ពិតទេ កើតកូនលើយន្តហោះ កូននោះនឹងបានជិះយន្តហោះឥតគិតថ្លៃពេញមួយជីវិត?
ពុំមានរបាយការណ៍ផ្លូវការណាមួយដែលចុះផ្សាយថា កន្លងមកធ្លាប់មានស្រ្តីប៉ុន្មាននាក់ដែលបានផ្តល់កំណើតឲ្យទារក កំឡុងពេលធ្វើដំណើរលើយន្តហោះនោះទេ? ប៉ុន្តែបើតាមប្រភពគេហទំព័រមួយចុះផ្សាយថា គឺមានករណីនេះប្រមាណ ៦០ លើករួចមកហើយ។
ជឿថាអ្នកខ្លះប្រាកដជាចង់ដឹងចម្លើយ ថាតើបើកើតមានករណីបែបនោះ តើទារកនឹងត្រូវជួបរឿងអ្វីខ្លះទៅ ហើយពិតទេដែលគេថាទារកនោះនឹងអាចជិះយន្តហោះបានមួយជីវិតដោយឥតគិតថ្លៃ? ខាងក្រោមយើងបង្ហាញ ៥ រឿងដែលនឹងកើតឡើង៖
៥) នាវិកអាចសម្រេចបានថាត្រូវចុះចតភ្លាមៗបែបណា
ជាទូទៅមុនពេលហោះហើរ ក្រុមហ៊ុនអាកាសចរណ៍ទាំងអស់រមែងមានការដាក់កំហិតមួយសម្រាប់អ្នកធ្វើដំណើរ។ ដោយពួកគេត្រូវពិនិត្យចំពោះស្រ្តីមានផ្ទៃពោះ ដោយជាធម្មតាមិនឲ្យលើសពី ៣៨ សប្តាហ៍ឬខ្វះ ៣០ ថ្ងៃមុនពេលកើត មកធ្វើដំណើរលើយន្តហោះនោះទេ។
យ៉ាងណាបើមានករណីនេះកើតឡើង វាស៊ីសងលើយន្តហោះនោះដែរ ប្រសិនមានគិលានុបដ្ឋាយិកាឈរជើងម្នាក់ ក៏នឹងបង្កើតនៅលើយន្តហោះភ្លាមៗ តែបើអត់ទេក៏នឹងធ្វើការចុះចតជាបន្ទាន់។ តែជាធម្មតាសម្រាប់អ្នកបម្រើតាមយន្តហោះ ពុំមាននរណាដែលទទួលបានការបណ្ដុះបណ្ដាលនូវផ្នែកឆ្មបអ្វីនោះឡើយ។
៤) ពុំមានច្បាប់កំណត់ច្បាស់ការនៃការផ្តល់សញ្ជាតិសម្រាប់ទារកឡើយ
វាស៊ីសងលើតំបន់ដែលកំពុងហោះកាត់ ឬក្រុមហ៊ុនអាកាសចរណ៍ដែលយើងប្រើប្រាស់កំពុងពេលធ្វើដំណើរ។ ជាក់ស្តែងដូចជានៅសហរដ្ឋអាមេរិក ប្រសិនណាទារកនោះចាប់កំណើតកំឡុងពេលយន្តហោះធ្វើដំណើរកាត់ផ្នែកណាមួយនៃទឹកដីអាមេរិក នោះគេនឹងទទួលបានសញ្ជាតិអាមេរិក តែនៅចក្រភពអង់គ្លេសវិញគឺអត់ទេ ពួកគេមិនត្រូវបានអនុញ្ញាតឡើយ ហើយត្រូវមានសញ្ជាតិដូចជាម្តាយឪពុកដដែល។
៣) ក្រុមហ៊ុនអាកាសចរណ៍ខ្លះនឹងផ្តល់សំបុត្រធ្វើដំណើរឥតគិតថ្លៃដល់ទារក
នេះគឺស៊ីសងលើច្បាប់កំណត់នៃក្រុមហ៊ុនអាកាសចរណ៍នីមួយៗតែប៉ុណ្ណោះ ពោលមិនមែនទាំងអស់នោះឡើយ។
ជាក់ស្តែងដូចករណីទារកមួយដែលចាប់កំណើតលើយន្តហោះរបស់ Virgin Atlantic គឺគែទទួលបានសំបុត្រធ្វើដំណើរឥតគិតថ្លៃរហូតដល់គេមានអាយុ ២១ ឆ្នាំ រីឯករណីមួយផ្សេងទៀតកាលពីឆ្នាំ ២០១៧ ទារកមួយដែលកើតលើយន្តហោះរបស់ក្រុមហ៊ុន Spirit Airrlines គឺទទួលបានការធ្វើដំណើរឥតគិតថ្លៃមួយជីវិត តែសម្រាប់តែថ្ងៃបុណ្យកំណើតរបស់គេតែប៉ុណ្ណោះជារៀងរាល់ឆ្នាំ។
២) ទទួលបានការផ្តល់តម្លៃនិងកិត្តិយសដ៏ធំធេងពីក្រុមហ៊ុនអាកាសចរណ៍
ស្រដៀងនឹងចំណុចទី ៣ នេះ ដោយចំណុចនេះគឺថា ដូចនៅឆ្នាំ ២០១៩ ក្រុមហ៊ុន JetBlue បានផ្លាស់ប្តូរឈ្មោះយន្តហោះរបស់ខ្លួនមួយទៅជា "Born to Be Blue" ក្រោយមានទារកចាប់កំណើតនៅលើនោះ។
ករណីផ្សេងទៀតនៅឆ្នាំ ២០១៨ ទារិកាម្នាក់កើតនៅលើយន្តហោះរបស់ Chick-fil-A នាងទទួលបានការផ្តល់ជូននូវអាហារមួយជីវិត ហើយថែមទាំងធានានឹងផ្តល់ជូនការងារសមរម្យមួយពេលនាងគ្រប់អាយុទៀតផង។
១) សុខភាពទារកនឹងមិនសូវល្អទេ
មានហេតុផលមួយចំនួនដែលការផ្តល់កំណើតឲ្យទារកលើយន្តហោះមិនជារឿងល្អទេ ជាក់ស្តែងដូចជាស្ថានភាពខ្យល់នៅក្នុងនោះមិនសូវជាល្អ ហើយពិបាកសម្រាប់ទារកក្នុងការដកដង្ហើម និងមួយផ្សេងទៀតពុំមានបច្ចេកវិទ្យាទំនើប ឬគ្រប់គ្រាន់ដូចនៅមន្ទីរពេទ្យក្នុងការមើលថែទាំទារកបានល្អឡើយក្រោយចាប់កំណើតភ្លាមៗ។ អ្វីដែលសំខាន់ដោយសារសម្ពាធខ្យល់ខ្ពស់ អាចនឹងបណ្តាលឲ្យទារកខូចត្រចៀក ឬការស្តាប់ចុះខ្សោយក៏មាន៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
