Pep មើលឃើញចំណុចលេចធ្លោមួយរបស់ Grealish នៅប្រកួតបើកឆាកដំបូងយប់មិញ
នៅការប្រកួតរវាងក្រុម Leicester City និង Manchester City កាលពីយប់មិញ នៅឯព្រឹត្តិការណ៍ដណ្តើមពាន FA Community Shield លទ្ធផលបានបញ្ចប់ ១-០ តែក្រៅពីជ័យជម្នះរបស់កញ្រ្ជោងអ្វីដែលគេចាប់អារម្មណ៍បន្ទាប់នោះគឺ ការបង្ហាញខ្លួនលើកដំបូងរបស់ Jack Grealish។
ទើបតែមកដល់ក្លឹបថ្មីបានប៉ុន្មានថ្ងៃ លោក Pep Guardiola ក៏សម្រេចដាក់ឲ្យកីឡាករអង់គ្លេសចូលលេងបម្រុងពីនាទី ៦៥ ដល់ចប់ការប្រកួត ជំនួសយុវជនថ្នាល Samuel Edozie។ យ៉ាងណាចំណែករបស់ម្ចាស់អាវលេខ ១០ ពុំបានជួយក្រុមបង្កើតគ្រាប់បាល់នោះទេ ហើយត្រូវចាញ់បាល់ប៉េណាល់ទីចុងម៉ោងពីកញ្រ្ជោងខៀវ ដែលបញ្ចប់ទីដោយ Kelechi Iheanacho។
ក្រោយចប់ការប្រកួត ដ្បិតបើមានមតិខ្លះនិយាយថា Grealish ហាក់របូតបាល់ច្រើននៅការប្រកួតនោះ ក៏លោក Pep Guardiola នៅតែប្រកែក ហើយបានលើកចំណុចលេចធ្លោរបស់កូនក្រុមត្រលប់មកវិញ។
Guardiola ថា៖ "Grealish គេពិតជាល្អខ្លាំងណាស់ គេតតាំងខ្សែការពារក្រោយរបស់ក្រុមគូប្រជែងយ៉ាងតានតឹងបំផុត ហើយគ្រប់ពេលដែល Grealish មានបាល់នៅនឹងជើង ចំណាំមើលទៅយ៉ាងហោចណាស់កីឡាករ ៣ [រត់មកជុំវិញគេ]"។
អ្នកចាត់ការសញ្ជាតិអេស្ប៉ាញបន្ត៖ "យើងនឹងស្គាល់ពីគេកាន់តែច្បាស់ ម្តងមួយម្តងមួយ រហូតដល់គេឈានដល់កម្រិតល្អបំផុតមួយ តើឲ្យគេអាចបង្កើតទំនាក់ទំនងលើទីលានយល់ចិត្តគ្នាបែបណាបាន បើគ្មានមិត្តរបស់គេផងនោះ? តែមិនជាបញ្ហាទេ គេស្គាល់ Kyle, Raz និង Phil ហើយថ្ងៃស្អែកពួកគេត្រលប់មកវិញហើយ មួយទៀតត្រូវដឹងថាគេមិនមកលេងតែ ២៥ នាទីនេះទេ គេមក ៥-៦ ឆ្នាំឯណោះ"៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
