ជួយទាំងស្បែក ជួយទាំងស្រកទម្ងន់ គ្រាប់ផ្កាឈូករ័ត្នពោរពេញដោយអត្ថប្រយោជន៍ ១០ យ៉ាងនេះ
ជឿថាមនុស្សភាគច្រើនប្រាកដជាស្គាល់ ហើយធ្លាប់បានទទួលទាននូវគ្រាប់ផ្កាឈូករ័ត្ន ព្រោះវាងាយស្រួលរកទិញ និងមានតម្លៃធូរថ្លៃ។ ខ្លះគិតថាគ្រាន់តែយកមកតេសកុំឲ្យអផ្សុកមាត់ ប៉ុន្តែការពិតទៅវាមានអត្ថប្រយោជន៍ធំៗដល់ទៅ ១០ ដែលល្អចំពោះសុខភាពជាច្រើនផ្នែក៖
១០) កាត់បន្ថយកម្រិតកូឡេស្តេរ៉ុល
សារធាតុ Polyunsaturated ក្នុងគ្រាប់ផ្កាឈូករ័ត្ន វាអាចចូលទៅជួយកាត់បន្ថយកម្រិតកូឡេស្តេរ៉ុលអាក្រក់ ដែលមានហានិភ័យអាចបណ្តាលឲ្យយើងកើតជំងឺដាច់សរសៃឈាមបេះដូង។
៩) ល្អសម្រាប់សុខភាពឆ្អឹង
ឆ្អឹងជាជាលិកាដែលត្រូវការសារធាតុចិញ្ចឹម ដូចជាផ្នែកផ្សេងទៀតនៃរាងកាយអ៊ីចឹងដែរ ហើយសារធាតុម៉ាញេសូម រ៉ែ និងផូរស្វ័រជាដើមគឺសុទ្ធសឹងតែមាននៅក្នុងគ្រាប់ផ្កាឈូករ័ត្ន។
៨) ជួយគ្រប់គ្រងជាតិស្ករក្នុងឈាម
សម្រាប់មនុស្សភាគច្រើនដែលឧស្សាហ៍ទទួលទានគ្រាប់ផ្កាឈូករ័ត្ន គឺនឹងទទួលបានការគ្រប់គ្រងកម្រិតជាតិស្ករក្នុងឈាមបានល្អប្រសើរជាងមុន នោះក៏ដោយសារតែវាមានផ្ទុកនូវសរសៃ ដែលអាចកាត់បន្ថយនូវការស្រូបយកជាតិស្ករក្នុងឈាម ស្របពេលដែលម៉ាញេសូមវាពង្រឹងនូវបម្រែបម្រួលនៃអាំងស៊ុយលីន។
៧) ពង្រឹងការបន្សាបជាតិពុល
សេលេញ៉ូមគឺជាសារធាតុរ៉ែដ៏សំខាន់ដែលវាចូលទៅកម្ចាត់នូវកាកសំណល់អាក្រក់ក្នុងរាងកាយ និយាយស្រួលស្តាប់ទៅគ្រាប់ផ្កាឈូករ័ត្នវាអាចជួយពង្រឹងប្រព័ន្ធប្រឆាំងអុកស៊ីតកម្មក្នុងរាងកាយបានល្អប្រសើរ ហើយក៏ជួយការពារថ្លើមពីផលប៉ះពាល់នៃការរំលាយអាហារដែលមានកាកសំណល់មិនល្អនានាផងដែរ។
៦) ល្អសម្រាប់សុខភាពស្បែក
វាមានផ្ទុកនូវវីតាមីន E ដែលដើរតួយ៉ាងសំខាន់ក្នុងការថែរក្សាសុខភាពស្បែក និងជួយកាត់បន្ថយការខូចខាតនៅកោសិកាស្បែកដែលបណ្តាលមកពីកាំរស្មី UV ហើយជួយឲ្យស្បែកមើលទៅក្មេងជាងវ័យ។
៥) ធ្វើឲ្យអារម្មណ៍របស់អ្នកល្អប្រសើរឡើង
ជាងនេះក៏ក៏ជួយដល់ផ្លូវអារម្មណ៍របស់អ្នកឲ្យទទួលបានភាពស្រស់ថ្លាផងដែរ ហើយជួយកាត់បន្ថយនូវការផលិតអ័រម៉ូនស្រ្តេស។
៤) ជាប្រភពនៃប្រូតេអ៊ីន
ប្រសិនបើអ្នកមិនចូលចិត្តបរិភោគសាច់ អ៊ីចឹងអាចងាកមកតេសៗគ្រាប់ផ្កាឈូករ័ត្នបាន ដោយវាអាចផ្តល់ឲ្យដល់ទៅ ៤០ ភាគរយនៃបរិមាណប្រូតេអ៊ីនដែលអ្នកត្រូវការប្រចាំថ្ងៃគឺប្រមាណ ១០០ ក្រាម។
៣) ជួយពង្រឹងការសម្រកទម្ងន់
វាមានសារធាតុចិញ្ចឹម ដែលអាចជួយឲ្យអ្នកស្រកទម្ងន់ ដូចជាជាតិសរសៃ និងវីតាមីន B។ នៅពេលជាតិសរសៃបន្ថែមទៅក្នុងក្រពះកាន់តែច្រើន វាធ្វើឲ្យការស្រូបយកគ្លុយកូសមានការថយចុះ ហើយធ្វើឲ្យអ្នកឆ្អែតបានយូរ។
២) ជួយការពារជំងឺមហារីក
វាមានសារធាតុរ៉ែដ៏កម្រ ដូចជាសេលេញ៉ូម ដែលអាចជួយបន្សាបកោសិកាមហារីក និងជួយប្រឆាំងការបណ្តាលឲ្យមានជំងឺសរសៃប្រសាទ។
១) បន្ថយការឡើងសម្ពាធឈាម
វាក៏មានផ្ទុកនូវសារធាតុរ៉ែដែលជួយគ្រប់គ្រងសម្ពាធឈាម រួមមាន កាល់ស្យួម ប៉ូតាស្យូមនិងម៉ាញេស្យូម។ ដោយវាអាចជួយរក្សាសម្ពាធឈាមឲ្យនៅធម្មតា និងជួយគ្រប់គ្រងនៅការបត់បែននៃសរសៃឈាម៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
