សកម្មភាពសាមញ្ញទាំង ៨ ពេលព្រឹកព្រលឹម អាចជួយឲ្យអ្នកស្រកក្បាលពោះបានងាយ
មនុស្សជាច្រើនបារម្ភអំពីទម្ងន់របស់ពួកគេ ហើយអ្នកធ្លាប់ចាប់អារម្មណ៍ទេ អ្នកខ្លះធាត់តែធាត់មើលទៅស្អាត ហើយខ្លះទៀតធាត់ក៏មិនសូវមានជំងឺមកបៀតបៀនដែរ។
នោះវាមិនសំខាន់លើទម្ងន់របស់អ្នកប៉ុន្មានទេ តែវាសំខាន់ត្រង់ខ្លាញ់ក្បាលពោះរបស់អ្នក។ ជាការពិតជាខ្លាញ់លើសគឺអាចនាំឲ្យកើតមានជំងឺធ្ងន់ធ្ងរជាច្រើន ហើយការស្លៀកពាក់ក៏ពិបាកនឹងតម្រូវដែរ។ ខាងក្រោមយើងបង្ហាញពីសកម្មភាពសាមញ្ញទាំង ៨ នៅពេលព្រឹកព្រលឹមដែលអាចជួយឲ្យអ្នកឆាប់ស្រកខ្លាញ់ក្បាលពោះ៖
១) កុំតក់ក្រហល់ឬប្រញាប់
នៅពេលអ្នកងើបពីគេងយឺត ហើយប្រញាប់ប្រញាល់ខ្លាំងពេកនៅពេលព្រឹកព្រលឹម វានឹងធ្វើឲ្យអ្នកមានអារម្មណ៍ថាតានតឹង។ ជាទូទៅអរម៉ូន Cortisol ដែលវាទទួលខុសត្រូវនៅលើដំណើរការនោះនឹងមានការកើនឡើង ហើយតាមការស្រាវជ្រាវវាក៏នឹងនាំឲ្យអ្នកឡើងទម្ងន់ផងដែរ បែបនេះសូមព្យាយាមធ្វើឲ្យសកម្មភាពពេលព្រឹករបស់អ្នក ដំណើរការទៅដោយភាពស្រុះស្រាយ។
២) ធ្វើលំហាត់ប្រាណខ្លីៗ
ការហាត់ប្រាណនៅពេលព្រឹកព្រលឹមជាប្រភពថាមពលដ៏ល្អបំផុតសម្រាប់ខ្លួនប្រាណ។ សូមឧស្សាហ៍ឆ្លៀតហាត់ប្រាណមិនថាតែការរត់ ឬជិះកង់ ៣០ នាទី ទៅ ១ ម៉ោង នោះគឺអាចជួយកាត់បន្ថយខ្លាញ់ក្បាលពោះបានលឿនបំផុត។
៣) បរិភោគអាហារពេលព្រឹកដែលមានជាតិប្រូតេអ៊ីននិងសរសៃ (Fiber)
ការសិក្សាបង្ហាញថា បរិភោគអាហារដែលមានជាតិប្រូតេអ៊ីនគឺនាំឲ្យមានខ្លាញ់ក្បាលពោះតិច ឧទាហរណ៍ដូចជាសាច់ត្រី ស៊ុត សណ្តែក ហើយប្រភេទអាហារមានជាតិសរសៃមានដូចជាផ្កាខាត់នា ខាត់ណាខៀវអ្វីជាដើម។
៤) ទទួលទានទឹកជំនួសទឹកផ្លែឈើ
នៅពេលព្រឹកគួរទទួលទានទឹក ហើយកុំទម្លាប់ទទួលទានទឹកផ្លែឈើឲ្យសោះ ព្រោះវាមានផ្ទុកជាតិស្ករ ដែលនៅពេលអ្នកទម្លាប់ប្រចាំថ្ងៃនាំឲ្យធាត់ខ្លាញ់ក្បាលពោះលឿន ជាងនេះក៏នាំឲ្យកើនឡើងជាតិខ្លាញ់នៅក្នុងថ្លើមផងដែរ។
៥) ជំនួសពីការទទួលទានកាហ្វេមកជាតែបៃតង
ត្បិតបើការចាប់ផ្តើមថ្ងៃថ្មីរបស់អ្នក ជាមួយកាហ្វេអាចធ្វើឲ្យជីវិតមើលទៅស្រស់បំព្រង ប៉ុន្តែបើទម្លាប់ហ្នឹងកើតឡើងប្រចាំថ្ងៃក៏មិនសូវល្អនោះដែរ។ យល់ល្អគួរចាប់ផ្តើមជាមួយតែបៃតងដែលពុំប្រើប្រាស់សារជាតិស្ករវិញ។
៦) ខ្ចប់អាហារថ្ងៃត្រង់សម្រាប់ខ្លួនឯង
បើយល់ល្អនៅពេលព្រឹកអ្នកគួរខ្ចប់អាហារទៅកន្លែងធ្វើការឬសាលារៀន ព្រោះនៅពេលបរិភោគអាហារនៅខាងក្រៅ គឺជាទូទៅមានផ្ទុកជាតិកាឡូរីខ្ពស់ខ្លាំងណាស់។
៧) គេងឲ្យគ្រប់គ្រាន់
កុំថាគេងតិចស្រក់ទម្ងន់ ផ្ទុយទៅវិញគេងមិនគ្រប់គ្រាន់នាំឲ្យឡើងខ្លាញ់ក្បាលពោះវិញទេ។ គួរទម្លាប់គេងឲ្យបានគ្រប់គ្រាន់ត្រឹមរយៈពេល ៨ ម៉ោង តែសុំកុំលើសហ្នឹង។
៨) ថ្មើរជើងឬជិះកង់ទៅកន្លែងធ្វើការ
នេះជាសកម្មភាពដ៏ល្អបំផុត ហើយប្រសិនអ្នកធ្វើបាន គឺល្អចំពោះសុខភាពខ្លាំង។ នោះគឺការជ្រើសរើសមធ្យោបាយធ្វើដំណើរទៅសាលា តាមរយៈការថ្មើរជើង ឬជិះកង់ ជំនួសពីការធ្វើដំណើរតាមរថយន្តក្រុង ឬបើកបរនានា៕
ប្រភព៖ Brightside | ប្រែសម្រួល៖ ក្នុងស្រុក
ព័ត៌មានថ្មីៗ
