រិះគន់រឿងអត់ប្រយោជន៍ ! តែរាល់ថ្ងៃមនុស្សភាគច្រើន Share និងតាមដានតែរឿងអត់ប្រយោជន៍
ដូចដែលយើងគ្រប់គ្នាបានដឹងហើយថា សម័យនេះពិភពលោកពិតជាធំទូលំទូលាយខ្លាំងណាស់ អាចនិយាយថាផែនដីគឺនៅត្រឹមបាតដៃ ដែលជាទូរស័ព្ទភ្ជាប់អ៊ីនធើណេតនេះតែម្តង។
បច្ចេកវិទ្យាជឿនលឿន ក្រៅពីបានផ្តល់ភាពទំនើបកម្ម សេវា និងព័ត៌មានឆាប់រហ័ស តែនៅក្នុងនោះវាក៏បានផ្តល់ផលប៉ះពាល់នៅក្នុងសង្គមជាច្រើនផងដែរដូចជា ព័ត៌មានក្លែងក្លាយ រឿងអត់ប្រយោជន៍ និងការខ្ជះខ្ជាយពេលវេលាច្រើនមិនបានការនៅក្នុងពីភពអ៊ីនធើណេត ដែលអាចឱ្យអ្នកបាត់បង់ពេលវេលាសិក្សា ធ្វើការ រកស៊ី ពេលវេលាជាមួយមនុស្សជាទីស្រលាញ់ និងក្រុមគ្រួសារផងដែរ។
នៅក្នុងនោះ ការតាមដានព័ត៌មាននៅក្នុងសង្គមអ៊ីនធើណេត ជាពិសេសគឺបណ្តាញទំនាក់ទំនងសង្គមហ្វេសប៊ុក កំពុងតែវាយលុកទៅលើមនុស្សគ្រប់វ័យ មិនថាទាំងយុវជន និងវ័យចំណាស់នោះទេ ហើយគ្រប់រឿងរ៉ាវមួយចំនួនខ្លះដែលគ្មានប្រយោជន៍វាអាចជះឥទ្ធិពលយ៉ាងសម្បើម ដោយគ្រាន់តែប្រើម្រាមដៃចុចសរសេរ ឬស៊ែរតែប៉ុណ្ណោះ។
សួរថាតើព័ត៌មានមិនបានការ និងព័ត៌មានដែលគ្មានប្រយោជន៍កើតឡើងមកពីអ្នកណា? មកពីអ្នកបង្ហោះ? អ្នកសរសេរ? អ្នកសារព័ត៌មាន? ឬអ្នកដែលតាមដានផ្ទាល់?
ចម្លើយនោះគឹ ឥទ្ធិពលនៃអ្នកតាមដាននោះតែម្តង!
ជាធម្មតារបស់អ្វីមួយ ឬទំនិញអ្វីមួយ មិនថាល្អយ៉ាងណា ពិសេសយ៉ាងណាបើគ្មានអ្នកគាំទ្ររបស់នោះនៅតែលក់មិនដាច់។ ចំណែកឯព័ត៌មាននៅក្នុងសង្គមរាល់ថ្ងៃ គេអាចទាញអ្នកអាន អ្នកស៊ែរយ៉ាងច្រើនគឺមកពីអ្វី? នោះគឺព្រោះសារជាតិមនុស្សសព្វថ្ងៃ តែងតែចង់ដឹង ចង់ឮពីរឿងទាំងនេះតែម្តង ពោលបើគ្មានភ្លើងក៏គ្មានផ្សែងដែរ!
-សួរថារាល់ថ្ងៃតើអ្នកសរសេររឿងគ្មានប្រយោជន៍ប៉ុន្មាននៅក្នុងបណ្តាញសង្គមរបស់អ្នក?
-សួរថា តើអ្នកតាមដានរឿងឥតបានការណ៍ប៉ុន្មានលើកនៅក្នុងមួយថ្ងៃ?
-សួរថា មាត់អ្នកនិយាយថាធុញ និងស្អប់រឿងមិនបានការ តែកម្រិតនៃការស៊ែររឿងមិនបានការរបស់អ្នកមានប៉ុន្មានដងក្នុងមួយថ្ងៃ?
-សួរថាតើមានមនុស្សប៉ុន្មាននាក់ដែលមិនលេងហ្វេសប៊ុក ព្រោះតែការ Like Share និងការធ្វើល្អយកមុខ ចង់ល្បីក្នុងហ្វេសប៊ុក?
ហើយសំណួរដ៏ចាក់ដោតមួយទៀតសំខាន់នោះគឺ តើពេលគេសរសេរ ឬធ្វើរឿងបានការ តើមានមនុស្សប៉ុន្មាននាក់គាំទ្រ ជួយចែករំលែក និងដណ្តើមគ្នាវែកញែកធ្វើជាបណ្ឌិតហ្វេសប៊ុក ទៅលើរឿងមិនបានការអស់ទាំងនោះ? ឬចិត្តជាទេវទត្ត មាត់ជាទេវត្តានោះទេ? (Sic)
អរគុណសម្រាប់ការអានពីដើមរហូតដល់ចប់ ចំពោះអត្ថបទមិនបានការណ៍មួយនេះ!
រក្សាសិទ្ធអត្ថបទ៖ Brayan Media
ព័ត៌មានថ្មីៗ
