មិនមែនជាសង្សារនឹងគ្នាទេ តែក៏មិនអាចឱ្យគេទៅមានអ្នកណាបានដែរ អ្នកណាធ្លាប់ឆ្លងកាត់អារម្មណ៍បែបហ្នឹង?
ធ្លាប់ស្គាល់អារម្មណ៍បែបមិនត្រូវជាអីនឹងគ្នា តែមិនចង់ឱ្យគេទៅមានសង្សារអត់? ពេលខ្លះក៏មិនយល់ចិត្តខ្លួនឯងដែរ ស្រឡាញ់គេ តែមិនចង់ធ្វេីជាសង្សារជាមួយគេ អាចថាជាទំនាក់ទំនងបែប លើសពីពាក្យថាមិត្ត តែមិនមែនជាសង្សារនឹងគ្នានោះឡើយ។
មិនមែនជាសង្សារ តែទង្វេីយេីងក៏ដូចជាសង្សារ តែក៏មានឈ្មោះជាមិត្ត មិត្តជិតដិត ដឹងពីគ្នាសឹងគ្រប់រឿង យល់ចិត្តគ្នាស្ទេីរគ្រប់សព្វ ប្រាប់គ្នាគ្រប់អារម្មណ៍ និងបញ្ហា រាល់ថ្ងៃមានតែមិត្តម្នាក់នេះនៅក្បែរក៏គ្រប់គ្រាន់ហេីយ មិនត្រូវការសង្សារទៀតទេ។
ការពិតទៅវាក៏មិនមែនជាស្នេហាតែម្ខាងអីដែរ វាជាស្នេហាដែលយេីងមានចិត្តឱ្យគ្នាទៅវិញទៅមក គេធ្លាប់សុំខ្ញុំធ្វេីជាសង្សារតែខ្ញុំបែរជាបដិសេធ ប៉ុន្តែខ្ញុំក៏ស្រឡាញ់គេ នេះក៏ប្រហែលជាខ្ញុំស្រឡាញ់គេពេក ទេីបខ្ញុំខ្លាចពាក្យថាសង្សារ ខ្លាចពាក្យថាបែកគ្នា បែបនេះហេីយក៏ល្អ ជាមិត្តនឹងគ្នាមិនបាច់បែកគ្នា ជាមិត្តនឹងគ្នា មានខឹង មានអន់ចិត្ត តែក៏មិនបែកគ្នា មិនមានឈ្មោះថាជាសង្សារ មិនសំខាន់ សំខាន់យេីងមានក្តីស្រឡាញ់ស្មោះ ច្បាស់លាស់ចំពោះគ្នា ទៅថ្ងៃមុខយេីងក៏អាចបញ្ចប់ឈ្មោះថាជាមិត្ត ហេីយកាន់ដៃគ្នាចូលរោងការតែម្តងក៏ល្អមិនឃេីញថាទាស់ខុសអីទេ។
តែបើឱ្យបញ្ចប់ពាក្យថាមិត្ត ហើយងាកមកធ្វើជាសង្សារនឹងគ្នានៅពេលនេះ ពិតជាមិនអាចទៅរួចឡើយ ព្រោះថាក្នុងចិត្តដឹងច្បាស់ថា គឺមិនអាច ចិត្តនេះចេះតែខ្លាច ខ្លាចថា យើងនៅជាមិត្ត យើល្អនឹងគ្នា តែបើឱ្យក្លាយជាសង្សារនឹងគ្នា ច្បាស់ជាមានពេលឈ្លោះទាស់ ហើយបែកគ្នាមិនខានទេ ដូច្នេះ មានតែរក្សាឈ្មោះថាជាមិត្តបែបហ្នឹងហើយក៏ល្អដែរ ដូចពាក្យគេថា ជាមិត្តនឹងគ្នាល្អស្រាប់ហើយ៕
អត្ថបទ ៖ អេដមីន ហត់/Knongsrok
ព័ត៌មានថ្មីៗ
