អស់អារម្មណ៍នឹងបន្តហើយ! Ronaldo ចង់ដើរចេញពី Juventus ទៅជួបគ្រូចាស់នៅក្លឹបនេះវិញ
បើតាមរបាយការណ៍ពីសារព័ត៌មាន AS បានចុះផ្សាយថា ខ្សែប្រយុទ្ធវ័យ ៣៦ ឆ្នាំ Cristiano Ronaldo គេអស់អារម្មណ៍នឹងបន្តការឈរជើងនៅក្លឹប Juventus តទៅទៀតហើយ ក្រោយពីការចាយពេលជាង ៣ ឆ្នាំមកនេះ មិនទាន់សម្រេចផ្លែផ្កាអ្វីដុំកំភួន។
ម្ចាស់ពាន Ballon d'Or ៥ សម័យកាល បានខកខានការឈ្នះពានឯកត្តជនខ្នាតធំ និងពានរង្វាន់ខ្នាតធំជាមួយក្លឹបតាំងតែពីផ្ទេរមកចូលរួមកាលពីរដូវក្តៅឆ្នាំ ២០១៨។ ប្រភពបានឲ្យដឹងថា តារាឆ្នើមសញ្ជាតិព័រទុយហ្គាល់ ហាក់ចង់ត្រលប់ទៅក្លឹបចាស់ Real Madrid វិញ ដើម្បីរួមរស់ជាមួយអតីតគ្រូចាស់លោក Carlo Ancelotti ដែលធ្លាប់សហការលើទីលានរួមគ្នាកាលពីឆ្នាំ ២០១៣ ដល់ ២០១៥។
យ៉ាងណាយើងមិនច្បាស់នោះទេ ថាដំណើរការនៃការផ្ទេរនេះអាចសម្រេចទៅបានឬអត់ ព្រោះអីក្លឹប Real Madrid ពេលនេះ គេជឿថាកំពុងមានផែនការណ៍ធំចង់បាន Kylian Mbappe ពីក្លឹប PSG ឯណោះ។ ដូច្នេះហើយបើក្លឹបនៅបន្តឈរលើផែនការណ៍ហ្នឹងដដែល ក៏មានន័យថា ភាគរយតិចណាស់ដែលបុរសព័រទុយហ្គាល់អាចត្រលប់មក Bernabeu។
រំឭកថា ជាមួយសេះបង្កង់ តាំងពីរដូវក្តៅឆ្នាំ ២០១៨ Ronaldo បង្ហាញខ្លួន ១៣៣ ប្រកួត រកបាន ១០១ គ្រាប់និង Assist ២២ លើក។ សុពលភាពកុងត្រារបស់លោកត្រូវផុតនៅចុងខែមិថុនា ឆ្នាំ ២០២២ ហើយតម្លៃខ្លួនពេលនេះចុះមកក្រោម ៥០ លានអឺរ៉ូហើយ៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
