ជាទូទៅគេលេបថ្នាំ ផឹកទឹក ចុះបើប្តូរមកផឹកទឹកដោះគោជំនួស តើអាចមានគ្រោះថ្នាក់ដែរទេ?
ជាការពិតនៅពេលយើងលេបថ្នាំ គឺយើងត្រូវលេបជាមួយការទទួលទានទឹក ដោយអាចជាទឹកត្រជាក់ឬទឹកក្តៅអ៊ុនៗ។ ចុះអ្នកធ្លាប់គិតឬឆ្ងល់ដែរទេ ថាបើប្តូរមកទទួលទានស្របគ្នាជាមួយទឹកដោះគោ ជំនួសទឹក តើវាអាចមានផលប៉ះពាល់អ្វីដែរឬទេ?
ចម្លើយ៖ បើនិយាយថាប៉ះពាល់ដល់អាយុជីវិត នោះគឺអត់ទេ ប៉ុន្តែគ្រាន់ថា ប្រតិកម្មរវាងថ្នាំនិងទឹកដោះគោ វាធ្វើឲ្យថ្នាំលែងមានប្រសិទ្ធភាព ឬប្រសិទ្ធភាពត្រូវបានចុះថយមកកម្រិតទាបបំផុត។
នោះក៏ដោយសារតែទឹកដោះគោមានផ្ទុកនូវជាតិកាល់ស្យូមខ្ពស់ ហើយនៅពេលដែលវាប៉ះជាមួយថ្នាំ វានឹងធ្វើឲ្យថ្នាំលែងមានប្រសិទ្ធភាព បែបនេះទើបវេជ្ជបណ្ឌិតហាមដាច់ខាតមិនឲ្យអ្នករាល់គ្នាទទួលទានទឹកដោះគោជាមួយថ្នាំនោះឡើយ ហើយត្រូវជ្រើសរើសយកទឹកមកទទួលទានគឺល្អបំផុត។
ព្រោះដោយសារមិនមានផ្ទុកនូវសារធាតុចិញ្ចឹមអ្វីនោះទេ បែបនេះវាគ្មានប្រតិកម្មអ្វីជាមួយនឹងថ្នាំឡើយ។
មួយផ្សេងទៀតអ្នកជំនាញផ្នែកសុខភាពសូមណែនាំឲ្យអ្នករាល់គ្នាដឹងថា ក្រោយពេលទទួលទានទឹកដោះគោ សូមទុកពោះឲ្យទំនេររយៈ ពេល ២ ម៉ោងសឹមអាចទទួលទានថ្នាំបាន ព្រោះទឹកដោះគោដែលនៅក្នុងពោះ វាមិនទាន់រលាយអស់ ហើយវាក៏នៅតែមានប្រតិកម្មក្នុងផ្នែកពោះវៀនកំឡុងរយៈពេល ២ ម៉ោងនោះ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
