ចាំទទួលផង! កីឡាករលេងកាចមួយរូបទៀតហើយ គិតគូរចង់ផ្ទេរមកក្លឹប PSG
កន្លងទៅក្លឹបបារាំង Paris Saint-Germain ទើបតែទទួលបានចំណូលថ្មី ដែលជាខ្សែការពារលេងកាច គឺ Sergio Ramos។ មកដល់ឥឡូវនេះមានដំណឹងថ្មីទៀតហើយ នោះគឺជាខ្សែប្រយុទ្ធលេងកាចនៅខាងលើវិញម្តង ហើយក៏ធ្លាប់ជាអតីតកីឡាកររបស់ក្លឹបសេដ្ឋីបារាំងផ្ទាល់ផងដែរ។
បើតាមរបាយការណ៍ពី Le Parisien បានឲ្យដឹងថា ខ្សែប្រយុទ្ធវ័យ ៣៩ ឆ្នាំ Zlatan Ibrahimovich បានចាប់អារម្មណ៍ការផ្ទេរមកក្លឹបចាស់ Paris Saint-Germain ដ្បិតបើគេទើបតែចុះហត្ថលេខាកុងត្រាថ្មីឲ្យក្លឹប AC Milan កាលពីខែមេសា។
នៅពេលខាងមុខនេះភ្នាក់ងាររបស់បុរសសញ្ជាតិស៊ុយអែតគឺលោក Mino Raiola នឹងចូលទៅចរចាជាមួយនាយកជាន់ខ្ពស់ផ្នែកកីឡារបស់ក្លឹបបារាំង លោក Leonardo ដើម្បីសិក្សាអំពីលទ្ធភាពនៃការផ្ទេររបស់ Zlatan។
បញ្ជាក់ថា Zlatan ដ្បិតបើវ័យជ្រេចូលជិត ៤០ ឆ្នាំហើយក្តី តែគុណភាពរបស់គេនៅតែមិនណយ ដោយការត្រលប់មក Milan កន្លងទៅ ២៥ ប្រកួត រកបាន ១៧ គ្រាប់ ខ្លាំងជាងទាំងកីឡាករវ័យក្មេងស្រករ ២០ មួយចំនួនទៅទៀត។ រីឯស្ថិតិកាលនៅ PSG គេចាយពេល ៤ ឆ្នាំចន្លោះឆ្នាំ ២០១២ ដល់ ២០១៦ ហើយរកបាន ១៥៦ គ្រាប់នៅការបង្ហាញខ្លួន ១៨០ ប្រកួត។ អ៊ីចឹងសាកស្រមៃទៅមើលបើ PSG មាន Zlatan និង Ramos រួមគ្នានៅក្លឹបតែមួយ តើនឹងមានរឿងអ្វីកើតឡើង?
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
