តាមការស្រាវជ្រាវ៖ មនុស្សដែលធ្វើរឿងសាមញ្ញ ១០ យ៉ាងនេះអាចបន្ថែមអាយុឲ្យវែងជាងមុន
ក្រៅពីកត្តាចំណីអាហារ ជាងនេះរបៀបរបបនៃការរស់នៅប្រចាំថ្ងៃ ក៏ជាកត្តាកំណត់អាយុរបស់អ្នកបានផងដែរ។ បើសុខភាពផ្លូវកាយល្អ ហើយសុខភាពផ្លូវចិត្តមិនអំណោយទានផង ភាពទ្រុឌទ្រោមនៃការរាងកាយក៏ចុះអន់ថយទៅតាមនោះ។
តាមរបាយការណ៍ស្រាវជ្រាវពីអ្នកវិទ្យាសាស្រ្តបានបង្ហាញថា សកម្មភាពសាមញ្ញ ១០ យ៉ាងនេះ អាចជួយបន្ថែមចំនួនឆ្នាំនៃអាយុរបស់មនុស្សឲ្យរស់បានយូរជាងមុន៖
១០) មានរាងកាយស្គម
សម្រាប់មនុស្សធាត់ គឺជាទូទៅមានអាយុតិចជាងមនុស្សស្គម។ ដោយការស្រាវជ្រាវបានបង្ហាញថា មនុស្សដែលមានខ្លាញ់ក្បាលពោះ និងលើសទម្ងន់ ងាយនឹងវិវត្តទៅកើតជំងឺទឹកនោមផ្អែម និងជំងឺដាច់សរសៃឈាមបេះដូង។
៩) ការគិតវិជ្ជមាននិងសប្បាយរីករាយ
ការដែលមានអារម្មណ៍សប្បាយរីករាយ នោះហើយជាសេចក្តីសុខផ្លូវចិត្ត។ អ្នកត្រូវប្រើប្រាស់ការរស់នៅបែបសុទិដ្ឋិនិយម ដែលគិតវិជ្ជមានឲ្យបានច្រើន ហើយកុំសូវមានអារម្មណ៍អវិជ្ជមានទៅលើមជ្ឈដ្ឋានខាងក្រៅខ្លាំងពេក។
៨) សើចឲ្យបានច្រើន
ការដែលសើចឲ្យបានច្រើន ក៏អាចបន្ថែមគុណភាពនៃអាយុជីវិតរបស់យើងម្នាក់ៗបានផងដែរ។ មនុស្សដែលសើចច្រើន មិនងាយនឹងកើតជំងឺបេះដូង ហើយសុខភាពប្រព័ន្ធប្រសាទក៏ដំណើរការបានល្អផងដែរ។
៧) ការរស់នៅមានរបៀបរៀបរយ
តាមការសិក្សាមួយបង្ហាញថា បុគ្គលដែលមានទំនោរទៅលើការរស់នៅដោយរបៀបរៀបរយ គឺពួកគេក៏រមែងមានការគិត និងដាក់វិន័យទៅលើការទទួលទាន ឬការប៉ះពាល់នានាលើសុខភាពរបស់ខ្លួនឯងផងដែរ។
៦) ដើរឲ្យបានច្រើន
ការដែលធ្វើឲ្យខ្លួនប្រាណមិនមានសកម្មភាពរយៈពេល ៣០ នាទី នាំឲ្យមានហានិភ័យនៃការកើតជំងឺផ្សេងៗប្រមាណ ៣២ ភាគរយ។ ល្អបំផុតគួរដើរចន្លោះពី ២ ១០០ ទៅ ៤ ៥០០ ជំហានក្នុងមួយថ្ងៃ ដើម្បីបញ្ចៀសការកើតមានជំងឺគាំងបេះដូង និងជំងឺដាច់សរសៃឈាមខួរក្បាល។
៥) ទៅខាងក្រៅ
មិនចាំបាច់ជាប់លាប់ឬជាប្រចាំនោះទេ ម្តងម្កាលមានពេលវេលាចេញទៅខាងក្រៅផ្ទះខ្លះ នោះគឺល្អបំផុតហើយ។ តាមការស្រាវជ្រាវ មនុស្សដែលឃុំខ្លួនឯងរមែងមានហានិភ័យនៃការចុះខ្សោយប្រព័ន្ធភាពសាំ និងបណ្តាលឲ្យស្រ្តេសលឿន។
៤) មានកូនក្រោយអាយុ ៣៣ ឆ្នាំ
តាមការស្រាវជ្រាវបង្ហាញថា ការដែលមានកូនក្រោយអាយុ ៣៣ ឆ្នាំ កម្រិតអាយុរបស់អ្នកក៏នឹងរស់បានយូរជាងមុនផងដែរ។
៣) មើលថែចៅៗ
សកម្មភាពនេះមើលទៅសាមញ្ញ តែវាក៏ជាកត្តាដែលជួយបង្កើនអាយុរបស់អ្នកផងដែរ។ អ្នកអាចចំណាយពេលវេលាជាមួយក្មេងតូចៗ ដែលអាចជាចៅបង្កើត ឬប្រសិនណាគ្មានចៅ ក៏អាចបង្កើតភាពយកចិត្តទុកដាក់ជាមួយអ្នកខាងក្រៅក៏បាន។
២) ធ្វើការងារផ្ទះ
ការធ្វើលំហាត់ប្រាណជាប់លាប់នាំឲ្យអ្នករស់បានយូរជាងមុន។ តាមពិតទៅសកម្មភាពការងារនៅផ្ទះ ក៏មិនខុសពីការធ្វើលំហាត់ប្រាណដែរ ឧទាហរណ៍ដូចការជូតសម្អាតបង្អួច ៣០ នាទីអាចដុតកាឡូរីក្នុងខ្លួនបាន ១៩០ កាឡូរីឯណោះ។
១) មើលថែសុខភាពធ្មេញ
វាជាធម្មជាតិរបស់មនុស្សយើងម្នាក់ៗ ហើយត្រូវតែដុះសម្អាតឲ្យបានស្អាតយ៉ាងហោចណាស់ ២ ដង/ថ្ងៃ ពោលគឺរៀងរាល់ព្រឹកនិងមុនពេលចូលគេង ហើយឧស្សាហ៍ទៅឆែកមើលជាមួយទន្តពេទ្យជាប្រចាំផង៕
ប្រភព៖ Brightside | ប្រែសម្រួល៖ ក្នុងស្រុក
ព័ត៌មានថ្មីៗ
