សមាគមបាល់ទាត់ម៉ាឡេស៊ីនឹងពិនិត្យឡើងវិញអំពីប្រសិទ្ធភាពនៃច្បាប់កីឡាករចូលសញ្ជាតិ
នៅក្នុងសេចក្តីថ្លែងការណ៍ជាផ្លូវការមួយ ប្រធានសមាគមបាល់ទាត់ម៉ាឡេស៊ី (FAM) លោក Datuk Haji Hamidin Mohd Amin បានណែនាំដល់លេខាធិការដ្ឋានរបស់សមគមកីឡាបាល់ទាត់ម៉ាឡេស៊ី (FAM )ពិនិត្យអំពីប្រសិទ្ធភាពកីឡាករចូលសញ្ជាតិដែលបង្ហាញទម្រង់លេងមិនបានល្អក្នុងការប្រកួតជម្រុះ 2022 FIFA World Cup នាពេលកន្លងមក។
អ្នកគាំទ្របាល់ទាត់ក្នុងស្រុកថ្មីៗនេះបានរិះគន់ការបង្ហាញគុណផលរបស់ Guilherme De Paula, Mohamadou Sumareh និង Liridon Krasniqi ដែលមិនបានជួយក្រុមជម្រើសជាតិខ្លាម៉ាឡាយូមួយនេះឲ្យទទួលបានលទ្ធផលជាវិជ្ជមានក្នុងការប្រកួតជាមួយ UAE និងវៀតណាម។
នៅក្នុងសេចក្តីថ្លែងការណ៍ជាផ្លូវការមួយ លោក Hamidin បាននិយាយថា៖ “ ទាក់ទងនឹងបញ្ហាកីឡាករចូលសញ្ជាតិ ខ្ញុំបានណែនាំលេខាធិការដ្ឋានFAM ឱ្យពិភាក្សាអំពីបញ្ហានេះ ដោយគណៈកម្មាធិការកម្មវិធីចូលសញ្ជាតិនៃ FAM រួមជាមួយគណៈកម្មាធិការបច្ចេកទេស និងអភិវឌ្ឍន៍របស់ FAM និងនាយកបច្ចេកទេសរបស់សហព័ន្ធលោក Datuk Ong Kim Swee ដើម្បីសិក្សាពីប្រសិទ្ធភាពកីឡាករចូលសញ្ជាតិនេះ"។
Hamidin ក៏បានឆ្លើយតបទៅនឹងសំណើរបស់ម្ចាស់ក្លិប JDT លោក Tunku Ismail Ibni Sultan Ibrahim (TMJ) ដើម្បីគ្រប់គ្រងក្រុមជម្រើសជាតិ ដោយផ្តល់នូវមធ្យោបាយ និងគ្រូបង្វឹកល្អបំផុត។ ពេលនេះព្រះអង្គម្ចាស់ Tunku Ismail Ibni Sultan Ibrahim បានត្រៀមខ្លួនរួចជាស្រេចក្នុងការជួយពង្រឹងសមត្ថភាពក្រុមជម្រើសជាតិដោយផ្ដល់ទីកន្លែងហ្វឹកកហាត់ដ៏មានគុណភាព និងគ្រូបង្វឹកល្អតែមិនធានាបានផលភ្លាមៗនោះទេ។
“ ដំបូងខ្ញុំសូមគោរពដល់ឧត្តមសេនីយ៍ទោ Tunku Ismail Ibni Sultan Ibrahim, Tunku Mahkota នៃរដ្ឋ Johor ហើយបានកត់សំគាល់នូវសំណើរដែលបានដាក់ជូនគាត់ក្នុងនាមជាអតីតប្រធានសមាគមបាល់ទាត់ម៉ាឡេស៊ី (FAM) ទាក់ទងនឹងក្រុមជម្រើសជាតិម៉ាឡេស៊ីនៅថ្ងៃនេះដែរ"។
Hamidin ពន្យល់ថា៖“ ទោះយ៉ាងណាបញ្ហាចាំបាច់ត្រូវកែលម្អឡើងវិញ ពីព្រោះ FAM ក្នុងនាមជាស្ថាប័នមេនៃបាល់ទាត់ជាតិមាននីតិវិធីច្បាប់ និងការប្រជុំមួយចំនួនមុននឹងធ្វើការសំរេច ឬអនុម័តបទបញ្ជានានា” ។
Hamidin ក៏បានធានាផងដែរថាបញ្ហាទាំងអស់នេះ នឹងត្រូវបានពិភាក្សានៅក្នុងកិច្ចប្រជុំគណៈកម្មាធិការពាក់ព័ន្ធ ហើយបន្ទាប់មកនឹងត្រូវបញ្ជូនទៅកិច្ចប្រជុំគណៈកម្មាធិការប្រតិបត្តិរបស់ FAM ដើម្បីបញ្ចប់៕
រក្សាសិទ្ធិដោយ៖ ក្នុងស្រុក
អំពីអ្នកសរសេររបស់យើង៖ PECH PHEARUN
Tel:
ព័ត៌មានថ្មីៗ
