ប្រយ័ត្នប៉ះពាល់កូនក្នុងផ្ទៃ ទោះចាញ់ខ្លាំងប៉ុណ្ណា ស្រ្តីពពោះត្រូវតែជៀសឲ្យបានរបស់ទាំង ៥ នេះ
ជាទូទៅស្រ្តីពពោះ ប្រាកដជាជួបអាការៈម្យ៉ាងដែលហៅថា "ចាញ់កូន" គឺពេលនោះចំណង់នៃការចង់ទទួលអាហាររបស់ពួកគេ គឺប្លែកខុសពីសព្វដង ហើយរបស់ខ្លះមិនដែលចេះទទួលទានសោះក៏សុខៗឃ្លានដែរ។ គេជឿថាពេលខ្លះមកពីឥទ្ធិពលនៃកូនក្នុងផ្ទៃ ដែលទារកជាអ្នកចង់ទេ មិនមែនម្តាយនោះទេ។
យ៉ាងណតាមការណែនាំពីអ្នកជំនាញបានចែករំលែកទៅកាន់ស្រ្តីពពោះគ្រប់រូប ថាបើទោះបីជាចាញ់ខ្លាំងប៉ុណ្ណា ក៏ត្រូវតែជៀសឲ្យបាននៅអាហារ&ភេសជ្ជៈ ៥ ប្រភេទខាងក្រោម៖
៥) ភេសជ្ជៈមិនល្អ
ជាទូទៅ ៧០ ភាគរយនៃរាងកាយមនុស្សគឺជាទឹក បែបនេះទឹកពិតជាមានសារៈសំខាន់ខ្លាំងណាស់សម្រាប់មនុស្ស។ យ៉ាងណាមិនថាតែមនុស្សទូទៅ ឬស្រ្តីពពោះ គឺត្រូវរក្សាជាតិទឹកឲ្យបានគ្រប់គ្រាន់នៅក្នុងខ្លួន។
ប៉ុន្តែក្នុងកាលៈទេសៈសម្រាប់ស្រ្តីពពោះ ចាំបាច់ត្រូវតែទទួលទានទឹកស្អាត ឬទឹកបរិសុទ្ធដែលឆ្លងកាត់ការបន្សុទ្ធត្រឹមត្រូវ ព្រោះវាងាយមានហានិភ័យឆ្លងទៅកាន់ទារកខ្លាំងណាស់ ប្រសិនយើងទទួលទានទឹកដែលមានមេរោគ។
ក្រៅពីនេះភេសជ្ជៈដូចជាស្រាបៀ កាហ្វេ ឬភេសជ្ជៈប៉ូវកម្លាំងផ្សេងៗ គួរតែផ្អាកក្នុងកាលៈទេសៈនៃពេលពពោះ ព្រោះងាយនឹងកើតមានជំងឺថ្លើម ឬតម្រង់នោមមិនល្អ ដែលកើតទាំងលើស្រ្តីជាម្តាយផងនិងកូនក្នុងផ្ទៃផង។
៤) អាហារមានជាតិខ្លាញ់
កុំបរិភោគអាហារដែលមានជាតិខ្លាញ់ច្រើនពេក បើទោះបីវាឆ្ងាញ់ឬអ្នកចង់កម្រិតណាក៏ដោយ។ ព្រោះប្រភេទអាហារនេះ វាពិបាកគ្រប់គ្រងទម្ងន់ ហើយងាយនឹងធាត់ និងជះឥទ្ធិពលអាក្រក់ដល់ទារកថែមទៀត។
ជាពិសេសប្រភេទអាហារចៀនឬបំពងដែលគេលក់តាមដងផ្លូវ ដែលប្រើប្រាស់ប្រេងខ្លាញ់មិនល្អមកចម្អិនគឺប៉ះពាល់ខ្លាំងបំផុត។
៣) អាហារដែលមានជាតិស្ករនិងកាឡូរីខ្ពស់
ក្នុងកំឡុងពេលពពោះ ស្រ្តីគ្រប់រូបគួរតែបន្ថែមអាហារដែលមានសារធាតុចិញ្ចឹមច្រើន ហើយអាហារដែលមានជាតិស្ករនិងកាឡូរីខ្ពស់គួរតែត្រូវកាត់បន្ថយ ព្រោះក្នុងពេលនេះស្រ្តីងាយនឹងឡើងទម្ងន់ឆាប់រហ័សបំផុត បើបណ្តោយខ្លួន។
២) អាហារជ្រក់
អាហារដែលគេធ្វើជ្រក់ត្រាំទុកយូរ មិនជាអាហារល្អសម្រាប់ស្រ្តីកំពុងពពោះឡើយ ព្រោះវាមានផ្ទុកជាតិអំបិលខ្លាំងលើសលប់ ដែលមិនល្អចំពោះបេះដូង និងអាចបង្កឲ្យមានជំងឺជាច្រើនទៀត។ អាហារប្រៃក៏ងាយនឹងឲ្យទារក ផ្លាស់ប្តូរការច្រោះទឹកភ្លោះ។
១) អាហារដែលហឹរ
អាហារហឹរខ្លាំងក៏មិនល្អនោះដែរ សម្រាប់ប្រព័ន្ធរំលាយអាហាររបស់ស្រ្តី ក្នុងកំឡុងពេលពពោះ។ ដោយពេលដែលម្តាយមានជំងឺក្រពះ ឬពោះវៀនមិនល្អ នោះប្រាកដជាទាមទារឲ្យលេបថ្នាំ អ៊ីចឹងជាតិថ្នាំចូលខ្លួនច្រើន គឺងាយនឹងប៉ះពាល់ដល់ការអភិវឌ្ឍផ្នែកប្រព័ន្ធប្រសាទរបស់ទារក៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
