាប់និង Assist ៤៦ លើក។ ការផ្ទេរទៅក្លឹបនៅអេស្ប៉ាញ នឹងជាបទពិសោធន៍ថ្មីលើកដំបូងក្នុងអាជីពជាកីឡាករ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
