តក់ស្លុត! បើដឹងរឿងដ៏រន្ធត់ នៃកន្លែងដែលគួរឱ្យខ្លា ចបំផុតទាំង ១១ ក្នុងប្រទេសថៃ
បើនិយាយពីប្រទេសថៃ គ្រប់គ្នាប្រហែលជាកំពុងតែស្រមៃទៅដល់កន្លែងកម្សាន្ត កន្លែងដើរលេងសប្បាយៗ និងហាងទិញទំនិញជាមិនខាន។ តែបើងាកមួយជ្រុងទៀត ប្រទេសថៃក៏មានជំនឿមិនចាញ់ខ្មែរយើងដែរទៅលើការបន់ស្រន់ លើទេវត្តា និងខ្មោចព្រាយបិសាចជាដើម។
នៅក្នុងនោះ ប្រទេសថៃ ក៏មានកន្លែងរន្ធត់គួរឱ្យខ្លាចជាច្រើនកន្លែងផងដែរ ដែលលោកអ្នកគួរតែដឹង ប្រសិនជាអាចគួរឱ្យចៀសវាងឆ្លងកាត់កាន់តែប្រសើរ ដោយគេជឿថាវាជាកន្លែងដ៏គួរឱ្យខ្លាច និងមានរឿងញាក់សាច់កើតឡើងទៀតផង ដោយកន្លែងទាំងនោះរួមមាន៖
១. វត្ត Wat Pai Ngoen
ក្នុងឆ្នាំ ២០១០ ទីកន្លែងនេះធ្លាប់ត្រូវបានគេរកឃើញបាវ ឬកញ្ចប់ច្រកសាកសពទារកជាង ២០០០នាក់ ដែលមិនទាន់កើតជាច្រើន ដែលអាចប៉ាន់ស្មានថាវាជាទីកន្លែងដែលគ្លីនិកឯកជនពន្លូតកូនខុសច្បាប់យកសាកសពក្មេងមកចោល។ បន្ទាប់ពីបានរកឃើញរឿងដ៏រន្ធត់នេះ គេបានសាងសង់ស្តូបគោរពបូជា និងមានសំណែនសម្រាប់ក្មេងៗផងដែរ តែពេលយប់ឡើងមានមនុស្សមួយចំនួនអះអាងថា គេបានឃើញ និងឮសំឡេងក្មេងៗនៅបរិវេណនេះដដែល។
២. រូបចម្លាក់ដូចមនុស្សរស់ Ajarn Chuan Ashram, Chachoengsao
អាស្រមមួយនេះមានរូបសំណាកជាច្រើន មានទាំងមនុស្ស ទេវត្តា និងកូនក្មេង តែវាមិនមែនជារឿងដ៏គួរឱ្យភ័យខ្លាចនោះទេបើត្រឹមជារូបសំណាកធម្មតានោះ។ តែរូបសំណាកដែលស្ថិតនៅក្នុងអាស្រមនេះត្រូវបានគេដឹងថាធ្វើឡើងដោយផ្សំជាមួយបំណែកសាកសពរបស់មនុស្សដូចជា សាច់ ឆ្អឹង និងស្បែកជាដើម។
៣. ផ្ទះបោះបង់ចោលរបស់នារីឈុតស
ផ្ទះដែលត្រូវគេបោះបង់ចោលមានទីតាំងនៅ Thawi Watthana ក្រុងបាងកក ត្រូវបានគ្រប់គ្នាអាចរអារដោយសារតែមានព្រឹលងខ្មោចស្រីឈុតស កាចសាហាវសណ្ឋិត។ អ្វីកាន់តែរន្ធត់នោះ មានយុវជន៧នាក់បាននាំគ្នាចូលទៅបំពានផ្ទះនោះជាលទ្ធផលពួកគេបានស្លាប់បាត់បង់ជីវិតម្តងម្នាក់ៗយ៉ាងគួរឱ្យរន្ធត់ដូចជាគ្រោះថ្នាក់ចរាចរណ៍ជាដើម ដោយមុននឹងគ្រោះថ្នាក់គេថែមទាំងឃើញនារីឈុតស នៅក្បែរនោះផងដែរ។
៤. ក្លឹប Countdown មរណៈ
រាត្រីឆ្លងឆ្នាំដ៏រីករាយក្នុងឆ្នាំ ២០០៩ របស់ Santika Pub ស្ថិតនៅ Soi Ekhamai 8 បានប្រែក្លាយទៅជាវិនាសកម្មដ៏រន្ធត់ ក្រោយពីមានអគ្គិភ័យកើតឡើង ដោយមានអ្នកស្លាប់ចំនួន ៦០នាក់ និងអ្នករងរបួសជាង ១០០នាក់។ ក្រោយពីមានរឿងសោកនាដកម្មនេះកើតឡើង គេរកឃើញថាបណ្តាលមកពីប្រផ្នូលមិនល្អមុនកម្មវិធីចាប់ផ្តើមតែម្តងដូចជា៖
- កម្មវិធីជប់លៀងឆ្លងឆ្នាំ គឺមានឈ្មោះថា « Goodbye Santika »
-ប្រអប់ CD ដែលបុគ្គលិកចែកជូនឱ្យភ្ញៀវមានគម្របពណ៌ខ្មៅ
- Website ដែលប្រម៉ូតកម្មវិធីឆ្លងឆ្នាំរបស់ Pub នេះ Design ដូចជាអណ្តាតភ្លើង
-សូម្បីតែឈ្មោះក្រុមចម្រៀង Rock ដែលលេងនៅក្នុងកម្មវិធីឆ្លងឆ្នាំក៏មានឈ្មោះថា « Burn » ដែរ។
បន្ថែមពីប្រផ្នូលទាំងនេះ មានមនុស្សជាច្រើនបាននិយាយតៗគ្នាថា មូលហេតុដែលមានបញ្ហានេះកើតឡើងគឺបណ្តាលមកក្លឹបកម្សាន្តនេះសាងសង់លើដីដែលធ្លាប់ជាផ្ទះមានអំពើឃាតកម្ម។ រហូតមកទល់ពេលនេះក្លឹបកម្សាន្តនេះបានបិទជាស្ថាពរទៅហើយ តែមនុស្សជាច្រើនបាននិយាយតៗគ្នាថា យប់ឡើងម្តុំនេះនៅតែឮសូរសំឡេងមនុស្សស្រែកឱ្យជួយល្វើយៗទៀតផង។
៥. ទីកន្លែងបោះបង់ឡានចាស់ៗចោល
កន្លែងចោលរថយន្តចាស់ៗស្ថិតនៅ Soi Saiyud បានប្រែក្លាយទៅជាកន្លែងដ៏ខ្លាចរអារមួយដែលគ្រប់គ្នាសឹងតែចៀសមិនចូលមកក្បែរឡើយ ជាពិសេសពេលយប់មានសំឡេងចម្លែកៗ និងរឿងប្លែកៗកើតឡើងគួរព្រឺសម្បុរជាច្រើនកើតឡើងទៀតផង។ ការដែលទីនោះក្លាយទៅជាទីញាក់សាច់ នោះក៏ដោយសារតែឡានបែកបាក់ដែលគេយកមកចោលនៅទីនេះ សុទ្ធតែមានប្រវត្តិមិនធម្មតាដូចជាឃាតកម្ម និងគ្រោះថ្នាក់ចរាចរណ៍ជាដើម គិតទៅមើលសុទ្ធតែពពួកខ្មោចតៃហោងបែបនេះ វិញ្ញាណនឹងវិលវល់នៅទីណាទៅ?
៦. ផ្លូវ Ratchada
ផ្លូវកោង Ratchada ធ្លាប់បានឆក់យកជីវិតមនុស្សអស់ជាង ១០០នាក់ទៅហើយ ដោយសារតែគ្រោះថ្នាក់ចរាចរណ៍ ដោយអ្នកខ្លះបន្ទោសថាមកពីស្ថានភាព និងស្លាកសញ្ញាលើផ្លូវ អ្នកខ្លះបន្ទោសថាមកពីការធ្វេសប្រហែសរបស់អ្នកបើកបរ ឯអ្នកខ្លះទៀតបានបន្ទោសទៅដល់ព្រលឹងខ្មោចដែលនៅលើដើមឈើក្បែរផ្លូវកោងនោះទៅវិញ។ មានមនុស្សជាច្រើនបាននិយាយថាមុននឹងមានគ្រោះថ្នាក់កើតឡើងគេតែងតែឃើញមានភ្លើងចម្លែកហោះពីដើមឈើនោះមកប៉ះនឹងរថយន្តរបស់គេ ដែលហេតុផលប្រហែលជាព្រលឹងខ្មោចត្រូវការឆក់យកព្រលឹងមកជំនួសកន្លែងរបស់ខ្លួនដើម្បីបានចាប់ជាតិថ្មី។
ហេតុនេះហើយបានជាមនុស្សម្នាជាច្រើនបាននាំគ្នាធ្វើអាស្រម និងតង្វាយសំណែនមួយចំនួននៅម្តុំដើមឈើផ្លូវកោងនេះទៅតាមជំនឿរៀងៗខ្លួន។ នៅក្នុងឆ្នាំ ២០១៥ ក្រុមប៉ូលីសល្បាតបានចាត់ការប្រមូល និងរើរបស់សំណែនពីម្តុំនោះម្តងរួចទៅហើយ ដើម្បីរៀបចំសណ្តាប់ធ្នាប់សាធារណៈ តែមនុស្សមួយចំនួននៅតែបន្តធ្វើការសែនព្រេននៅម្តុំៗនោះដដែល។ ចំពោះរឿងនេះពិត ឬយ៉ាងណានោះយើងខ្ញុំមិនហ៊ានសន្និដ្ឋាននោះទេ តែក៏មិនអាចប្រមាថបានដែរ ដូច្នេះប្រសិនជាលោកអ្នកបានធ្វើដំណើរលើដងផ្លូវនេះសូមធ្វើការប្រុងប្រយ័ត្នឱ្យមែនទែន កុំភ្លេចមើលផ្លាកសញ្ញាជុំវិញ ហើយក៏កុំភ្លេចស៊ីផ្លេដេញវិញ្ញាណខ្មោចសាហាវផងដែរ។
៧.អគារបោះបង់ចោល Thai Zhong Tower
អគារបោះបង់ចោល Thai Zhong Tower ឬហៅថា Thaifar Group Building មួយនេះមានរហូតដល់ទៅ ៣២ជាន់ ស្ថិតនៅលើផ្លូវ Hightway Bang Na-Trad ដែលត្រូវបានគេដឹងថាមានព្រលឹងកាចសាហាវចំនួន ៥សណ្ឋិតនៅ។ អគារដែលត្រូវបានគេបោះបង់ជាង ២០ឆ្នាំនេះ មានមនុស្សចំនួន ៣នាក់ បានធ្វើអត្តឃាតដោយលោតពីអគារស្លាប់ចំនួន៣នាក់ និង២នាក់ផ្សេងទៀតធ្វើអត្តឃាតដោយការចងកសម្លាប់ខ្លួន។ រហូតដល់ពេលនេះ អ្នកដែលធ្វើដំណើរកាត់អគារនេះពេលយប់តែងតែឃើញស្រមោលមនុស្សនៅក្នុងអគារ និងលោតពីលើអគារ វាពិតជាគួរឱ្យរន្ធត់ណាស់ ហើយគ្រប់គ្នាជឿថាព្រលឹងខ្មោចទាំង៥គឺនៅតែស្ថិតលើអគារនេះដដែល។
៨. ផ្ទះបនស្រីពេស្យា Kanchanaburi
ផ្ទះបនស្រីពេស្យានេះត្រូវបានគេបោះបង់ជាង ៤០ឆ្នាំមកហើយ ហើយមិនមែនជាកន្លែងដ៏គួរឱ្យភ័យខ្លាចទើបតែពេលបោះបង់នោះទេ វាគឺជាឋាននរកពិតៗផងដែរសម្រាប់ស្ត្រីគ្រប់រូប។ កាលពីបននេះបើកដំណើរការមានស្រីជាច្រើនត្រូវបានគេចាប់បង្ខំ ធ្វើទារុណកម្ម អ្នកខ្លះក៏ត្រូវស្លាប់ អ្នកខ្លះក៏ត្រូវបង្ខំឱ្យរំលូតកូនចេញរហូតដល់ស្លាប់ក៏មាន។ ជាពិសេសកន្លែងដ៏គួរឱ្យរន្ធត់ជាងគេគឺរូងអាថ៌កំបាំងក្រោមដី ដែលគេអាចប៉ាន់ស្មានថាជាបន្ទប់ធ្វើទារុណកម្មដ៏ព្រៃផ្សែមួយ និងជាទីឃុំឃាំងស្ត្រីដ៏សាហាវផងដែរ ដែលរហូតដល់ពេលនេះនៅតែគ្មានអ្នកណាហ៊ានចុះទៅបន្ទប់នោះឡើយ។ ទីតាំងគឺស្ថិតនៅលើផ្លូវគ្មានឈ្មោះ Tambon Tha Lo, Amphoe Tha Muang, Chang Wat Kanchanaburi 71000, Thailand ដោយជិះ១ម៉ោងពីទីក្រុងបាងកកទើបទៅដល់។
៩. ស្ពានអត្តឃាត លើទន្លេ Bang Pakong ខេត្ត Chachoengsao
យប់មួយនៅក្នុងឆ្នាំ ២០១៨ ស្ត្រីម្នាក់បានចេញពីលើឡាន ឡើងទៅស្ពានរកហក់លោតសម្លាប់ខ្លួន តែត្រូវបានគេជួយទាន់ តែស្ត្រីនោះបាននិយាយថាពេលនាងកំពុងតែបើកឡានសុខៗស្រាប់តែឃើញនារីស្លៀករ៉ូបក្រហមម្នាក់អង្គុយលើស្ពានហើយបម្រុងនឹងហក់ចុះទឹកសម្លាប់ខ្លួន ពេលនោះនាងស្រាប់តែមានចិត្តចង់ជួយនារីរ៉ូបក្រហមយ៉ាងខ្លាំងទើបស្រវាចូលទៅឃាត់ តែពេលនាងដឹងខ្លួនបែរជាមានមនុស្សមកចាប់នាងមិនឱ្យលោតទឹកទៅវិញ។ តែនាងមិនមែនមនុស្សដំបូងនោះទេ ដោយការពិតទៅរឿងរ៉ាវស្រដៀងនេះ កើតឡើងចំនួន៦០ករណីទៅហើយ អ្នកខ្លះក៏បានស្លាប់ អ្នកខ្លះក៏ត្រូវបានគេជួយទាន់ ហើយអ្នកដែលរួចជីវិតតសុទ្ធតែនិយាយដូចៗគ្នាថា បានឃើញនារីរ៉ូបក្រហមបម្រុងនឹងលោតទឹកសម្លាប់ខ្លួនដូចគ្នា។ ទីកន្លែងនេះស្ថិតនៅ ស្ពានទន្លេ Bang Pakong ទីក្រុង Tha Kham សង្កាត់ Bang Pakong ខេត្ត Chachoengsao។
១០. កន្លែងកប់សាកសព នៅ វត្ត Wat Don ក្រុងបាងកក
បើនិយាយថាទីកន្លែងណាគួរឱ្យខ្លាចជាងគេនៅក្រុងបាងកក ច្បាស់ណាស់គ្រប់គ្នានឹងនិយាយទៅដល់កន្លែងមួយមានឈ្មោះថា « បច្ឆា Wat Don » គឺកន្លែងកប់សាកសព និងបូជាសពរបស់វត្ត Wat Don ។ អស់រយៈពេលជាង ៥០ឆ្នាំមកហើយ វត្តនេះគឺជាទីកន្លែងដែលបូជាសាកសពជនអនាថា ជនដែលមិនអាចស្វែងរកក្រុមគ្រួសារបាន ជាពិសេសគឺសាកសពដែលជួបគ្រោះថ្នាក់ចរាចរណ៍ផ្សេងៗ។ មកទល់សព្វថ្ងៃមានសាកសពជាង ១ម៉ឺនបានបូជានៅទីនេះ ហើយផ្នូរជាច្រើនគឺសុទ្ធសឹងតែគ្មានឈ្មោះទៀតផង គ្រាន់តែឮក៏ញាក់សាច់ដែរ!
១១. អគារបោះបង់ចោលកណ្តាលក្រុងបាងកក
នៅចំកណ្តាលសង្កាត់ Bang Rak ទីក្រុងបាងកកមានអគារដ៏ធំស្កឹមស្កៃមួយកន្លែងមានឈ្មោះថា Sathorn Unique Tower ដែលជាអគារខុនដូប្រណីត និងសាងសង់ជិតរួចរាល់ទៅហើយ តែបែរជាត្រូវបានគេបោះបោះបង់អស់រយៈជាងជាង 20 ។ អគារនេះត្រូវបានអ្នកស្រុកជឿថា បានទទួលរងនូវបណ្តាសារ ដោយសារតែតួអគារដែលមានកម្ពស់ ៤៦ជាន់នេះ បានសាងសង់ជិតវត្តដ៏ពិសិដ្ឋនៅក្បែរនេះ និងមានកម្ពស់ខ្ពស់ជាងវត្តអារាមដ៏ស័ក្តិសិទ្ធ ដែលវាជាសកម្មភាពប្រមាថ និងមិនគោរពដល់ព្រះពុទ្ធសាសនា។
ក្រោយមកម្ចាស់អគារ ក៏បានក្ស័យធន លែងបន្តការសាងសង់ ហើយសូម្បីតែម្ចាស់ម៉ៅការសំណង់ក៏ត្រូវបានចាប់ខ្លួនបទឃាតកម្មមួយទៀតផង ហេតុនេះហើយបានជាអគារដ៏ស្រស់ស្អាត និងល្បីល្បាញនេះត្រូវបានគេទុកចោលដល់សព្វថ្ងៃនៅកណ្តាលទីក្រុងដ៏អ៊ូអូរមួយនេះ ហើយក៏គ្មានអ្នកណាហ៊ានមកជិតអគារនេះពេលយប់ផងដែរ។ គួរឱ្យដឹងថា អគារនេះធ្លាប់ត្រូវបានក្រុមហ៊ុនផលិតកម្មថៃដ៏ល្បីល្បាញយកមកថតជាខ្សែភាពយន្តមួយផងដែរ មានឈ្មោះថា « The Promise » ៕
រក្សាសិទ្ធ៖ ក្នុងស្រុក
ព័ត៌មានថ្មីៗ
