ច្បាស់ហើយ! កម្ពុជានឹងជួបកោះហ្គាម ក្នុងវគ្គ Play-Off ទាំង២ជើង នៅប្រទេសបារ៉ែន
តាមការជូនដំណឹងរបស់សហព័ន្ធកីឡាបាល់ទាត់កម្ពុជា (FFC) នៅព្រឹកទី០៥ ខែសីហា ឆ្នាំ២០២១ ក្រុមជម្រើសជាតិកម្ពុជា នឹងត្រូវប្រកួតជាមួយកោះហ្គាម ក្នុងវគ្គ Play-Off ជើងឯកទ្វីបអាស៊ី ឆ្នាំ២០២៣ នៅប្រទេសចិន (AFC Asian Cup China 2023) នៅទឹកដីកណ្ដាល នាប្រទេសបារ៉ែន ទាំង២ជើង ។
ព័ត៌មាននេះកើតឡើងទៅបានបន្ទាប់ពីមានការស្នើសុំរបស់ភាគីកម្ពុជា និងកោះហ្មគា ដោយសារការព្រួយបារម្ភពីបញ្ហារីករាលដាលជំងឺកូវីដ-១៩។ យោងតាមការជូនដំណឹងខាងលើ បានបញ្ជាក់ថា
៖«ដោយសារស្ថានភាពជំងឺកូវីដ-១៩ នៅកម្ពុជា និងកោះហ្គាម មានការរីករាលដាលខ្លាំងធ្វើឲ្យការធ្វើដំណើរទៅមកចេញចូលមានការលំបាក ដូច្នេះគណៈកម្មការប្រកួតសហព័ន្ធកីឡាបាល់ទាត់អាស៊ី (AFC) បានសម្រេចរៀបចំការប្រកួត រវាងក្រុមទាំងពីរ នៅប្រទេសបារ៉ែន សម្រាប់ការប្រកួតវគ្គជម្រុះ AFC Asian Cup 2023 Play-Off រវាងក្រុមជម្រើសជាតិកម្ពុជា និងក្រុមកោះហ្គាំ ដើម្បីឡើងទៅកាន់វគ្គជម្រុះជុំទី៣»។
សម្រាប់ការប្រកួតវគ្គ Play-Off រវាងក្រុមទាំងពីរខាងលើ នឹងធ្វើឡើងនៅកីឡដ្ឋាន Khalifa Sport City នាប្រទេសបារ៉ែនទាំង២ជើង ក្នុងនោះជើងទី១ ដំបូងឡើយត្រូវប្រកួតនាថ្ងៃទី០៧ ខែកញ្ញា ត្រូវបានពន្យារពេលទៅកួតថ្ងៃទី០៩ ខែតុលា ខណៈជើងទី២ រក្សាការប្រកួតនៅថ្ងៃទី១២ ខែតុលា ឆ្នាំ២០២១ ដដែល។ ចំពោះក្រុមទទួលបានជ័យជម្នះ នឹងឡើងទៅវគ្គចែកពូល នៃវគ្គជម្រុះជុំទី៣បន្ដ ដែលនឹងប្រកួតនាឆ្នាំ២០២២ ដើម្បីប្រជែងកៅអីជុំផ្ដាច់ព្រ័ត្រនៅប្រទេសចិន នាឆ្នាំ២០២៣៕
រក្សាសិទ្ធិដោយ៖ ក្នុងស្រុក
អំពីអ្នកសរសេររបស់យើង៖ PECH PHEARUN
Tel:
ព័ត៌មានថ្មីៗ
