មកស្គាល់ សណ្ឋាគារ និងកន្លែងស្នាក់នៅចម្លែកៗជាងគេលើពិភពលោក!
រាល់ដំណើរកម្សាន្ត ទីកន្លែងដើរលេងដ៏រីករាយប្លែកភ្នែកចម្លែកអារម្មណ៍ មិនថាតែជាលក្ខណៈធម្មជាតិ ឬពោរពេញដោយភាពច្នៃប្រឌិតនោះទេ សុទ្ធតែជាទីប្រាថ្នារបស់ភ្ញៀវទេសចរ។
ប៉ុន្តែនៅក្នុងនោះកន្លែងដែលស្នាក់នៅក៏ជាទីកន្លែងដែលត្រូវតែគិតគូរឱ្យបានល្អផងដែរ ព្រោះវាមិនត្រឹមតែអាចផ្តល់អារម្មណ៍សុខស្រួលរាល់ពេលគេងសម្រាកពីការនឿយហត់ប៉ុណ្ណោះទេ តែវាក៏ត្រូវតែមានបរិយាកាសប្លែកថ្មីទាំងកន្លែងដំណេកផងដែរ ទើបគេហៅថាជាដំណើរកម្សាន្តមួយដ៏ពេញលេញ។
ថ្ងៃនេះ យើងខ្ញុំសូមណែនាំលោកអ្នកឱ្យទៅកាន់សណ្ឋាគារ និងទីកន្លែងស្នាក់នៅជុំវិញពិភពលោក ដែលមានទេសភាព និងរូបរាងប្លែកចម្លែកអារម្មណ៍មួយចំនួនដូចជា៖
១. ផ្ទះសត្វក.វែង (Giraffe Manor)
សណ្ឋាគារដ៏តូចមួយនេះ ស្ថិតនៅក្នុងក្រុង Nairobi ប្រទេសកេនយ៉ា បានក្លាយទៅជាទីជម្រករបស់ហ្វូងសត្វក.វែងជាច្រើនក្បាល ដែលបានក្លាយទៅជាទស្សនីយភាពប្លែកភ្នែកចម្លែកអារម្មណ៍ដល់ភ្ញៀវទេសចរណ៍ ។
២.ផ្ទះសហគមន៍ព្រៃឈើ Finca Bellavista
អ្នកដែលស្រលាញ់ធម្មជាតិ និងជីវិតផ្សងព្រេងប្រាកដជាពេញចិត្តរីហ្សត (ផ្ទះលំហែកាយ) ក្នុងប្រទេសខូតារីកាមួយនេះជាមិនខាន ព្រោះវាអាចផ្តល់អារម្មណ៍មួយដូចជារស់នៅជាមួយព្រៃភ្នំ និងធម្មជាតិពិតៗ។អ៊ីចឹង។
៣.ផ្ទះលំហែកាយ The Manta Resort
ផ្ទះសំណាក់សម្រាកលំហែរកាយបណ្តែតទឹកមួយនេះ មានបន្ទប់មួយដ៏អស្ចារ្យភ្ជាប់ទៅខាងក្រោមទឹក ដែលអាចឱ្យអ្នកទេសចរណ៍ ចុះទៅជ្រមុជទឹកលេង និងមើលហ្វូងត្រីបានផងដែរ។
៤. សណ្ឋាគារMontaña Mágica Lodge
សណ្ឋាគារដ៏ប្រណីតក្នុង ប្រទេសឈីលីមួយនេះ មានរូបរាងដូចជាភ្នំភ្លើងបានសាងសង់ឡើងដោយលាក់ខ្លួនពួនអាត្មានៅក្នុងកណ្តាលព្រៃជ្រៅមួយ។ ដើម្បីអាចទៅស្នាក់នៅសណ្ឋាគារដ៏អស្ចារ្យមួយនេះបានអ្នកត្រូវតែផ្សងព្រេង និងក្លាហានហ៊ានឆ្លងស្ពានយោលដ៏គួរឱ្យស្ងើបមួយសិន។
៥.សណ្ឋាគារ Attrap’Rêves Bubble
សណ្ឋាគារដែលបានសាងសង់ឡើងប្រកបដោយការច្នៃប្រឌិតថ្មីធ្វើឡើងពីជ័រ មានរូបរាងមូលដូចពពុះសាប៊ូ ស្ថិតក្នុងប្រទេសបារាំងមួយនេះ អាចឱ្យអ្នកគេងមើលទេសភាពជុំវិញបានយ៉ាងរីករាយ ជាពិសេសគឺការគេងមើលផ្កាយដ៏សែនរ៉ូមែនទិកនៅពេលយប់។
៦.ផ្ទះលំហែកាយ Kumbuk River Resort
ផ្ទះសម្រាកលំហែកាយក្នុងប្រទេសស្រីលង្កានេះ សាងសង់ឡើងដូចជាសត្វដំរីដ៏ធំ គឺជាតំបន់អេកូទេសចរណ៍ដែលអាចឱ្យអ្នករស់នៅ និងទស្សនាពិភពសត្វដំរីធំជាងគេបង្អស់លើពិភពលោក។ ក្រៅពីនេះអ្នកថែមទាំងអាចរីករាយនឹងទេសភាពធម្មជាតិព្រៃឈើតូចធំ និងប្លែកភ្នែកជាមួយនឹងការទស្សនាពីជីវិតរស់នៅរបស់សត្វដំរីពិតៗនៅទីនោះផងដែរ។
៧.ផ្ទះសំណាក់ Hằng Nga
អគារផ្ទះសំណាក់ប្រទេសវៀតណាមនេះបានសាងសង់ឡើងពីការស្រមើស្រមៃដ៏វែងឆ្ងាយ របស់ស្ថាបត្យករជនជាតិវៀតណាម លោក Đặng Việt Nga។ ដោយមានរូបរាងមិនប្រក្រតីជាច្រើនដូចជាមានជ្រុងមិនស្មើគ្នា មានរូបរាង និងចម្លែកៗមិនថាតែអការ ទ្វារ និងបង្អួចនោះឡើយ។
៨.ផ្ទះសំណាក់ The Hobbit Motel
ផ្ទះសំណាក់ប្រទេសញ៉ូហ្សេឡែនមួយនេះទទួលបានគំនិតច្នៃប្រឌិតឡើងពីរឿងហូលីវ៉ូតដ៏ល្បីល្បាញមួយ គឺរឿង Lord of The Rings។ ហើយនៅពេលដែលអ្នកស្នាក់នៅក្នុងផ្ទះនេះ អ្នកនឹងទទួលបានអារម្មណ៍មួយប្រៀបបីដូចជា បានប្រើជីវិតដែលស្ថិតនៅក្នុងខ្សែភាពយន្តមួយនេះដែរ។
៩.សណ្ឋាគារ Costa Verde
សណ្ឋាគារក្នុងប្រទេសខូតារីកានេះ សាងសង់ឡើងពីយន្តហោះ Boeing 727 ដោយបានតុបតែង កែលំអ និងបន្ថែមសំភារៈទំនើបៗប្រណីតៗជាច្រើន ដើម្បីឱ្យកាន់តែមានភាពស្រស់ស្អាត និងទាក់ទាញផងដែរ។ ស្ថិតនៅក្នុងរយៈកំពស់ប្រមាណជា ១៥ម៉ែត្រពីដី អាចឱ្យអ្នកគយគន់ព្រៃព្រឹក្សាធម្មជាតិពិតៗ និងទេសភាពមហាសមុទ្រពីលើសណ្ឋាគារនេះផងដែរ។
១០.សណ្ឋាគារ Aydınlı Cave
សណ្ឋាគារប្រទេសទួកគីនេះបានសាងសង់ឡើងដោយការចោះថ្ម និងរូងភ្នំធម្មជាតិៗចំនួន៦ ដែលត្រូវបានគេដឹងថាមានតាំងពីសត្សវត្សន៍ទី ៥ និងទី៦មកម្ល៉េះ។ ស្នាក់នៅទីនេះមិនត្រឹមតែអាចឱ្យអ្នកមានអារម្មណ៍ថាវិលទៅកាន់ជីវិតរស់នៅពីបុរាណកាលមកទេ ថែមទាំងអាចយល់ដឹងពីប្រវត្តិសាស្រ្ត ទស្សនាទេសភាពជុំវិញខ្លួន និងប៉ាឡុងហោះពីលើដំបូលសណ្ឋាគារនេះផងដែរ។
១១.ផ្ទះផ្សងព្រេង Skylodge Adventure Suites
ចង់ស្នាក់នៅផ្ទះសំណាក់ដ៏អស្ចារ្យ ក្នុងប្រទេសប៉េរុ មួយនេះជាមួយនឹងទេសភាពធម្មជាតិប្លែកភ្នែកដែលនៅជុំវិញ និងស្ថិតនៅរយៈកម្ពស់ដ៏សែនខ្ពស់ពីដី អ្នកត្រូវតែមានសេចក្តីក្លាហាន និងត្រូវធ្វើដំណើរផ្សងព្រេងជាមុនសិន។
១២. សណ្ឋាគារ The Marqués de Riscal
សណ្ឋាគារដ៏ប្រណីត និងមានរូបរាងចម្លែកអស្ចារ្យក្នុងប្រទេសអេស្ប៉ាញនេះ បានសាងសង់ឡើង ដោយមានជញ្ជាំងសង់ជាលក្ខណៈទ្រេត មានបង្អួចវៀច និងពិដានធ្វើពីឈើកោងៗ រួមទាំងតុបតែងដោយសង្ហារឹម និងសំភារៈជាច្រើនបញ្ជាក់ពីគំនិតសិល្បៈដ៏ច្នៃប្រឌិតខ្ពស់មួយ។
១៣.សណ្ឋាគារ Capsulevalue Kanda
សម្រាប់អ្នកដែលចង់បានកន្លែងស្នាក់នៅស្រួល និងសមរម្យល្អ ថែមទាំងមានតម្លៃថោកជាងគេនៅក្នុងទីក្រុង សណ្ឋាគារមួយនេះជាជម្រើសល្អបំផុតសម្រាប់ភ្ញៀវទេសចរដែលមកលេងប្រទេសជប៉ុន។
១៤.សណ្ឋាគារ V8
សណ្ឋាគារប្រទេសអាឡឺម៉ង់នេះបានរចនាម៉ូតឡើងពីរូបរាងរថយន្តទាំងអស់ មិនថាតែសំភារៈប្រើប្រាស់ រូបគំនូរលើជញ្ជាំង បូករួមនឹងគ្រែគេងក៏ច្នៃពីរូបរាងឡានពិតប្រាកដផងដែរ។
១៥.សណ្ឋាគារ No Man’s Fort
សណ្ខាគារនៅលើផ្ទៃកោះដ៏ធំក្នុងប្រទេសអង់គ្លេសមួយនេះ សាកសមបំផុតសម្រាប់អ្នកដែលស្រលាញ់ធម្មជាតិ ត្រូវការភាពស្ងាប់ស្ងាត់ និងចាកឆ្ងាយពីទីប្រជុំជន។
១៦. សណ្ឋាគារ Book And Bed
ទីនេះសម្បូរទៅដោយសៀវភៅរាប់រយរាប់ពាន់ក្បាល។ ដូច្នេះហើយសណ្ឋាគារក្នុងប្រទេសជប៉ុនមួយនេះមិនត្រឹមតែជាទីស្នាក់នៅដ៏ល្អទេ តែក៏ជាទីប្រាថ្នារបស់ចៃសៀវភៅដែរ។
១៧.សណ្ឋាគារ The Aurora Express
សណ្ឋាគារក្នុងទីក្រុង Fairbanks រដ្ឋអាឡាស់កា សហរដ្ឋអាមេរិចមួយនេះសាងសាង់ឡើងពីទូរថភ្លើងចាស់ៗ ដែលបានបែកចែកច្នៃជាបន្ទប់ស្នាក់នៅជាច្រើនហើយបន្ទប់ទាំងអស់បានតុបតែងឡើងទៅតាមសម័យកាលប្រវត្តិសាស្រ្តនៃរថភ្លើងនីមួយៗផងដែរ។
១៨.សណ្ឋាគារ Dog Bark Park Inn
សណ្ឋាគារក្នុងរដ្ឋ Idaho សហរដ្ឋអាមេរិចមួយនេះសាងសង់ឡើងតាមរូបរាងសត្វឆ្កែ ដែលមានកម្ពស់ប្រមាណជាជិត១០ម៉ែត្រពីដី ជាពិសេសនៅក្នុងសណ្ឋាគារ និងលើគ្រែគេងបានតុបតែងដោយរូបចម្លាក់សត្វឆ្កែតូចៗជាច្រើនផងដែរ។
១៩.សណ្ឋាគារ The Parkhotel
បើទោះបីជាបន្ទប់សណ្ឋាគារមួយនេះសាងសង់ឡើងពីបំពង់លូចាស់ៗយ៉ាងណាក៏ដោយ តែវាត្រូវបានតុបតែង និងរចនាឡើងជាពិសេស ថែមទាំងគួរឱ្យចង់ស្នាក់នៅផងដែរ។ សម្រាប់អ្នកដែលធុញក្នុងការគេងបន្ទប់សណ្ឋាគារដដែលៗ ឬចង់ប្តូរបរិយាកាស សណ្ឋាគារក្នុងប្រទេសអាឡឺម៉ង់មួយនេះជាជម្រើសល្អបំផុត។
២០.សណ្ឋាគារទឹកកក តំបន់ Jukkasjärvi
នេះជាសណ្ឋាគារដំបូងគេបង្អស់ក្នុងប្រទេសអ៊ុយអែត ដែលធ្វើឡើងពីដុំទឹកកក និងព្រិល ដែលជាទីកន្លែងដ៏ស្ងៀមស្ងាត់ និងមានបរិយាកាសប្លែកចិត្តចម្លែកអារម្មណ៍សម្រាប់អ្នកដែលចង់ទទួលបានភាពធូរស្រាលពីការនឿយហត់ផ្សេងៗបាន។
២១.ផ្ទះលំហែរកាយ Kakslauttanen Arctic Resort
ផ្ទះស្នាក់នៅក្នុងប្រទេសហ្វាំងឡង់មួយនេះ សាងសង់ឡើងពីកញ្ចក់មួយនេះអាចឱ្យអ្នកសម្រាកគយគន់ទេសភាពនៅជុំវិញបានយ៉ាងរីករាយ និងប្លែកភ្នែកផងដែរ ជាពិសេសគឺពន្លឺចម្រុះពណ៌នៅលើមេឃ (Northern Lights) ដ៏ស្រស់ស្អាតមិនងាយរកបាន៕
ព័ត៌មានថ្មីៗ
