គ្រោះមិនចេះចប់! ពេលនេះចិនរងគ្រោះព្រោះទឹកជំនន់ បណ្ដាលឱ្យប្រជាជនជាង ៣២០,០០០ នាក់រងផលប៉ះពាល់យ៉ាងខ្លាំង នៅខេត្តក្វាងស៊ីប្រទេសចិន
ប្រទេសចិន ៖ អាជ្ញាធរក្នុងតំបន់ក្វាងស៊ីបាននិយាយកាលពីថ្ងៃអាទិត្យថា មានប្រជាជនជាង ៣២០.០០០ នាក់បានរងផលប៉ះពាល់ដោយជំនន់ទឹកភ្លៀងនៅតំបន់ស្វយ័តក្វាងស៊ីស៊ីង ភាគខាងត្បូងរបស់ប្រទេសចិនចាប់តាំងពីថ្ងៃទី ៤ ខែមិថុនាមកម្ល៉េះ។
គិតត្រឹមម៉ោង ៥ ល្ងាច នាយកដ្ឋានឆ្លើយតបគ្រាអាសន្នប្រចាំតំបន់នេះបានឱ្យដឹងកាលពីថ្ងៃសៅរ៍ថា ដីដាំដុះជាង ១៤.០០០ ហិកតានៅក្នុងតំបន់ ត្រូវបានខូចខាតទាំងស្រុង ហើយក៏មានមនុស្សម្នាក់បានស្លាប់ដោយសាររន្ទះបាញ់ផងដែរ។
ការិយាល័យឧតុនិយមក្នុងតំបន់បានបង្កើនការឆ្លើយតបជាបន្ទាន់ចំពោះគ្រោះមហន្តរាយអាកាសធាតុដល់កម្រិតទី ២ ពីកម្រិតទី ៣ នៅព្រឹកថ្ងៃអាទិត្យ។ គួរបញ្ជាក់ផងដែរថា ស្ថានីយ៍ត្រួតពិនិត្យកម្រិតទឹកចំនួន ៣៦ នៅខេត្តក្វាងស៊ីបានរាយការណ៍ពីកម្រិតប្រកាសអាសន្នទឹកដោយសារមានភ្លៀងធ្លាក់យ៉ាងខ្លាំងឥតឈប់រឈរ។
ជំនន់ទឹកភ្លៀងនេះក៏បណ្តាលឱ្យមានការរអិលបាក់ដី ដែលនាំឱ្យមានការដួលរលំផ្ទះ និងផ្លូវថ្នល់ដែលត្រូវបានបំផ្លាញក្នុងតំបន់ធានធានលីនក្រុងប៊ូសថែមទៀតផង។ ចំណែកឯតំបន់ទេសចរណ៍មួយចំនួនដូចជាទីក្រុងហ៊ូចូវត្រូវបានបិទជាបណ្តោះអាសន្ន៕
ប្រភព ៖ globaltimes
ព័ត៌មានថ្មីៗ
