កុំខ្ជះខ្ជាយអី! ទឹកដោះគោហួសដឺឡេ បោះចោលនាំខាត យកមកច្នៃប្រើជាប្រយោជន៍ធំ ៥ នេះ
ទឹកដោះគោស្រស់ ជាធម្មតាមានកាលបរិច្ឆេទផុតកំណត់របស់វា ចន្លោះតែមួយសប្តាហ៍ ទៅពីរសប្ដាហ៍អីប៉ុណ្ណោះ វាស៊ីសងលើចំណុះផ្ទុកនិងម៉ាកផលិតផលនីមួយៗដែរ។ សង្កេតឃើញបងប្អូនយើងជាច្រើន ឲ្យតែឃើញហួសដឺឡេគឺបោះចោលហើយ ដែលវាជារឿងត្រឹមត្រូវមិនខុសនោះទេ តែគ្រាន់ថាជាការខ្ជះខ្ជាយ ព្រោះវានៅមានប្រយោជន៍ដែលយើងអាចច្នៃមកធ្វើជារឿងផ្សេង ហើយមិនពាក់ព័ន្ធនឹងសុខភាពរាងកាយរបស់យើងឡើយ៖
៥) ប្រើមកលាងមុខ
យើងទទួលទានគឺខុស តែបើយកមកលាបលើស្បែក គឺជារឿងល្អទៅវិញ។ ដោយសារតែសារធាតុចិញ្ចឹមក្នុងទឹកដោះគោនោះ នៅមិនទាន់ខូចគុណភាពនៅឡើយ ពោលយើងអាចច្នៃមកលាយជាមួយទឹកដើម្បីលាងមុខ ឬប្រើគួបជាមួយម៉ាសបិទមុខ ដែលវាអាចជម្រុះកោសិកាងាប់ ធ្វើឲ្យស្បែកតឹងណែនបានយ៉ាងល្អ។
៤) ដាក់ឲ្យសត្វចិញ្ចឹម
សត្វចិញ្ចឹមដូចជាឆ្កែ ឆ្មាវាទទួលទានបានមិនប៉ះពាល់អីនោះទេ ហើយជាតិកាល់ស្យូមនិងប្រូតេអ៊ីនមួយចំនួន គឺនៅតែល្អសម្រាប់ពួកវា។ ប៉ុន្តែនេះយើងលើកឡើងសម្រាប់តែប្រភេទទឹកដោះគោ ដែលទើបតែហួសថ្មីថ្មោង ២-៣ ថ្ងៃនៃកាលបរិច្ឆេទប៉ុណ្ណោះ មិនមែនទុកដល់ដុះផ្សិតឡើយ។
៣) ស្រោចដំណាំ
ដោយសារតែទឹកដោះគោមានសារធាតុចិញ្ចឹមច្រើន ដូច្នេះហើយបើយើងចេះច្នៃមកស្រោចរុក្ខជាតិ វានឹងកាន់តែបានផលល្អ។
២) យកស្នាមប្រឡាក់ចេញពីសំលៀកបំពាក់
ស្នាមប្រឡាក់ដោយសារទឹកថ្នាំនៅលើសំលៀកបំពាក់ ក៏យើងអាចប្រើទឹកដោះគោមកលាងសម្អាតបានដែរ ដោយយកក្រណាត់ទៅជ្រលក់ទឹកដោះគោ ហើយមកជូតថ្នមៗលើផ្ទៃដែលប្រឡាក់ ឬត្រាំវាចោលក្នុងទឹកដោះគោនោះមួយយប់ សឹមលាងវាចេញក៏បានដូចគ្នា។
១) សម្អាតវត្ថុមានជាតិប្រាក់
របស់លោហៈដែលមានជាតិប្រាក់ ពេលទុកយូរវាងាយពុកផុយ ឬច្រេះ ដែលយើងអាចយកវាមកត្រាំក្នុងទឹកដោះគោដែលផុតកំណត់នោះបាន ហើយលាយជាមួយទឹកខ្មេះបន្តិច ក្រូចឆ្មាប៉ុន្មានចំណិតដើម្បីបន្ថែមជាតិអាស៊ីដ។ ក្រោយត្រាំវារួច យកមកលាងជាមួយទឹកស្អាតធម្មតា អ្នកនឹងឃើញលទ្ធផល៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
