គិតគូរហើយស្រេច! Pep នឹងមិនដាក់ Grealish លេងប្រយុទ្ធស្លាបទេ តែឲ្យមកលេងតំណែងនេះវិញ
លោក Pep Guardiola ត្រូវបានគេរាយការណ៍ថា បានរៀបចំហើយស្រេចអំពីប្រព័ន្ធលេងថ្មីក្រោយពេលដែល Jack Grealish មកដល់។ តាមចចាមអារ៉ាមការផ្ទេរ នឹងសម្រេចបាននៅថ្ងៃនេះ ជាមួយតម្លៃកំណត់ត្រាដល់ទៅ ១០០ លានផោន។
Grealish ដែលកាលនៅក្លឹបចាស់ គេលេងតំណែងប្រយុទ្ធស្លាប ដូចគ្នាទៅនឹងតំណែងលេងឲ្យជម្រើសជាតិអង់គ្លេស ឃើញថាធ្វើបានល្អ ព្រោះពូកែខាងក្រឡុកនិងបង្កើតឱកាសបោះចូលទៅក្នុងប្រអប់។
យ៉ាងណាជាមួយ City ក្រោមការដឹកនាំរបស់អ្នកចាត់ការសញ្ជាតិអេស្ប៉ាញ គឺលោកនឹងកំណត់ឲ្យបុរសវ័យ ២៥ ឆ្នាំ លេងតំណែងបម្រើជាលេខ ៨ ជំនួសពីប្រយុទ្ធស្លាបឆ្វេងកាលនៅ Aston Villa។ នេះបើតាមសារព័ត៌មាន The Athletic បានចុះផ្សាយ។
ស៊ីជម្រៅទៅគឺ Grealish នឹងលេងបម្រើចំតួ មិនមែនបម្រើប្រយុទ្ធស្មើនឹង Role របស់ Kevin de Bruyne នោះទេ។ មូលហេតុគឺលោកចង់ឲ្យកីឡាករអង់គ្លេស ជួយបង្កើតសាច់បាល់ឡើងពីក្រោមមកឲ្យបានច្រើន ហើយជឿលើគុណភាពបុរសវ័យ ២៥ ឆ្នាំ ប្រាកដជាអាចត្រួសត្រាយបង្កើតឱកាសមកមិត្តរួមក្រុមនៅតំបន់ប្រយុទ្ធច្រើន។ ដូច្នេះបើនិយាយឲ្យងាយយល់ទៅ គឺតំណែងរបស់ Grealish ប្រហែលនឹងតំណែង Paul Pogba នៅ Man Utd អ៊ីចឹងដែរ បែបហ្នឹងការរកគ្រាប់បាល់ប្រហែលជានឹងត្រូវកាត់បន្ថយ តែសំខាន់គឺជួយឲ្យក្រុមល្អប្រសើរឡើង៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
