ឡូយកប់រដូវការចំការស្បៃរឿងជើងភ្នំសំពៅថ្មី សម្រាប់ថ្ងៃឆ្លងឆ្នាំស្អាតអស់ទាស់ ថែមទាំងមានកន្លែងជួបជុំគ្នាទល់ភ្លឺទៀត
បាត់ដំបង៖ ខេត្តបាត់ដំបង គឺជាខេត្តទេសចរណ៍ដ៏ល្បីមួយ ដែលមានទីកន្លែងប្រវត្តិសាស្រ្ត និងទេសភាពភ្នំតូចធំសម្រាប់ដើរកម្សាន្តស្ទើរតែរាប់មិនអស់ សុទ្ធតែមានភាពស្រស់ស្អាតបរិយាកាសស្រស់ស្រាយជាច្រើនកន្លែង។
នៅក្នុងនោះ ចំការផ្កាស្បៃរឿងជើងភ្នំសំពៅ ត្រូវបានគេដឹងថាជាកន្លែងកម្សាន្តដ៏ពិសេសមួយសម្រាប់អ្នកបាត់ដំបង និងអ្នកទេសចរណ៍មកពីគ្រប់ទិសទីផងដែរ ដោយទីនោះមានផ្ទៃដីទំហំធំដាំទៅដោយផ្កាស្បៃរឿងជាច្រើនដើម និងដើមផ្កាជាច្រើនដើមទៀត ផ្តល់នូវទេសភាពលឿងខ្ចីដូចក្រាលព្រំមាស។
ថ្មីៗនេះផងដែរ ចំការស្បៃរឿងត្រូវបានគេដាំលម្អថ្មី និងកាន់តែមានចំនួនច្រើនជាងមុន មានទេសភាពស្រស់ស្អាតមែនទែនដើម្បីស្វាគមន៍ភ្ញៀវមកកម្សាន្តនៅក្នុងរដូវការថ្មី ពិសេសសម្រាប់ថ្ងៃឆ្លងឆ្នាំតែម្តង។ នៅក្នុងនោះក្រៅពីមកថតរូបកម្សាន្ត នៅទីនោះថែមទាំងមានកន្លែងអង្គុយទទួលទានអាហារជុំគ្នាទាំងពេលថ្ងៃ និងជួបជុះមិត្តភក្តិឆ្លងឆ្នាំដាច់យប់ផងដែរ។
គួរឱ្យដឹងផងដែរថា ចំការផ្កាស្បៃរឿងជើងភ្នំសំពៅ មានទីតាំងស្ថិតនៅក្នុងភូមិភ្នំសំពៅកើត ឃុំភ្នំសំពៅ ស្រុកបាណន់ ខេត្តបាត់ដំបង ( ចុះពីផ្លូវជាតិ ៥៧ ប្រហែល៥០០ម៉ែត្រ ស្របតាមសាលារៀន បឋមសិក្សា សម្ដេចឪ សម្ដេចម៉ែ) ៕
រក្សាសិទ្ធអត្ថបទ៖ ក្នុងស្រុក
ប្រភពរូបភាព៖ ចំការផ្កាស្បៃរឿងជើងភ្នំសំពៅ
ព័ត៌មានថ្មីៗ
