តំបន់បឹងកេងកង១ ត្រូវបានផេគក្រសួងអប់រំ យុវជន និងកីឡា ណែនាំឱ្យមានការប្រុងប្រយ័ត្នឱ្យបានខ្ពស់ ឬចៀសវាងការប្រាស្រ័យទាក់ទងជិតស្និទ្ធនៅម្ដុំតំបន់នេះ
សេចក្ដីណែនាំស្តីពីការបង្កើនការប្រុងប្រយ័ត្ន ការចូលរួមបង្ការ និងការទប់ស្កាត់ការរីករាលដាលនៃជំងឺកូវីដ-១៩
យោងលើសេចក្តីជូនព័ត៌មានចុះថ្ងៃទី១២ ខែមេសា ឆ្នាំ២០២០ របស់ក្រសួងសុខាភិបាលបានឲ្យដឹងថាមានករណីវិជ្ជមានកូវីដ-១៩ ថ្មី ០២នាក់ ស្នាក់នៅបន្ទប់មួយ (Apartment) នៅផ្លូវលេខ ៣០២ សង្កាត់បឹងកេងកង១ រាជធានីភ្នំពេញ និងកំពុងសម្រាកព្យាបាលនៅមណ្ឌលសុខភាពចាក់អង្រែក្រោម។
ដើម្បីបង្កើនការចូលរួមបង្ការ និងការទប់ស្កាត់ការរីករាលដាលនៃជំងឺកូវីដ-១៩ និងស្របតាមអនុសាសន៍ប្រមុខរាជរដ្ឋាភិបាលកម្ពុជា ក្រសួងអប់រំ យុវជន និងកីឡា សូមជូនដំណឹងដល់បុគ្គលិកអប់រំគ្រប់លំដាប់ថ្នាក់ និងសិស្សានុសិស្សគ្រប់កម្រិតសិក្សា បង្កើនការប្រុងប្រយ័ត្ន ការចូលរួមបង្ការ និងការទប់ស្កាត់ការរីករាលដាលនៃជំងឺកូវីដ-១៩ ដោយចៀសវាងការទទួលទានអាហារក្រៅផ្ទះបើមិនចាំបាច់ ជាពិសេសចៀសវាងការទទួលទានអាហារ និងប្រាស្រ័យទាក់ទងជិតស្និទ្ធម្តុំសង្កាត់បឹងកេងកង១សិន ក្នុងកំឡុងពេលក្រុមការងារក្រសួងសុខាភិបាលកំពុងបំពេញការងារយ៉ងយកចិត្តទុកដាក់តាមរកអ្នកទាក់ទងផ្ទាល់ និងប្រយោលជាមួយករណីវិជ្ជមានកូវីដ-១៩ ថ្មី ០២នាក់ខាងលើ។
អាស្រ័យហេតុនេះ សូមគ្រប់ភាគីពាក់ព័ន្ធខាងលើ បន្តអនុវត្តន៍ការណែនាំនានារបស់ក្រសួងអប់រំ យុវជន និងកីឡា និងក្រសួងសុខាភិបាល ទាក់ទងការចូលរួមបង្ការ និងទប់ស្កាត់ការរីករាលដាលនៃជំងឺកូវីដ-១៩។
ទទួលបានសេចក្តីណែនាំនេះ ភាគីពាក់ព័ន្ធខាងលើ ត្រូវអនុវត្តន៍ប្រកបដោយស្មារតីទទួលខុសត្រូវខ្ពស់ និងសូមតាមដានប្រកបដោយការយកចិត្តទុកដាក់លើខ្លឹមសារបន្ថែមរបស់ក្រសួងអប់រំ យុវជន និងកីឡា និងក្រសួងសុខាភិបាលជាប្រចាំ៕
ដកស្រង់ទាំងស្រុងពីគេហទំព័រ ក្រសួងអប់រំយុវជន និងកីឡា
ព័ត៌មានថ្មីៗ
