[ផ្លូវការ] កីឡាករប៊ិះអស់តំណែងនៅ City ម្នាក់ ទីបំផុតមកបានកុងត្រាថ្មីដល់ឆ្នាំ ២០២៦
ក្លឹបមេឃខៀវ Manchester City ទើបតែប្រកាសនៅដំណឹងផ្លូវការ អំពីការបន្តកុងត្រាថ្មីសម្រាប់ខ្សែការពារឆ្នើម John Stones រយៈពេល ៥ ឆ្នាំ ពោលនឹងមានសុពលភាពដល់ឆ្នាំ ២០២៦ ខណៈកុងត្រាចាស់របស់គេត្រូវផុតនៅឆ្នាំក្រោយ។
បុរសវ័យ ២៧ ឆ្នាំ ដែលផ្ទេរមក City កាលពីឆ្នាំ ២០១៦ ជាមួយតម្លៃ ៤៧,៥ លានផោន កាលពីប៉ុន្មានរដូវកាលដំបូងគេមិនសូវបានលេងនោះទេ មិនថាតែនៅ Premier League និង Champions League ហើយជាពិសេសក្រោយការមកដល់របស់ Ruben Dias ដែលធ្វើឲ្យគេសឹងតែបាត់ឈ្មោះពីទីលាន។ ទើបតែរដូវកាលកន្លងទៅនេះទេ ដែល Stones គេបានមកប្រជែងតំណែងរបស់ Aymeric Laporte ហើយធ្វើបានយ៉ាងល្អទាក់ចិត្តឲ្យលោក Pep Guardiola ដែលអ្នកចាត់ការ រមែងដាក់គេឲ្យចាប់ដៃគូជាមួយ Dias នៅតំបន់ការពារកណ្តាលជាប់លាប់។
ថ្លែងនៅកិច្ចបន្តកុងត្រាថ្មី កីឡាករអង់គ្លេសនិយាយ៖ "ខ្ញុំរីករាយនឹងក្លាយជាផ្នែកមួយនៃក្រុមនេះ ដោយមានកីឡាករពោរពេញដោយគុណភាពជាច្រើន ហើយខ្ញុំដឹងថាយើងអាចបន្តឈ្នះពានរង្វាន់ ជាគោលដៅអាទិភាពដែលយើងផ្ដោតចម្បង"។
លោកបន្ថែមថា៖ "អ្វីដែលយើងបានសម្រេចនៅរយៈពេល ៤ ឆ្នាំចុងក្រោយគឺពិតជាអស្ចារ្យ ហើយខ្ញុំចង់បន្តបែបហ្នឹងទៀត នេះជាកន្លែងដែលខ្ញុំរីករាយនឹងការលេងបាល់ទាត់បំផុត ក៏ដូចជាបំពេញនៅមហិច្ឆតារបស់ខ្ញុំ"៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
