Goal.com: ស៊ាង ចន្ធាស្ថិត​ក្នុង​ចំណោមកីឡាករវ័យក្មេងដ៏មាន​អនាគត​នៅ​តំបន់អាស៊ានទាំង២៥នាក់

Goal.com: ស៊ាង ចន្ធាស្ថិតក្នុងចំណោមកីឡាករវ័យក្មេងដ៏មានអនាគតនៅតំបន់អាស៊ានទាំង២៥នាក់

2021-06-12

គេហទំព័រ Goal.com បានជ្រើសរើសកីឡាករវ័យក្មេងដ៏មានទេពកោសល្យទាំង ២៥ នាក់ដែលកើតនៅ ឬបន្ទាប់ពីថ្ងៃទី ១ ខែមករាឆ្នាំ ២០០២ ពីគ្រប់មជ្ឈដ្ឋានទាំងអស់ក្នុងតំបន់អាស៊ាន។ ក្នុងចំណោមកីឡាករទាំងអស់នោះក៏មានកីឡាករកម្ពុជាយើងម្នាក់ដែរគឺខ្សែប្រយុទ្ធ ស៊ាង ចន្ធា។

198578160_3007852732785548_3287731863685860280_n

ក្នុងបញ្ជី២៥នាក់ ស៊ាង ចន្ធាស្ថិតក្នុងចំណាត់ថ្នាក់ទី១២។ Goal បានពិពណ៌នាខ្សែប្រយុទ្ធបឹងកេតរូបនេះថា៖" ទោះបីជាមានវ័យត្រឹម១៨ឆ្នាំ ស៊ាង ចន្ធាបានបង្ហាញខ្លួនក្នុងជម្រើសជាតិឈុតធំរបស់គោព្រៃកម្ពុជាជាច្រើនប្រកួតរួចទៅហើយ។ ខ្សែប្រយុទ្ធរូបនេះបានរកគ្រាប់បាល់ដំបូងក្នុងឈុតធំ នៅពេលប្រកួតជាមួយក្រុមជម្រើសជាតិប៉ាគីស្ថានកាលពីខែមិថុនាឆ្នាំ ២០១៩ ដែលបានក្លាយជាអ្នករកគ្រាប់បាល់ក្មេងជាងគេបំផុតរបស់ប្រទេសរបស់គាត់នៅអាយុ ១៦ ឆ្នាំ។

198983705_3007852729452215_6016487698668927637_n

គាត់ត្រូវបានក្លិបបឹងកេតដែលត្រូវបានគេចាត់ទុកជាក្លិបធំមួយរបស់កម្ពុជា ចុះកុងត្រាយកក្រោយបញ្ចប់ការហ្វឹកហាត់នៅសាលាបាល់ទាត់ជាតិបាទី។ ក្រោយមក កីឡាករមានកំណើតមកពីខេត្តកោះកុងរូបនេះ ក៏បង្កើតប្រវត្តិសាស្រ្តបន្ថែមទៀតនៅខែធ្នូឆ្នាំ ២០១៩ នៅពេលដែលគាត់រកបានគ្រាប់បាល់លឿនជាងគេនៅស៊ីហ្គេមដោយរកបានសំណាញ់ទីទល់នឹងមីយ៉ាន់ម៉ាបន្ទាប់ពីចែកបាលបានតែ ១៨ វិនាទី។

គាត់ប្រឈមនឹងការប្រកួតប្រជែងខ្លាំងពីសំណាក់រៀមច្បងប្រាក់មុន្នីឧត្តម និងកែវ សុខផេងក្នុងឈុត១១នាក់ក្រុមជម្រើសជាតិ ប៉ុន្តែវាហាក់ដូចជាជៀសមិនរួចទេដែលថាគាត់នឹងក្លាយជាខ្សែប្រយុទ្ធលេខ ៩ របស់កម្ពុជាប្រសិនបើគាត់រក្សាការអភិវឌ្ឍដូចពេលបច្ចុប្បន្ន។