ក្មេងៗចេញកន្តួលលើស្បែកមិនមែនសុទ្ធតែស្អូចឬអុតស្វាយទេ ប្រយ័ត្នតែកើតជំងឺធ្ងន់ធ្ងរមួយនេះ
ជាទូទៅតាមការកំណត់ចំណាំពីឪពុកម្តាយភាគច្រើន ឲ្យតែកូនតូចៗកើតមានកន្តួលលើស្បែកមិនថាតែបរិវេណដៃឬមុខ អ្នកប្រាកដជាសន្និដ្ឋានថាវាជាស្អូច ឬអុតស្វាយ ហើយត្រឹមណែនាំឲ្យពួកគេបរិភោគទឹកឬងូតទឹកឲ្យច្រើន។
យ៉ាងណាមិញតាមការណែនាំពីអ្នកជំនាញនៃទំព័រ គ្លីនិកឯកទេសកុមារ Pediatric Clinic បានបង្ហោះសារលើបណ្តាញសង្គម ថារោគសញ្ញាខាងលើ វាអាចជាជំងឺប្រភេទម្យ៉ាងទៀត ហើយឪពុកម្តាយគួរតែត្រួតពិនិត្យឲ្យបានច្បាស់ ជៀសវាងមានបញ្ហាធំទៅថ្ងៃក្រោយ។
ជាមួយការចុច Share រាប់ពាន់ដង អត្ថន័យពីប្រភពខាងលើសរសេររៀបរាប់ថា៖ "ក្មេងចេញកន្តួលស្បែកមិនមែនសុទ្ឋតែស្អូច ឬអ៊ុតស្វាយនោះទេ។ ប្រយ័ត្នជាជំងឺ ពងបែកមាត់ដៃជេីង ដែលគេហៅថា Hand-Foot-and-Mouth Disease។ វាគឺជាជំងឺពងបែកមួយប្រភេទដែលកើតលើបាតដៃ បាតជើង និងនៅក្នុងមាត់ ហើយអាចវិវត្តនៅលើដងខ្លួនកុមារតែម្តង ដែលច្រើនជួបញឹកញាប់លើកុមារអាយុក្រោម5ឆ្នាំ។
មូលហេតុនិងការចម្លង៖
ជំងឺនេះបង្កឡើងដោយវីរុស2ប្រភេទ៖
- Coxsackievirus ដែលកើតមានញឹកញាប់ហើយមានលក្ខណះស្រាល
- Enterovirus 71(EV-71) មានអត្រាកើតតិចតួច ប៉ុន្តែអាចវិវត្តធ្ងន់ធ្ងរនិងប៉ះពាល់អាយុជីវិតកុមារបាន
ជំងឺនេះឆ្លងតាមរយះការក្អកកណ្តាស់ រឺតាមការប៉ះផ្ទាល់ជាមួយនឹងដំបៅ,ទឹករងៃ,លាមកក្មេងជាដើម។
រោគសញ្ញារួមមាន៖ ក្តៅខ្លួន, អស់កម្លាំង, ចំនីអាហារថយចុះ, ឈឺក, កន្ទួលក្រហមរឺពងទឹកលើស្បែក,បាតដៃ,បាតជើង និងនៅក្នុងប្រអប់មាត់
ជំងឺនេះក៏អាចវិវត្តទៅជារលាកខួរក្បាល(Encephalitis), រលាកស្រោមខួរក្បាល(Aseptic meningitis), និងអាចឲកុមារស្លាប់ផងដែរដោយសារតែ EV-71។
#ការធ្វើរោគវិនិច្ឆ័យ៖ ជំងឺនេះអាចធ្វើរោគវិនិច្ឆ័យគ្លីនិកដោយគ្រូពេទ្យជំនាញ និងអាចយកសំណាកខ្ទុះ,ទឹករងៃនៅបំពង់ករឺស្បែកទៅពិនិត្យបាន។
#ការព្យាបាល៖ មិនមានការព្យាបាលជាក់លាក់នៅឡើយទេអំពីជំងឺនេះ គឺគេព្យាបាលលើរោគសញ្ញាដែលកុមារមានដោយបន្ថយកំដៅរាងកាយ(Fever relief), បន្ថយការឈឺចាប់(Pain relief), ការប្រើថ្នាំលាបសម្លាប់មេរោគលើស្បែកដំបៅ, កាត់បន្ថយការបាត់បង់ជាតិទឹកលើកុមារ។
#វិធានការការពារ៖ ដោយសារតែជំងឺពងបែកងាយឆ្លងពីមនុស្សម្នាក់ទៅម្នាក់ទៀតដោយការក្អក កណ្តាស់ រឺការប៉ះផ្ទាល់ ដូច្នេះឧស្សាហ៍លាងសម្អាតដៃកុមារ, ចៀសវាងការប៉ះផ្ទាល់ជាមួយអ្នកជំងឺ, គប្បីឲកុមារមានជំងឺនេះសម្រាកព្យាបាលនៅផ្ទះរឺមន្ទីរពេទ្យ ដើម្បីចៀសវាងការចម្លងពីកុមារម្នាក់ទៅម្នាក់ទៀត"៕
ប្រភព៖ គ្លីនិកឯកទេសកុមារ Pediatric Clinic
ព័ត៌មានថ្មីៗ
