[ផ្លូវការ] R.Madrid ប្រកាសលេខអាវថ្មីរបស់ Bale តែមិនមែនលេខ ១១ ឬលេខ ៥០
Gareth Bale បានសម្រេចត្រលប់មកលេងឲ្យក្លឹប Real Madrid វិញហើយ ក្រោយពីផុតកុងត្រាខ្ចីជើងនៅក្លឹប Tottenham Hotspur។ យ៉ាងណាការត្រលប់មកវិញសារនេះ កីឡាករសញ្ជាតិវែលមិនអាចបន្តប្រើប្រាស់អាវលេខ ១១ ដែលជាលេខអាវចាស់របស់ខ្លួននោះទេ ព្រោះអីនៅជាប់លើ Marco Asensio ទៅហើយ។
ជំនួសមកវិញកាលពីប៉ុន្មានថ្ងៃមុននៅប្រកួតមិត្តភាពគេឃើញ Bale ពាក់អាវលេខ ៥០ ដែលវាពិតជាចម្លែក ព្រោះលេខ ៥០ គ្មានអត្ថន័យអ្វីគួរឲ្យចាប់អារម្មណ៍ ឬរឿងរ៉ាវចាក់ដោតអ្វីនៅពីក្រោយលេខនោះឡើយ។ រហូតទើបតែមកដល់ល្ងាចថ្ងៃសុក្រនេះ ក្លឹប Real Madrid ក៏បានប្រកាសជាផ្លូវការនៅលេខអាវរបស់កីឡាករ សម្រាប់រដូវកាល ២០២១/២២ ហើយយើងឃើញថា Bale ទទួលបានលេខអាវថ្មីគឺលេខ ១៨។
លេខ ១៨ ជាលេខអាវចាស់របស់ Luka Jovic ដែលគេប្តូរមកប្រើប្រាស់លេខ ១៦ វិញ ចំណែកឯ Rodrygo ដែលប្រើប្រាស់អាវលេខ ២៧ ទទួលបានអាវលេខ ២១ សម្រាប់រដូវកាលខាងមុខនេះ។
គួរឲ្យដឹងដែរថា Bale សេសសល់សុពលភាពកុងត្រាជាមួយអធិរាជស ត្រឹមចុងខែមិថុនា ឆ្នាំក្រោយ ២០២២ ហើយមិនទាន់លឺដំណឹងអំពីការបន្តថ្មីអ្វីនោះទេ ពោលរង់ចាំមើលការលេងជាមួយគ្រូថ្មីលោក Carlo Ancelotti សិន។ ប្រកួតបើកឆាករបស់ Real Madrid នៅ La Liga គឺត្រូវជួប Alaves នៅវេលាម៉ោង ០៣:០០ នាទីទាបភ្លឺ រំលងឈានចូលថ្ងៃអាទិត្យចុងសប្តាហ៍នេះ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
