James ថាបើ Messi ទៅក្លឹបនេះ មួយលីគហ្នឹងលែងមានក្រុមផ្សេងប្រជែងពានហើយ
អតីតកីឡាករ Real Madrid គឺ James Rodriguez ដែលបច្ចុប្បន្នកំពុងឈរជើងឲ្យក្លឹប Everton បានបង្ហាញការយល់ឃើញ ពាក់ព័ន្ធនឹងអនាគតនៅពេលខាងមុខរបស់តារាឆ្នើម Lionel Messi ក្រោយពីទើបប្រកាសចែកផ្លូវជាមួយ Barcelona កាលពីយប់មិញ។
ជាការពិតចចាមអារ៉ាមជុំវិញការផ្ទេររបស់ M10 ទៅក្លឹបថ្មី អាចជារវាងក្លឹប Manchester City, Paris Saint-Germian និង Chelsea ជាដើម។ យ៉ាងណាតាមការជឿជាក់របស់ James ប្រសិនកីឡាករអាហ្សង់ទីនផ្ទេរទៅក្លឹបបារាំង នោះនៅលីគ Ligue 1 វាក្លាយជាលីគរបស់ក្លឹប PSG ទាំងមូលហើយ ពោលលែងមានក្រុមណាអាចប្រជែងបានតទៅទៀត។
និយាយនៅលើ Twitchកីឡាករសញ្ជាតិកូឡុំប៊ីថា៖ "ប្រសិន Messi ទៅ PSG នោះវានឹងក្លាយជាលីគរបស់ពួកគេផ្ទាល់ហើយនៅបារាំង ហើយឲ្យពានទៅពួកគេឲ្យហើយទៅ រីឯនៅអង់គ្លេស ខ្ញុំគិតថាមិនមានក្រុមណាក្រៅពី Man City ទេដែលអាចផ្តល់ប្រាក់ពលកម្មទៅកាន់គាត់បាន"។
គេបន្តនិយាយពីស្ថានភាពនៅឯក្លឹប Barcelona ទៀតថា៖ "Kun Aguero បានទៅ Barcelona ហើយពេលនេះ Messi បែរជាចាកចេញ ទាំងដែលពួកគេគឺជាដៃគូនឹងគ្នា តែបាល់ទាត់គឺបែបហ្នឹង ដូចតែខ្ញុំដែលទៅ Everton ចង់បម្រើការជាមួយលោក Ancelotti ឥឡូវមើលពេលនេះទៅ [គាត់បែរជាទៅ Real Madrid]"៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
