Di Maria ឆ្លើយបែបណា បើឲ្យជ្រើសយកមួយរវាង Ronaldo ឬ Messi មកក្លឹប PSG?
បើអ្នកមានក្លឹបបាល់ទាត់មួយ ហើយឲ្យជ្រើសយកតែម្នាក់មកចូលរួមរវាង Cristiano Ronaldo ឬ Lionel Messi តើអ្នកនឹងជ្រើសយកមួយណា? ពាក់ព័ន្ធនឹងចម្ងល់នេះ Angel di Maria ដែលជាមិត្តរួមជម្រើសជាតិរបស់ M10 នៅអាហ្សង់ទីន និងធ្លាប់ជាអតីតមិត្តរួមក្រុមរបស់ CR7 នៅ Real Madrid ក៏បានឆ្លើយយ៉ាងច្បាស់ៗផងដែរ។
បញ្ជាក់ឲ្យដឹងថា Messi បច្ចុប្បន្នជាកីឡាកររបស់ក្លឹប PSG ជាផ្លូវការហើយ ដោយលោកក៏បានបង្ហាញវត្តមាននៅឯកីឡដ្ឋាន Parc des Princes កាលពីប៉ុន្មានខែមុនផងដែរ។ ទៅមើលការលើកឡើងរបស់ Di Maria ប្រាប់ TyC Sports ដូច្នោះថា៖ "Messi ប្រៀបដូចជាមនុស្សមកពីក្រៅភព អ្នកគ្រវែងដុំថ្មទៅកាន់គាត់ ក៏គាត់អាចគ្រប់គ្រងស្ថានការណ៍នោះបាន ដោយគាត់អាចផ្តួលអ្នករាល់គ្នា គាត់មានការគិតរហ័សជាងនរណាទាំងអស់ ពោលខ្ញុំមិនធ្លាប់បានឃើញនរណាពីមុនមកបែបហ្នឹងទេ"។
ខ្សែប្រយុទ្ធស្លាបរបស់ PSG បន្ថែមទៀតថា៖ "ខ្ញុំបានលេងជាមួយ Cristiano, Neymar, Mbappe, Rooney, Van Persie, Ibrahimovich, Benzema, Bale តែស្មោះត្រង់ទៅខ្ញុំមិនដែលឃើញនរណាល្អដូចជាគាត់ឡើយ និយាយច្បាស់ៗទៅ ជាការពិតខ្ញុំចង់ឲ្យ Cristiano មកចូលរួមនៅទីនេះ តែបើយើងយកបាន Messi ហើយវាគឺកាន់តែសំណាង និងល្អប្រសើរជាង [ជាងការយកបាន Ronaldo]។
រំឭកថា តារាឆ្នើមព័រទុយហ្គាល់ បច្ចុប្បន្នមានវ័យ ៣៦ ឆ្នាំ ហើយសេសសល់កុងត្រានៅក្លឹប Man Utd ដល់ឆ្នាំ ២០២៣។ ស្ថិតិនៅរដូវកាលថ្មី ជាមួយ United កីឡាករលេងតំណែងប្រយុទ្ធកណ្តាលរកបាន ៦ គ្រាប់ហើយនៅការបង្ហាញខ្លួន ៨ ប្រកួតសរុប៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
